UA 9 Ffiseg
Mae ein Cyfartaledd Pwynt Gradd (GPA) cyffredinol o 3.45 yn adlewyrchu ansawdd ac effaith ryngwladol ein gwaith, gyda 99% o'n cyflwyniad yn cael ei ystyried gyda’r gorau yn y byd neu'n rhagorol yn rhyngwladol. Mae ein pŵer ymchwil (sy’n ddangosydd o ran graddfa ac ansawdd ein cyflwyniad) wedi treblu bron â bod, ers REF 2014.
Rydym yn meithrin cymuned ymchwil gynhwysol, amrywiol a chydweithredol. Mae cyflwyno gwaith 100% o'n staff cymwys i'r Uned Asesu hon yn adlewyrchu hynny.
Our results
| Lefel ansawdd | % 4 seren | % 3 seren | % 2 seren | % 1 seren | % Diddosbarth |
|---|---|---|---|---|---|
| Cyfanswm | 46.0 | 53.0 | 1.0 | 0.0 | 0.0 |
| Allbynnau | 43.4 | 54.1 | 2.5 | 0.0 | 0.0 |
| Effaith | 50.0 | 50.0 | 0.0 | 0.0 | 0.0 |
| Amgylchedd | 50.0 | 50.0 | 0.0 | 0.0 | 0.0 |
Ein hamgylchedd ymchwil
Mae gan yr Ysgol Ffiseg a Seryddiaeth weledigaeth i fynd i'r afael ag ymchwil sylweddol a heriau cymdeithasol, gan sicrhau ei bod yn cyfrannu at dwf economaidd cenedlaethol ar yr un pryd, drwy gydweithio rhyngwladol a hyrwyddo’r ddealltwriaeth o, a hefyd cymhwyso, ffiseg a seryddiaeth.
Rydym yn cyflawni hyn drwy strwythur ein grŵp ymchwil sy’n cyd-fynd â’n cryfderau a’n dyheadau ymchwil ar gyfer y dyfodol.
Ers REF 2014, bu cryn ddatblygiadau yn yr Ysgol, gan gynnwys:
- sefydlu'r Sefydliad Lled-ddargludyddion Cyfansawdd (ICS) ar y cyd â'r Ysgol Peirianneg
- ehangu ymchwil ym maes tonnau disgyrchol gyda grŵp arbrofol, a swyddi newydd ym maes seryddiaeth fyrhoedlog
- rôl ganolog yn y gwaith o sefydlu'r Sefydliad Ymchwil Arloesedd Data (DIRI) a gynlluniwyd i gryfhau ymchwil ryngddisgyblaethol ym maes gwyddor data drwy rannu arbenigedd
Mae ein hincwm ymchwil wedi cynyddu 147% i £114 miliwn ac rydym wedi gweld ein carfan o ymchwilwyr ôl-ddoethurol (PDRAs) a myfyrwyr ôl-raddedig (PGR) hefyd yn cynyddu i'r lefel uchaf erioed.
Yn ogystal â bod a lle newydd i weithio ynddo yn rhan o Ganolfan Ymchwil Drosi newydd, gwerth £131 miliwn, Prifysgol Caerdydd, lle ceir cyfleuster o’r radd flaenaf i greu lled-ddargludyddion, a 1000 m2 pellach o labordai ffiseg o ansawdd uchel, rydym wedi ennill dros £63 miliwn yn cyfrannu at ymchwil ar draws sawl adran, gan ddangos bod Ffiseg yn symbylu ymchwil amlddisgyblaethol a rhyngddisgyblaethol.
Mae enghreifftiau'n cynnwys deall y rhyngwyneb rhwng nitrid diemwnt ac alwminiwm i hwyluso gwneud defnydd o sinciau gwres diemwnt ar gyfer electroneg amledd radio (RF) sy'n seiliedig ar nitrid (Ffiseg a Seryddiaeth a Pheirianneg, grant rhaglen EPSRC y Cyngor Ymchwil Peirianneg a'r Gwyddorau Ffisegol) a datblygu opteg aflinol ar gyfer microsgobeg celloedd (Ffiseg a Seryddiaeth a'r Biowyddorau, EPSRC a'r Cyngor Ymchwil Biodechnoleg a Gwyddorau Biolegol).
Mae gennym ddiddordeb angerddol hefyd mewn gwella amrywiaeth yn ein gweithle ac ansawdd ein hamgylchedd gwaith, ac rydym wedi sicrhau statws Hyrwyddwr Juno y Sefydliad Ffiseg ac, yn fwy diweddar, wobr Arian Athena SWAN, sy’n cydnabod ein cynnydd.
Dewch i gael gwybod am ein hymchwil
Mae ein grwpiau ymchwil yn gweithio ar flaen y gad o ran ymchwil i ddatrys problemau cyfredol a gwella ansawdd bywyd.
