UA 5 Gwyddorau Biolegol
Gwnaethom sicrhau sgôr Cyfartaledd Pwynt Gradd gyffredinol o 3.30, ac ystyriwyd bod 88% o’n gweithgarwch ymchwil naill ai’n arwain y byd neu’n rhagorol yn rhyngwladol. Cawsom ein rhoi yn yr 8fed safle yn y DU ar gyfer Pŵer Ymchwil (arwydd o ansawdd a maint ein cyflwyniad). Mae ein hamgylchedd cefnogol a'n diwylliant o ragoriaeth ymchwil wedi’u gwreiddio’n ddwfn, ac mae sgôr o 3.50 ar gyfer amgylchedd yn arwydd o hynny.
Mae’r ffaith ein bod yn y 7fed safle yn y DU ar gyfer effaith yn adlewyrchu rôl hollbwysig ein hymchwilwyr yn y gwaith o fynd i’r afael â’r heriau mwyaf sy’n wynebu’r byd. Mae enghreifftiau o’r heriau hyn yn cynnwys diogelu rhywogaethau sydd mewn perygl, rheoli ecosystemau dŵr croyw iach a nodi ffyrdd gwell o ganfod, monitro a thrin HIV, y ffliw a SARS-CoV-2.
Rydym yn meithrin cymuned ymchwil gynhwysol, amrywiol a chydweithredol. Mae cyflwyno gwaith 100% o'n staff cymwys i'r Uned Asesu hon yn adlewyrchu hynny.
Ein canlyniadau
| Lefel ansawdd | % 4 seren | % 3 seren | % 2 seren | % 1 seren | % Diddosbarth |
|---|---|---|---|---|---|
| Cyfanswm | 42.0 | 46.0 | 12.0 | 0.0 | 0.0 |
| Allbynnau | 30.8 | 49.4 | 19.0 | 0.8 | 0.0 |
| Effaith | 64.3 | 35.7 | 0.0 | 0.0 | 0.0 |
| Amgylchedd | 50.0 | 50.0 | 0.0 | 0.0 | 0.0 |
Ein hamgylchedd ymchwil
Mae Ysgol y Biowyddorau yn ganolfan fywiog ar gyfer ymchwil fiolegol; yr hyn sy’n ei hysgogi yw ei chymuned ymchwil gynhwysol a chefnogol.
Ers REF 2014, bu cryn ddatblygiadau yn yr Ysgol, gan gynnwys:
- creu ac arwain Sefydliad Ymchwil Dŵr y Brifysgol (WRI) a’r Sefydliad Darganfod Meddyginiaethau (MDI) newydd, a rhagor o rwydweithio â sefydliadau ymchwil presennol ym meysydd Canser, Niwrowyddorau a Chynaliadwyedd
- buddsoddiad a thwf yn y Canolfannau Rhagoriaeth presennol gan gynnwys y Sefydliad Ymchwil Bôn-gelloedd Canser Ewropeaidd (ECSCRI) a Chanolfan Maes Danau Girang (DGFC), a chyfrannu ar raddfa fwy eang i Sefydliad Ymchwil y Niwrowyddorau ac Iechyd Meddwl (NMHRI), Sefydliad Ymchwil Mannau Cynaliadwy (PLACE, a Chanolfan Ymchwil Biofecaneg a Biobeirianneg
- sefydlu Canolfannau Technoleg dan arweiniad academyddion i sicrhau mynediad at adnoddau technolegol, offer ac arbenigedd cydweithredol o’r radd flaenaf; mae hyn wedi symbylu hyfforddiant, allbynnau ac effeithiau
- buddsoddiad pellach o ran creu diwylliant ymchwil cynhwysol, bu i hyn gael ei gydnabod â Gwobr Arian Rhwydwaith Academaidd Menywod Gwyddonol Athena (SWAN) yn 2016, ac fe ddyfarnwyd ein bod yn haeddiannol ohoni o hyd yn 2020
Yn ystod cyfnod REF 2021, roedd cyfanswm yr incwm grant ar gyfartaledd yn £11.8 miliwn y flwyddyn, sef cynnydd o 25% ers y cyfartaledd o £9.4 miliwn y flwyddyn ar gyfer REF 2014. Ers REF 2014, mae Ysgol y Biowyddorau wedi recriwtio 21 o staff newydd (57% yn fenywod), wedi denu 12 o Gymrodyr, ac wedi mentora wyth o Gymrodyr ar ddechrau eu gyrfa i benodiadau academaidd parhaol â chyllid craidd. Mae'r rhain wedi cynnwys 17 (47%) o fenywod.
Yn ogystal, mae Ysgol y Biowyddorau wedi creu diwylliant ffyniannus ar gyfer addysg ôl-raddedig gyda myfyrwyr yn dod o amrywiaeth eang o gefndiroedd ac yn cael eu cefnogi gan nifer o ffynonellau cyllid. Dros gyfnod REF 2021, mae 468 o fyfyrwyr ymchwil ôl-raddedig wedi derbyn hyfforddiant, cynnydd sylweddol o’r 192 o ôl-raddedigion a gefnogwyd yng nghyfnod REF 2014.
Dewch i gael gwybod am ein hymchwil
Mae ein hymchwil wedi'i threfnu'n 4 is-adran sy'n ceisio darparu atebion newydd ar gyfer heriau byd-eang mawr a fydd yn cael effaith wirioneddol ar gymdeithas a'r amgylchedd.
