UA 23 Addysg
Gyda GPA o 3.55, rydym ni'n 3ydd yn y DU am ein hymchwil Addysg. Cawsom y sgôr uchaf posibl o 4.0 ar gyfer ein heffaith ymchwil. Rydym yn 5ed yn y DU am ein hallbynnau. Ar y cyfan, mae 90% o'n hymchwil yn arwain y byd neu’n rhyngwladol-ragorol.
Mae ein hymchwil yn canolbwyntio ar les, dysgu ac addysgeg plant a phobl ifanc o'r blynyddoedd cynnar i addysg broffesiynol, a marchnadoedd addysg, sgiliau a llafur.
Rydym yn meithrin cymuned ymchwil gynhwysol, amrywiol a chydweithredol. Mae cyflwyno gwaith 100% o'n staff cymwys i'r Uned Asesu hon yn adlewyrchu hynny.
Ein canlyniadau
| Lefel ansawdd | % 4 seren | % 3 seren | % 2 seren | % 1 seren | % Diddosbarth |
|---|---|---|---|---|---|
| Cyfanswm | 66.0 | 24.0 | 9.0 | 1.0 | 0.0 |
| Allbynnau | 49.4 | 34.1 | 15.2 | 1.3 | 0.0 |
| Effaith | 100.0 | 0.0 | 0.0 | 0.0 | 0.0 |
| Amgylchedd | 75.0 | 25.0 | 0.0 | 0.0 | 0.0 |
Ein hamgylchedd ymchwil
Mae ymchwil Addysg yng Nghaerdydd yn elwa ar ei lleoliad yn rhan o Ysgol Gwyddorau Cymdeithasol ryngddisgyblaethol. Mae hyn yn hwyluso dadansoddiadau o gyd-gysylltedd prosesau cymdeithasol, emosiynol ac economaidd sy'n effeithio ar brofiadau a deilliannau addysgol o'r blynyddoedd cynnar hyd at fod yn oedolion.
Mae ein hymchwil addysg yn mynd i'r afael â thri maes eang sy'n gorgyffwrdd: lles, gwybodaeth, dysgu ac addysgeg plant a phobl ifanc, ac addysg, sgiliau a marchnadoedd llafur.
Er mwyn sicrhau bod ein hymchwil yn ddefnyddiol ac yn cael ei ddefnyddio, rydym yn ymgysylltu â thri phrif grŵp o fuddiolwyr: llunwyr polisïau, gweithwyr proffesiynol a chymunedau ehangach. Mae tystiolaeth o'n heffaith i’w gweld yn y ffyrdd niferus yr ydym wedi dylanwadu ar bolisïau addysg yng Nghymru a thu hwnt. Rydym hefyd wedi cefnogi athrawon ac ysgolion yn ogystal â chyfrannu at ddadleuon cyhoeddus am ddyfodol addysg.
Fe wnaethom oruchwylio dros 60 o fyfyrwyr doethurol i gwblhau eu hymchwil addysg, ac fe ddyrannodd y Cyngor Ymchwil Economaidd a Chymdeithasol ysgoloriaethau i 29 o'r rhain.
Ategir y gweithgareddau gan fuddsoddiad ariannol sylweddol. Ers 2014, mae dros £25 miliwn wedi’i ddyfarnu ar gyfer ymchwil addysg. Mae hyn yn gynnydd o 60% o'i gymharu â'r cyfnod REF blaenorol. Mae SPARC, parc ymchwil gwyddorau cymdeithasol cyntaf y byd, sydd ar ein campws arloesiedd gwerth £300 miliwn, erbyn hyn yn darparu seilwaith o'r radd flaenaf ar gyfer llawer o ganolfannau ymchwil yr Ysgol sy'n canolbwyntio ar addysg.
Mae’r buddsoddiadau hyn yn galluogi ein hymchwilwyr i barhau i fod yn ymrwymedig i weithio gydag ymchwilwyr a rhanddeiliaid eraill i fynd i'r afael â'r heriau parhaus o ran sut i feithrin addysg a lles pob dinesydd, o blentyndod cynnar i pan maent yn oedolion.
Dewch i gael gwybod am ein hymchwil
Mae gan ein hymchwil hanes o effeithio ar ddadlau cyhoeddus, datblygu polisi ac arloesedd sy’n seiliedig ar ymarfer, tra bod ein hymchwilwyr yn gweithio’n rheolaidd gyda Llywodraeth Cymru ac asiantaethau cyhoeddus eraill i roi newid bywyd go iawn ar waith ar gyfer materion a phroblemau cymdeithasol penodol.
