Polisi Buddsoddi Cymdeithasol Gyfrifol

Mae Prifysgol Caerdydd wedi ymrwymo i sicrhau ei bod yn gwneud penderfyniadau buddsoddi mewn modd cyfrifol a gonest.

Datblygwyd y polisi hwn ar gyfer buddsoddi moesegol i ganiatáu i'r Brifysgol ddilyn dull moesegol tra'n lleihau unrhyw effaith negyddol ar ei adenillion buddsoddi. Mae'n ymwybodol o safbwynt y Comisiwn Elusennau ar ddyletswyddau ymddiriedolwyr i fuddsoddi er mwyn cefnogi’r gwaith o gyflawni ein diben fel elusen.

Wrth wneud penderfyniadau ynghylch buddsoddi, mae'r Brifysgol yn disgwyl i'w Rheolwyr Buddsoddi penodedig fuddsoddi yn unol â'r polisi buddsoddi cymdeithasol gyfrifol hwn. Disgwylir i Reolwyr Buddsoddi annog ymddygiad da neu atal ymddygiad gwael drwy sgrinio buddsoddiadau, naill ai'n gadarnhaol neu'n negyddol, a thrwy ymgysylltu'n uniongyrchol â chwmnïau.

Datganiad polisi

Mae polisi buddsoddi'r Brifysgol yn gwahardd buddsoddi’n uniongyrchol mewn cwmnïau, gan gynnwys mewn bondiau llywodraethau, ar sail y paramedrau canlynol: -

Tybaco: unrhyw gwmnïau sy'n ymwneud â chynhyrchu a dosbarthu cynhyrchion tybaco lle disgwylir i’r enillion fod fwy na 10% o enillion byd-eang;

Arfau: unrhyw gwmnïau sy'n cynhyrchu arfau a systemau arfau, gan gynnwys arfau clwstwr a ffrwydron tir gwrthbersonél.

Ymddygiad Moesegol: unrhyw gwmnïau nad oes ganddyn nhw God Polisi Moeseg fel Egwyddorion Compact y CU (neu debyg); neu gwmnïau sy'n arddangos arferion Amgylcheddol, Cymdeithasol a Llywodraethiant gwael ac nad ydyn nhw’n dangos fawr o arwydd eu bod yn gwella.

Mae'r Brifysgol yn ceisio osgoi niwed a bydd yn buddsoddi mewn cwmnïau sy'n bodloni cyfrifoldebau sylfaenol ym meysydd hawliau dynol, safonau llafur, yr amgylchedd a gwrthlygredd yn unig.

Rhaid i bob cwmni buddsoddi gydymffurfio ag Egwyddorion Compact y Cenhedloedd Unedig a gweithredu mewn ffyrdd sy’n gwneud y canlynol:

• Cefnogi a pharchu diogeliad hawliau dynol a gyhoeddwyd yn rhyngwladol a gwneud yn siŵr nad ydyn nhw’n rhan o unrhyw gam-drin hawliau dynol.
• Dileu pob math o lafur gorfodol a dan orfod a gwahaniaethu mewn perthynas â chyflogaeth a swyddi a diddymu llafur plant yn effeithiol.
• Hyrwyddo mwy o gyfrifoldeb amgylcheddol.
• Gweithio yn erbyn llygredd yn ei holl ffurfiau, gan gynnwys cribddeiliaeth a llwgrwobrwyo.

Tanwyddau ffosil:

• Mae'r brifysgol wedi rhoi’r gorau i fuddsoddi mewn cwmnïau sy'n ymwneud yn uniongyrchol ag echdynnu tanwydd ffosil.
• Mae'r brifysgol yn gwahardd buddsoddi mewn cwmnïau sy'n masnachu, trosglwyddo, dosbarthu neu gyflenwi tanwydd ffosil, lle mae disgwyl i enillion cyfansymiol o'r fath fod yn uwch na 10% o gyfanswm eu henillion.
• Mae'r brifysgol yn gwahardd buddsoddi mewn cwmnïau sy'n cynhyrchu pŵer drwy ddefnyddio tanwydd ffosil, lle mae enillion cyfansymiol o'r fath yn uwch na 10% o gyfanswm eu henillion.

Os gwneir buddsoddiadau gan reolwyr trydydd parti mewn cronfeydd cyfun neu debyg, gofyniad y Brifysgol yw y dylai'r cronfeydd dan sylw, lle bynnag y bo'n ymarferol, geisio osgoi buddsoddi’n uniongyrchol mewn cwmnïau sy'n dod o fewn y gwaharddiad ym mholisi Buddsoddi’n Gyfrifol yn Gymdeithasol y Brifysgol.

Monitro ac adolygu

Bydd y Brifysgol yn cyhoeddi'r polisi hwn a rhestr o'r holl ddaliadau buddsoddi ar wefan y Brifysgol bob blwyddyn. Dylai unrhyw staff neu fyfyrwyr sy'n dymuno gwneud sylwadau ynghylch y meysydd y dylai’r polisi hwn eu cwmpasu, neu am fuddsoddiadau presennol y brifysgol neu rai’r dyfodol, gysylltu â Finance-CFO@caerdydd.ac.uk.

Unwaith y flwyddyn, bydd yr Is-bwyllgor Buddsoddiadau a Bancio yn ystyried a ddylid ymgorffori meysydd eraill na ddylid ymwneud â nhw yn y polisi hwn.

Mae'r Brifysgol yn ymrwymo i gael cynrychiolaeth myfyrwyr ar yr Is-bwyllgor Buddsoddi a Bancio lle trafodir buddsoddiadau.

Gwybodaeth am reoli polisïau

Mae'r polisi hwn yn berthnasol i fuddsoddiadau Prifysgol Caerdydd.

Nid yw Cronfa Bensiwn Prifysgol Caerdydd yn perthyn i'r Brifysgol. Cyfrifoldeb ymddiriedolwyr y cynllun yw buddsoddi'r cronfeydd hyn.