Targedu signalau Wnt i drin canser metastatig y prostad

Hynny er mwyn nodi biofarcwyr a triniaethau newydd posibl i wella’r gofal sydd ar gael i gleifion a chyfraddau goroesi.

Cefndir

Canser metastatig y prostad yw prif achos marwolaeth ymhlith dynion â chanser y prostad gan ei fod yn gwrthsefyll y prif driniaethau ar gyfer canser y prostad, fel therapi amddifadu o androgenau. Mewn achosion o ganser metastatig y prostad neu glefyd sy’n gwrthsefyll therapi amddifadu o androgenau, mae signalau Wnt yn cael eu dadreoli’n aml ar lefel ligand Wnt/derbynnydd ‘frizzled’. Mae angen triniaeth newydd ar gyfer hyn ar frys yn y clinig.

Nodau

Mae ein canfyddiadau rhagarweiniol addawol yn dangos bod targedu signalau Wnt ar lefel y ligand/derbynnydd yn effeithiol yn erbyn canser metastatig y prostad in-vivo. Drwy ddefnyddio sawl model cyn-glinigol ym maes canser metastatig y prostad, bydd y prosiect hwn yn:

• nodi manteision therapi ag WNT974 (sy’n atal ligand Wnt rhag secretu – yn destun treialon clinigol Cam 1 ar gyfer canserau eraill) i drin isdeipiau lluosog o’r clefyd (e.e. +/-AR/mwtanau Wnt)
• nodi os mai FZD7 yw’r derbynnydd sy'n gyrru signalau Wnt mewn achosion o ganser metastatig y prostad
• archwilio mewn ffordd ymarferol neu fecanistig sut mae signalau Wnt yn rheoli gweithgarwch celloedd canser metastatig y prostad pan fyddant yn dod ar draws y prif safle metastatig, sef yr asgwrn, a hynny drwy brofion in-vitro arloesol/dilyniannau RNA

Bydd y canfyddiadau'n nodi pa mor effeithiol yw targedu'r ligand/derbynnydd yn erbyn canser metastatig y prostad a pha rai o gelloedd canser y prostad sy’n cael eu rheoli gan yr asgwrn yn ystod y broses gytrefu, a hynny er mwyn nodi biofarcwyr/triniaethau newydd posibl i wella’r gofal sydd ar gael i gleifion a chyfraddau goroesi.

Cyllid

Mae’r prosiect hwn yn cael ei gyllido gan yr elusen Prostate Cancer Research drwy grant o £491,731 dros dair blynedd.

Pobl

Partneriaid

• Dr Robert Jones and Professor John Staffurth, Prifysgol Caerdydd Yr Ysgol Meddygaeth
• Dr Ning Wang, Sheffield University
• Dr Bin-Zhi Qian, The University of Edinburgh
• Dr Matt Smalley, Prifysgol Caerdydd Ysgol y Biowyddorau