Ymchwil yn yr Ysgol Mathemateg
Mae ein hymchwil, sy'n cael ei chydnabod yn rhyngwladol, yn dangos effaith y gwyddorau mathemategol ar ein bywyd bob dydd.
Uned ymchwil-ddwys hirsefydlog yw Ysgol Mathemateg Prifysgol Caerdydd ac rydyn ni'n canolbwyntio ar hyrwyddo gwybodaeth fathemategol sylfaenol, hwyluso'r broses o gymhwyso’r gwyddorau mathemategol mewn disgyblaethau eraill, a rhoi budd cymdeithasol drwy ein cysylltiadau â byd diwydiant, elusennau a'r sector cyhoeddus.
Ein Hysgol
Yn yr adeilad Abacws newydd o'r radd flaenaf, mae Ysgol Mathemateg Caerdydd yn cwmpasu grwpiau ymchwil mewn mathemateg bur, mathemateg gymhwysol, ystadegaeth, gwyddorau data ac ymchwil weithredol, y mae pob un ohonyn nhw yn elwa o agwedd ryngwladol iawn a chyllid ymchwil sylweddol.
Gan gynyddu ar ein sylfaen gref mewn ystod o wyddorau mathemategol, rydyn ni’n hyrwyddo ymchwil ym maes mathemateg sy'n ehangu terfynau'r hyn yr ydyn ni’n ei wybod ac yn cynyddu ein hymgysylltiad cymdeithasol. Gan fod sgiliau meintiol yn dod yn fwyfwy pwysig mewn byd sy'n newid yn gyflym, ein prif ffocws yw gwella ein sianeli cyfathrebu er mwyn hwyluso trosi gwybodaeth rhwng mathemategwyr a defnyddwyr mathemateg, hyrwyddo harddwch ac arwyddocâd mathemateg, a gwneud gwybodaeth fathemategol yn hygyrch ac yn berthnasol i'r cyhoedd ehangach.
Cydweithrediad
Gan gydnabod bod y rhan fwyaf o heriau a chyfleoedd cyfoes yn amlddisgyblaethol, rydyn ni’n cydweithio ag adrannau eraill y Brifysgol a phartneriaid allanol i ddatblygu a chymhwyso damcaniaethau a thechnegau mathemategol i fynd i'r afael â phroblemau'r byd go iawn.
Y ffaith bod yr Ysgol yn rhannu Abacws â Chyfrifiadureg a Gwybodeg yw’r cam diweddaraf yn y broses o gydweithio rhwng yr Ysgolion ac mae hyn hefyd yn cynnwys Sefydliad Ymchwil Arloesedd Data'r Brifysgol , yr Ysgol Peirianneg, CUBRIC a'r Ysgol Meddygaeth. Mae Partneriaeth Strategol y Brifysgol â'r Swyddfa Ystadegau Gwladol (SYG) yn ffrwyth mwy nag ugain mlynedd o gydweithio rhwng ystadegwyr a gwyddonwyr data Ysgol Mathemateg Caerdydd a'r SYG.
Ar y cyd â’n partneriaid allanol rydyn ni’n cymhwyso mathemateg i heriau byd-eang gan gynnwys (ond heb fod yn gyfyngedig i) rheoli gofal iechyd, effeithiolrwydd busnes, a thwf cymunedau mathemategol yn Affrica. Mae ein hymchwilwyr ymhlith aelodau o Grwpiau Cynghori Technegol Llywodraeth Cymru ar gyfer pandemig Covid-19.
Cydraddoldeb, Amrywiaeth a Chynhwysiant
Gweithgarwch dynol, deallusol a chyffredinol yw mathemateg nad yw'n cydnabod rhwystrau o ran rhyw nac ethnigrwydd. Rydyn ni wedi ymrwymo i hyrwyddo ein pwnc mewn awyrgylch croesawgar, diogel, cefnogol, ysbrydoledig a chynhwysol, gan werthfawrogi a dathlu cyfraniadau ein staff, a rhoi cyfle i bawb wireddu eu potensial.
