Peirianneg Meinweoedd a Meddygaeth Adfywiol (MSc)
- Hyd: 1 flwyddyn
- Dull astudio: Amser llawn
Diwrnod agored
Dysgwch am astudio'n ôl-raddedig yma yn ystod ein Diwrnod Agored nesaf.
Pam astudio’r cwrs hwn
Datblygu'r genhedlaeth nesaf o dechnolegau peirianneg meinweoedd a meddygaeth adfywiol i helpu i drin clefydau na ellir eu gwella ar hyn o bryd, a llunio dyfodol meddygaeth.
Y cyntaf o'i fath yn y DU
Ein cwrs yw un o'r rhaglenni sydd wedi rhedeg hiraf yn y DU, diolch i'n cymuned gref o ymchwilwyr peirianneg meinwe arloesol, angerddol ac chwilfrydig.
Ehangu eich rhwydwaith
Cewch chi’ch addysgu gan arbenigwyr ym maes y Biowyddorau, Deintyddiaeth, Meddygaeth, Optometreg a Fferylliaeth, yn ogystal â chael y cyfle i ddatblygu rhwydwaith cryf o gysylltiadau.
Ymgysylltu â’r diwydiant
Cwrdd â phartneriaid lleol yn y diwydiant ac ymchwilwyr a chlinigwyr sydd â diddordeb brwd ym maes peirianneg meinweoedd a meddygaeth adfywiol.
Prosiect ymchwil
Ymgymryd â phrosiect ymchwil 5 mis o’ch dewis chi mewn meysydd megis bioargraffu 3D, bioleg bôn-gelloedd, fesiglau allgellog, atffurfio organau a meinweoedd, bio-adweithyddion a dosbarthu cyffuriau.
Man lansio ar gyfer eich PhD
Sicrhewch hyfforddiant labordy blaengar ac ymarferol, profiad ymchwil gwerthfawr, ac arbenigedd manwl yn agweddau masnachol a throsiadol peirianneg meinweoedd a meddygaeth adfywiol, er mwyn i chi fod yn barod i ffynnu mewn rhaglen PhD neu ragori yn y diwydiant ar ôl graddio.
Cyfleoedd Cymraeg
Byddwch yn cael cyfleoedd i gwblhau eich asesiadau drwy gyfrwng y Gymraeg, a chael tiwtor personol sy’n siarad Cymraeg i’ch cefnogi.
Ymunwch â’r genhedlaeth nesaf o ymchwilwyr Peirianneg Meinweoedd a Meddygaeth Aildyfu, gan weithio i lunio dyfodol Meddygaeth a Gofal Iechyd a gwneud gwahaniaeth go iawn i fywydau pobl ledled y byd.
Gyda phoblogaeth sy'n heneiddio a chynnydd mewn clefydau cronig, ni fu erioed mwy o alw am ymchwilwyr cymwys ym maes Peirianneg Meinweoedd i lywio dyfodol meddygaeth.
A chithau’n ymchwilydd Peirianneg Meinweoedd, byddwch chi’n gwneud gwahaniaeth go iawn i fywydau pobl ledled y byd, drwy helpu i gynnig triniaethau ar gyfer clefydau, anafiadau ac anhwylderau lle ceir diffyg opsiynau i bobl ar hyn o bryd. Mae'r maes ymchwil biofeddygol hwn, sy’n datblygu’n barhaus, yn cyfuno gwyddorau bywyd, bioleg a pheirianneg i wneud cynnydd yn y broses o drwsio ac ailosod meinweoedd ac organau sydd wedi’u heintio a’u niweidio.
P'un ai a ydych chi am lunio dyfodol ymchwil feddygol drwy PhD, datblygu atebion meddygol arloesol fel arbenigwr yn y diwydiant, neu hyd yn oed hyfforddi'r genhedlaeth nesaf o ymchwilwyr peirianneg meinweoedd fel academydd, y cwrs hwn yw’r man cychwyn perffaith i gychwyn gyrfa ystyrlon a chyffrous.
Byddwch chi’n ymgymryd â hyfforddiant manwl sy’n arwain y gangen hon o Wyddoniaeth Fiofeddygol, gan gynnwys bioleg bôn-gelloedd, bioddeunyddiau, deallusrwydd artiffisial a pheirianneg meinweoedd/organau a byddwch chi’n dysgu sut i fynd â syniadau o'r labordy yr holl ffordd i glinigau er budd cleifion.
Byddwch chi’n cyfrannu at seminarau, gweithdai, darlithoedd a sesiynau labordy, gyda modiwlau a addysgir yn archwilio dulliau ymchwil, bioleg celloedd, bioddeunyddiau, masnacheiddio, trosi clinigol, bôn-gelloedd, meddygaeth aildyfu a thechnolegau sy'n dod i'r amlwg. Byddwch chi hefyd yn ymgymryd â phrosiect ymchwil 5 mis ar bwnc o'ch dewis chi ac yn ymgysylltu â phartneriaid diwydiannol lleol lle cewch gipolwg ar y gwaith o gymhwyso peirianneg meinweoedd a meddygaeth aildyfu i ddatrys problemau yn y byd go iawn.
Fe gewch chi’ch addysgu gan academyddion o bob rhan o Ysgol y Biowyddorau, yr Ysgol Deintyddiaeth, yr Ysgol Meddygaeth, yr Ysgol Optometreg a’r Ysgol Fferylliaeth. Bydd y rhwydwaith y byddwch chi'n ei ddatblygu a'r arbenigedd y byddwch chi'n manteisio arno yn eich helpu i sefyll allan ymysg y dorf ar ôl graddio, ac yn eich gwneud chi’n opsiwn deniadol iawn i gyflogwyr yn y diwydiant a sefydliadau ymchwil.
Eich ysgol gartref fydd yr Ysgol Deintyddiaeth, sydd wedi’i lleoli yn nhrydydd ysbyty athrofaol mwyaf y DU. Yma, byddwch chi’n ymuno â chymuned anhygoel o staff a myfyrwyr, yn glinigol ac anghlinigol, gyda phob un yn gweithio i wneud y byd yn lle gwell, o ddefnyddio polymerau newydd a chyfansoddion naturiol i drin clwyfau cronig, i ddefnyddio grym bôn-gelloedd, fesiglau allgellog a bioddeunyddiau newydd i aildyfu meinweoedd ac organau.
Bydd gan raddedigion o’r rhaglen hon ystod eang o wybodaeth ac amrywiaeth o sgiliau, a fydd yn eu gwneud nhw’n opsiynau deniadol i ddarpar gyflogwyr a sefydliadau ymchwil yn y sector newidiol, cyflym hwn.
Ar gyfer fy mhrosiect, canolbwyntiais ar ddatblygu bioinc newydd sy'n seiliedig ar ffibrin a fydd, gobeithio, yn helpu i greu model croen dynol. Roedd dyluniad cyfansoddiad y bioinc hwn yn heriol gan nad oedd unrhyw waith blaenorol wedi'i wneud ag ef yn y model bioargraffydd a ddefnyddiwyd yn y labordy; Gwnaeth hyn y prosiect hyd yn oed yn fwy diddorol a chyffrous. Byddwn yn argymell y cwrs hwn yn llwyr i unrhyw un sydd â diddordeb mawr mewn ymchwil, a pharodrwydd i ganolbwyntio eu gyrfa yn y dyfodol mewn maes sy'n datblygu!
Ble byddwch yn astudio
Ysgol Deintyddiaeth
Ni yw'r unig Ysgol Deintyddiaeth yng Nghymru, ac rydym yn darparu arweiniad unigryw a phwysig ym meysydd ymchwil deintyddol, addysgu a gofal cleifion.
Meini prawf derbyn
Er mwyn cael eich ystyried am gynnig ar gyfer y rhaglen hon bydd angen i chi fodloni'r holl ofynion mynediad. Ni fydd eich cais yn cael ei ddatblygu os na ddarperir yr wybodaeth a'r dystiolaeth a restrir.
Gyda'ch cais ar-lein, bydd angen i chi ddarparu:
- Copi o'ch tystysgrif gradd a'ch trawsgrifiadau sy'n dangos eich bod wedi cyflawni gradd anrhydedd 2:2 mewn maes pwnc perthnasol megis Biobeirianneg, Bioleg, Gwyddorau Biofeddygol, Biotechnoleg, Deintyddiaeth, Gwyddorau Bywyd, Peirianneg Fecanyddol/Meddygol/Cemegol, Meddygaeth neu Fferylliaeth, neu radd ryngwladol gyfwerth. Os yw eich tystysgrif gradd neu ganlyniad yn yr arfaeth, llwythwch unrhyw drawsgrifiadau dros dro neu dystysgrifau dros dro.
- Copi o'ch tystysgrif IELTS gyda sgôr gyffredinol o 6.5 gyda 5.5 ym mhob is-sgil, neu dystiolaeth o gymhwyster cyfatebol derbyniol. Dylech gynnwys dyddiad eich prawf disgwyliedig os yw'r cymhwyster hwn yn yr arf. Os oes gennych dystiolaeth dderbyniol amgen, fel gradd israddedig a astudiwyd yn y DU, rhowch hyn yn lle IELTS.
- Dau gyfeiriad academaidd neu broffesiynol/cyflogwr wedi'u llofnodi a'u dyddio sy'n dangos eich addasrwydd ar gyfer y rhaglen.
- CV cyfredol sy'n cynnwys eich hanes academaidd a gwaith llawn.
Dyddiad cau ar gyfer ceisiadau
Y dyddiad cau yw 30 Mehefin bob blwyddyn ar gyfer mynediad ym mis Medi. Os byddwch yn cyflwyno cais ar ôl y dyddiad hwn, byddwn ond yn ei ystyried os oes lleoedd ar gael o hyd.
Broses ddethol
Byddwn yn adolygu eich cais, ac os ydych chi’n bodloni’r gofynion mynediad, byddwn ni’n anfon dolen atoch ar-lein i ateb set o gwestiynau byr yn ymwneud â’ch profiad, a’ch cymhellion dros wneud cais am le ar y cwrs. Bydd terfyn amser ar y set o gwestiynau. Ni fydd atebion a ysgrifennwyd gan ddefnyddio deallusrwydd artiffisial (e.e. ChatGPT) yn cael eu derbyn a byddan nhw’n arwain at wrthod y cais heb ystyriaeth bellach.
Ar ôl i’r ymgeiswyr gwblhau'r cwestiynau ar-lein, gwneir cynigion i'r rheini sy'n sgorio uchaf.
Rhagor o wybodaeth am ofynion Iaith Saesneg.
Mae'n rhaid i ymgeiswyr sydd angen Fisa myfyriwr i astudio yn y DU gyflwyno cymhwyster iaith Saesneg derbyniol er mwyn bodloni gofynion UKVI (Fisâu a Mewnfudo y DU).
Euogfarnau troseddol
Nid oes gofyn i chi gwblhau gwiriad GDG (Gwasanaeth Datgelu a Gwahardd) neu ddarparu Tystysgrif Ymddygiad Da i astudio'r cwrs hwn.
Os ydych yn destun unrhyw amod trwydded neu gyfyngiad monitro ar hyn o bryd a allai effeithio ar eich gallu i gwblhau eich astudiaethau'n llwyddiannus, bydd gofyn i chi ddatgelu eich cofnod troseddol. Mae'r amodau'n cynnwys y canlynol (ymhlith eraill):
- mynediad i gyfrifiaduron neu ddyfeisiau sy'n gallu storio delweddau
- defnyddio offer/dyfeisiau rhyngrwyd a chyfathrebu
- cyrffywiau
- rhyddid i symud
- cyswllt â phobl sy'n gysylltiedig â Phrifysgol Caerdydd.
Strwythur y cwrs
Mae'r MSc mewn Peirianneg Meinweoedd a Meddygaeth Aildyfu yn rhaglen lawn-amser sy’n para blwyddyn. Mae’n cychwyn ym mis Medi bob blwyddyn.
Am chwe mis cyntaf y rhaglen, byddwch chi’n canolbwyntio ar Gam 1, sef y gydran a addysgir sy'n cynnwys ystod o fodiwlau cyffrous. Byddwch chi’n cael eich dysgu mewn grwpiau bach ac yn cymryd rhan mewn sesiynau labordy, gweithdai rhyngweithiol a thiwtorialau, ac yn ymgysylltu â chwmnïau lleol perthnasol lle byddwch chi’n arsylwi ar therapïau peiriannu ac atgyweirio meinweoedd yn cael eu defnyddio i ddatrys problemau clinigol yn y byd go iawn. Bydd eich cynnydd yn cael ei asesu drwy aseiniadau ysgrifenedig, cyflwyniadau ac arholiadau.
Byddwch chi wedyn yn symud ymlaen i Gam 2, sef prosiect ymchwil 5 mis mewn labordy. Gallwch chi ddewis o blith amrywiaeth o bynciau a gynigir gan oruchwylwyr academaidd ledled y Brifysgol neu hyd yn oed ddatblygu eich syniadau eich hun.
Yn y gorffennol, mae myfyrwyr wedi canolbwyntio ar feysydd ymchwil fel bioleg bôn-gelloedd embryonig neu fesencymaidd, fesiglau allgellog, bioargraffu 3D, trwsio cartilagau, esgyrn, croen neu feinwe'r geg, cyfansoddion naturiol, modelau organoid, bioddeunyddiau a chyflenwi cyffuriau. Ar ddiwedd y cam hwn, byddwch chi’n cyflwyno Traethawd Hir MSc yn seiliedig ar ganfyddiadau eich prosiect ac yn cyflwyno eich gwaith fel poster mewn cyfarfod ymchwil wyddonol lleol.
Mae'r modiwlau a ddangosir yn enghraifft o'r cwricwlwm nodweddiadol. Bydd modiwlau terfynol yn cael eu cyhoeddi fis cyn i'ch rhaglen ddechrau.
Mae'r MSc mewn Peirianneg Meinweoedd a Meddygaeth Adfywiol yn Rhaglen blwyddyn, llawn amser. Mae'r Rhaglen MSc yn dechrau ym mis Medi bob blwyddyn gyda Chyfnod 1, elfen 6 mis, a addysgir yn cynnwys pedwar Modiwl gorfodol.
Ar ôl cwblhau Cam 1, mae myfyrwyr yn ymgymryd â phrosiect ymchwil 5 mis, mewn labordy, rhwng Ebrill a Medi (Cam 2). Mae Cam 2 yn arwain at gyflwyno Traethawd MSc, yn seiliedig ar ganfyddiadau MSc y Prosiect.
| Teitl modiwl | Côd modiwl | Credydau |
|---|---|---|
| Traethawd hir | DET003 | 60 credydau |
| Bioleg Cellog a Moleciwlaidd | BIT001 | 30 credydau |
| Peirianneg feinwe o'r cysyniad i ymarfer clinigol | DET002 | 30 credydau |
| Dulliau Ymchwil | DET031 | 30 credydau |
| Bôn-gelloedd, Meddygaeth Adfywiol a Dulliau Gwyddonol | DET068 | 30 credydau |
Mae'r Brifysgol wedi ymrwymo i ddarparu amrywiaeth eang o opsiynau modiwl lle’n bosibl. Ond byddwch yn ymwybodol er y byddwn yn gwneud pob ymdrech i gynnig dewis, gall hyn gael ei gyfyngu mewn rhai amgylchiadau. Y rheswm am hyn yw'r ffaith mai dim ond nifer cyfyngedig o leoedd sydd ar gael ar rai modiwlau, a gaiff eu dyrannu ar sail y cyntaf i'r felin. Mae'n ofynnol i fodiwlau eraill sicrhau isafswm nifer o fyfyrwyr cyn gallu eu cynnal, er mwyn gwneud yn siŵr y gellir cyflwyno addysg o ansawdd priodol. Gall modiwlau gael eu cyfyngu oherwydd gwrthdaro yn yr amserlen hefyd, ac er bod y Brifysgol yn ymdrechu i amharu cyn lleied â phosibl ar eich dewis, byddai'n syniad da i chi ofyn am gyngor gan yr Ysgol berthnasol am y dewisiadau modiwl sydd ar gael.
Dysgu ac asesu
Sut y caf fy addysgu?
Byddwch chi’n cael eich dysgu drwy ddarlithoedd, sesiynau labordy, gweithdai rhyngweithiol a thiwtorialau, ac yn ymgysylltu â chwmnïau lleol sydd ynghlwm wrth gynhyrchu therapïau peirianneg meinweoedd ac aildyfu. Bydd y sesiynau hyn yn cael eu harwain gan academyddion o bob rhan o'r Brifysgol, yn ogystal â siaradwyr gwadd ysbrydoledig.
Gan fod y modiwlau a addysgir yn rhai gorfodol, ac yn rhai a fydd o fudd wrth i chi ddatblygu fel ymchwilydd peirianneg meinweoedd, bydd gofyn i chi fynd i bob darlith, sesiwn labordy ac unrhyw weithgaredd arall ar yr amserlen. Er y bydd astudiaeth annibynnol yn rhan sylweddol o gyfnod eich prosiect ymchwil, fe gewch chi’ch cefnogi a’ch goruchwylio ar hyd y ffordd hefyd.
Sut y caf fy asesu?
Rydyn ni’n defnyddio amrywiaeth o ddulliau i asesu ein modiwlau. Mae'r rhain yn cynnwys arholiadau heb lyfrau; cyflwyniad busnes; cyflwyniadau llafar a phoster; aseiniadau ystadegol; cofnodion llyfr nodiadau labordy; a thraethawd hir (dim mwy nag 20,000 o eiriau).
I wneud yn siŵr eich bod yn datblygu ac yn gwella'n barhaus, fe gewch chi adborth ysgrifenedig ar bob asesiad, yn ogystal â chyflwyniadau llafar a phoster a gaiff eu hasesu.
Sut y caf fy nghefnogi?
Fe welwch lawer o ddeunyddiau cwrs defnyddiol ar Dysgu Canolog, a fydd yn ategu eich astudiaethau annibynnol. Fe gewch chi eich goruchwylio yn ystod cyfnod y traethawd hir, a bydd gennych diwtor personol a fydd yn eich cefnogi drwy gydol eich astudiaethau.
Bydd ein Timau Cymorth i Fyfyrwyr penodol hefyd wrth law i'ch cynorthwyo gyda phob agwedd ar fywyd myfyriwr, o iechyd a lles i gynllunio gyrfaol, cyllid a llety.
Pa sgiliau y byddaf yn eu hymarfer a’u datblygu?
Mae Deilliannau Dysgu’r Rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu meithrin. Byddant hefyd yn eich helpu i ddeall yr hyn a ddisgwylir gennych.
O gwblhau eich rhaglen yn llwyddiannus, byddwch yn gallu gwneud y canlynol:
Gwybodaeth a Dealltwriaeth:
- Cymhwyso dealltwriaeth systematig o egwyddorion craidd peirianneg meinweoedd a meddygaeth aildyfu a dull amlddisgyblaethol i ddatblygu technolegau newydd.
- Disgrifio’r newidiadau i gelloedd/meinweoedd sy'n digwydd yn ystod gwahanol gyflyrau clefyd ac wrth i bobl heneiddio.
- Cyfiawnhau nodweddion, dyluniad a chymhwysiad bioddeunyddiau penodol a ddefnyddir mewn peirianneg meinweoedd.
- Dangos y gallu i ddewis technegau ffisegol a biocemegol priodol ar gyfer asesu a datblygu meinweoedd sy’n cael eu peiriannu a chynhyrchion meddygaeth aildyfu.
- Amlinellu’r broses o drosi ymchwil peirianneg meinweoedd a meddygaeth aildyfu o'r labordy i ymarfer clinigol, gan gynnwys agweddau moesegol, rheoleiddiol a masnachol.
Sgiliau Deallusol:
- Gwerthuso'n feirniadol lenyddiaeth wyddonol a dadansoddi data arbrofol sy’n arwain ystod o ddisgyblaethau, fel bioleg bôn-gelloedd, bioddeunyddiau a pheirianneg meinweoedd/organau.
- Meithrin meddwl arloesol a chreadigrwydd wrth ddatblygu dulliau a thechnolegau newydd ym maes peirianneg meinweoedd a meddygaeth aildyfu.
- Dylunio a chynllunio prosiectau ymchwil, gan gynnwys llunio damcaniaethau, dylunio arbrofol, a dulliau methodolegol.
- Dehongli a dadansoddi data arbrofol gan ddefnyddio dulliau ystadegol a chyfrifiadurol priodol.
Sgiliau Ymarferol Proffesiynol:
- Meistroli ystod o dechnegau labordy a chyflawni hyfedredd technegol wrth ddefnyddio offer datblygedig sy'n berthnasol i beirianneg meinweoedd.
- Casglu, gwerthuso, cyfosod a dehongli data ansoddol a meintiol mewn amrywiol ffyrdd; a nodi dulliau o gasglu data newydd pan fo angen.
- Gweithredu mesurau rheoli ansawdd ac arferion labordy da i sicrhau bod canlyniadau arbrofol yn ddibynadwy a bodd modd eu hatgynhyrchu.
- Rheoli prosiect ymchwil yn effeithiol, gan gynnwys rheoli amser, adnoddau a dogfennaeth
- Datblygu strategaeth ar gyfer trosi clinigol a masnacheiddio technolegau peirianneg meinweoedd a meddygaeth aildyfu
Sgiliau Trosglwyddadwy/Allweddol:
- Cymhwyso sgiliau meddwl beirniadol a dadansoddi data i werthuso data gwyddonol, dadleuon a thystiolaeth i wneud penderfyniadau gwybodus.
- Arddangos sgiliau cyfathrebu cryf, yn ysgrifenedig ac ar lafar ar draws cyfryngau amrywiol, gan gynnwys papurau gwyddonol, posteri a chyflwyniadau llafar, i gyflwyno canfyddiadau ymchwil a chydweithio â thimau amlddisgyblaethol yn effeithiol.
- Gweithio'n effeithiol fel rhan o dîm, gan ddangos sgiliau arwain, cydweithio a rhyngbersonol.
- Cofleidio dysgu gydol oes a datblygiad proffesiynol parhaus mewn peirianneg meinweoedd a meddygaeth aildyfu, sy'n faes sy’n datblygu’n gyflym.
Mae graddedigion y rhaglen MSc Peirianneg Meinweoedd a Meddygaeth Adfywiol rydyn ni wedi’u cyflogi wedi perfformio’n rhagorol ac wedi dangos y gallu i addasu yn gyson, gan gyfrannu safbwyntiau newydd a syniadau arloesol i'n prosiectau. Mae eu cefndiroedd academaidd a'u brwdfrydedd dros ddysgu wedi eu galluogi i ymgyfarwyddo â chysyniadau yn Jellagen yn gyflym a rhagori yn eu rolau. Mae’n werth nodi bod eu hysbryd cydweithredol a'u dull rhagweithiol wedi gwella dynameg y tîm yn sylweddol ac wedi ysgogi llwyddiant prosiectau. Rydyn ni’n falch o'u cyflawniadau ac yn edrych ymlaen at weld eu twf parhaus yn ein cwmni!
Ffioedd dysgu ar gyfer dechrau astudio yn 2025
Bydd eich ffioedd dysgu a sut y byddwch yn eu talu yn dibynnu ar eich statws ffioedd. Gallai eich statws ffioedd fod yn statws cartref, ynysoedd neu tramor.
Dysgwch sut rydym yn pederfynu eich statws ffioedd
Ffioedd am statws cartref
| Blwyddyn | Ffioedd Dysgu | Blaendal |
|---|---|---|
| Blwyddyn un | £11,450 | £2,500 |
Myfyrwyr o'r UE, AEE a'r Swistir
Os ydych chi'n wladolyn o'r UE/AEE neu'r Swistir, bydd eich ffioedd dysgu ar gyfer 2025/26 yn unol â'r ffioedd tramor a godir ar fyfyrwyr rhyngwladol, oni bai eich bod yn gymwys i gael statws ffioedd y DU. Mae UKCISA wedi darparu gwybodaeth am Brexit a ffioedd dysgu.
Ffioedd am statws ynys
Dysgwch ragor am ffioedd ol-raddedig i fyfyrwyr o Ynysoedd y Sianel ac Ynys Manaw.
Ffioedd am statws tramor
| Blwyddyn | Ffioedd Dysgu | Blaendal |
|---|---|---|
| Blwyddyn un | £27,450 | £2,500 |
Rhagor o wybodaeth am ffioedd dysgu a blaendaliadau, gan gynnwys ar gyfer myfyrwyr rhan-amser a pharhaus.
Cymorth ariannol
Gallai cymorth ariannol fod ar gael ar gyfer unigolion sy'n bodloni rhai meini prawf. Cewch ragor o wybodaeth yn ein hadran arian. Dim ond hyn a hyn o gymorth ariannol y gall y ffynonellau hyn eu cynnig, felly ni allwn warantu y bydd pawb sy'n bodloni'r meini prawf yn cael arian.
Costau ychwanegol
Nid oes unrhyw gostau ychwanegol y mae angen eu hystyried.
A fydd angen unrhyw gyfarpar penodol arnaf I astudio'r cwrs hwn?
Ni fydd angen unrhyw gyfarpar penodol i astudio ar y rhaglen hon.
Costau byw
Rydym wedi ein lleoli yn un o ddinasoedd mwyaf fforddiadwy y DU. Rhagor o wybodaeth am gostau byw yng Nghaerdydd.
Arian
Gyrfaoedd a lleoliadau gwaith
Bydd y rhaglen hon yn agor cymaint o ddrysau i’ch gyrfa yn y dyfodol, gan eich gwneud yn ymgeisydd hynod gystadleuol i ddarpar gyflogwyr a sefydliadau ymchwil.
Ers sefydlu’r rhaglen yn 2006, mae 95% o’i graddedigion wedi symud ymlaen i lwybrau gyrfaol sy’n berthnasol i beirianneg meinweoedd a meddygaeth adfywiol, boed hynny drwy wneud PhD ym Mhrifysgol Caerdydd neu brifysgolion eraill yn y DU, yr UE ac UDA, mynediad graddedigion at feddygaeth, hyfforddiant i fod yn gofrestrydd arbenigol, addysgu, neu swyddi yn y diwydiant a labordai clinigol.
Lleoliadau
Byddwch chi’n cael cyfle i ymgysylltu â chwmnïau peirianneg meinweoedd a meddygaeth aildyfu lleol. Bydd y sesiynau hyn yn rhoi cipolwg ar waith sy'n cael ei wneud yn y diwydiant i ddarparu datrysiadau peirianneg meinweoedd a meddygaeth aildyfu i gleifion.
Mae graddedigion y rhaglen MSc Peirianneg Meinweoedd a Meddygaeth Adfywiol rydyn ni wedi’u cyflogi wedi perfformio’n rhagorol ac wedi dangos y gallu i addasu yn gyson, gan gyfrannu safbwyntiau newydd a syniadau arloesol i'n prosiectau. Mae eu cefndiroedd academaidd a'u brwdfrydedd dros ddysgu wedi eu galluogi i ymgyfarwyddo â chysyniadau yn Jellagen yn gyflym a rhagori yn eu rolau. Mae’n werth nodi bod eu hysbryd cydweithredol a'u dull rhagweithiol wedi gwella dynameg y tîm yn sylweddol ac wedi ysgogi llwyddiant prosiectau. Rydyn ni’n falch o'u cyflawniadau ac yn edrych ymlaen at weld eu twf parhaus yn ein cwmni!
Camau nesaf
Ymweliadau Diwrnod Agored
Cofrestrwch am wybodaeth am ein dyddiadau sydd i ddod.Gwnewch ymholiad
Cysylltwch â ni am ragor o wybodaeth am y cwrs hwn.Rhyngwladol
Mwy o wybodaeth am ein prifysgol fyd-eang.Rhagor o wybodaeth
Pynciau cysylltiedig: Biomedical sciences, Biosciences, Dentistry
Data HESA: Hawlfraint yr Asiantaeth Ystadegau Addysg Uwch Cyfyngedig 2021. Ni all yr Asiantaeth Ystadegau Addysg Uwch Cyfyngedig dderbyn cyfrifoldeb am unrhyw gasgliadau neu benderfyniadau sy'n deillio o drydydd partïon o'i data. Daw'r data o Arolwg Hynt Graddedigion Diweddaraf 2019/20 a gyhoeddwyd gan HESA ym mis Mehefin 2022.
