Peryglon Amgylcheddol (MSc)

Sut y caf fy addysgu?

Mae gan yr Ysgol Gwyddorau’r Ddaear a’r Môr ddiwylliant ymchwil cryf a gweithredol sy'n llywio ac yn arwain ein haddysgu. Rydyn ni wedi ymrwymo i ddarparu addysgu o'r safon uchaf gan ganiatáu i fyfyrwyr o amrywiaeth o gefndiroedd gyflawni eu potensial.

Gall y dulliau addysgu a ddefnyddiwn amrywio o un modiwl i’r llall. Yn gyffredinol, rydyn ni’n addysgu gan ddefnyddio cymysgedd o ddulliau gan gynnwys darlithoedd, gweithdai grŵp bach, ymarferion labordy ar gyfrifiadur, a theithiau maes. Caiff darlithoedd eu recordio lle bo'n bosibl fel y gallwch wylio ac astudio yn eich amser eich hun.

Bydd gan y rhan fwyaf o'ch modiwlau a addysgir wybodaeth bellach i chi ei hastudio a bydd disgwyl i chi weithio drwy hyn yn eich amser eich hun, yn unol â'r arweiniad gan y darlithydd ar gyfer y modiwl hwnnw.

Sut y caf fy asesu?

Mae'r modiwlau’n cael eu hasesu'n llwyr yn seiliedig ar ystod o wahanol asesiadau gwaith cwrs sy'n cyfuno ymarferion unigol a grŵp. Mae'r gwaith cwrs yn cael ei gydbwyso rhwng gwahanol fathau o asesu, fel cyflwyniadau, asesiadau ysgrifenedig (traethodau ac adroddiadau), ac asesiadau ymarferol yn y labordy.

Adborth:

Gallai adborth ar waith cwrs gael ei roi ar ffurf sylwadau ysgrifenedig, llafar neu dros fideo ar waith a gyflwynir; rhoi atebion ""enghreifftiol"" a/neu drafodaeth mewn sesiynau cyswllt.

Fel arfer, byddwch yn derbyn eich adborth gan arweinydd y modiwl. Os oes gennych gwestiynau am eich adborth, mae arweinwyr modiwlau yn gallu rhoi cyngor ac arweiniad i chi ar eich cynnydd.

Sut y caf fy nghefnogi?

Byddwch yn cael tiwtor personol pan fyddwch yn cofrestru ar y cwrs. Mae tiwtor personol yno i'ch cefnogi yn ystod eich astudiaethau, a gall roi cyngor i chi ar faterion academaidd a phersonol a all fod yn effeithio arnoch. Dylech gael cyfarfodydd rheolaidd â’ch tiwtor personol er mwyn sicrhau eich bod yn cael cefnogaeth lawn.

Ar gyfer eich traethawd hir, byddwn yn neilltuo goruchwyliwr academaidd i chi sydd yno i roi cymorth ac adborth ar sut mae eich gwaith prosiect uwch yn mynd rhagddo. Dylech gadw mewn cysylltiad â'ch goruchwyliwr academaidd yn rheolaidd drwy e-bost a mynychu o leiaf un cyfweliad cynnydd personol ym Mhrifysgol Caerdydd yn ystod cyfnod y traethawd hir.

Cyfleusterau

Rydyn ni’n defnyddio amgylchedd dysgu rhithwir y Brifysgol, Dysgu Canolog, i rannu deunyddiau cwrs, gan gynnwys taflenni, adroddiadau proffesiynol, fideos, delweddau, gwaith darllen pellach a dolenni i asiantaethau'r llywodraeth. Gallwch hefyd ddefnyddio Dysgu Canolog i gyfathrebu a rhannu syniadau â chydfyfyrwyr a thiwtoriaid cwrs mewn cylchoedd trafod. Pan fo'n bosibl, bydd darlithoedd yn cael eu recordio a'u rhannu drwy Dysgu Canolog, er mwyn i chi allu gwylio ac astudio yn eich amser eich hun.

Byddwch yn cael defnyddio'r Llyfrgell Gwyddoniaeth, sy'n cynnwys deunyddiau sy'n gysylltiedig â Gwyddorau'r Ddaear a'r Môr, yn ogystal â llyfrgelloedd eraill y Brifysgol.

Gwasanaethau cefnogi

Mae Prifysgol Caerdydd yn cynnig ystod eang o wasanaethau cymorth sy'n agored i'n myfyrwyr, fel Canolfan y Graddedigion, cwnsela a llesiant, cynghorwyr ariannol a gyrfaoedd, y swyddfa ryngwladol ac Undeb y Myfyrwyr.

Amrywiaeth

Ein nod yw creu amgylchedd cynhwysol, cefnogol a chroesawgar sy'n parchu urddas staff a myfyrwyr o bob oed, ethnigrwydd, anabledd, strwythur teuluol, rhywedd, cenedl, cyfeiriadedd rhywiol, hil, crefydd neu gred arall, a chefndir economaidd-gymdeithasol.

Rydyn ni wedi ymrwymo i egwyddorion Athena SWAN ac rydyn ni wedi ennill statws Efydd.

Pa sgiliau y byddaf yn eu hymarfer a’u datblygu?

Gwybodaeth a Dealltwriaeth:

Ar ôl cwblhau’r cwrs yn llwyddiannus, dylech allu gwneud y canlynol:

• Categoreiddio peryglon amgylcheddol o ran eu prosesau a'u sbardunau sylfaenol.
• Gwerthuso’n feirniadol beth sy’n achosi ac yn effeithio ar fod yn agored i risg amgylcheddol.
• Datblygu diffiniad gweithredol o wydnwch i ymdopi â pheryglon amgylcheddol byd-eang.
• Arfarnu risgiau peryglon amgylcheddol cymhleth.

Sgiliau Deallusol:

Ar ôl cwblhau’r cwrs yn llwyddiannus, dylech allu gwneud y canlynol:

• Profi modelau penderfyniadol a thebygoliaethol peryglon amgylcheddol.
• Gwerthuso problemau peryglon amgylcheddol yn feirniadol, gan eu dadansoddi’n wrthrychol a datblygu atebion priodol, creadigol.
• Crynhoi ac asesu data a theori peryglon cymhleth yn feirniadol er mwyn rhagweld risg yn y dyfodol.

Sgiliau Ymarferol Proffesiynol:

Ar ôl cwblhau’r cwrs yn llwyddiannus, dylech allu gwneud y canlynol:

• Dylunio asesiadau risg ar gyfer peryglon amgylcheddol.
• Ymdrin â'r ystod o ddata sydd ei angen i asesu peryglon amgylcheddol yn feirniadol a gallu ymgorffori'r rhain mewn astudiaethau achos penodol.
• Paratoi i fynd ar drywydd cyfleoedd ar gyfer datblygu gyrfa a dysgu gydol oes a gwerthfawrogi effeithiau posibl newid byd-eang.

Sgiliau Trosglwyddadwy/Allweddol:

Ar ôl cwblhau’r cwrs yn llwyddiannus, dylech allu gwneud y canlynol:

• Creu dadansoddiad gan ddefnyddio modelau penderfyniadol a thebygoliaethol cymhleth.
• Gwerthuso llenyddiaeth yn feirniadol er mwyn cyfleu syniadau, egwyddorion a theorïau yn effeithiol ar lafar, yn ysgrifenedig ac ar ffurf electronig.
• Gweithio'n effeithiol fel aelod o dîm neu arweinydd mewn tîm ac fel unigolyn, gan feithrin mentergarwch, cyfrifoldeb personol a gwneud penderfyniadau mewn sefyllfaoedd cymhleth ac anrhagweladwy.
• Ymdrin ag ystod o fethodolegau synhwyro o bell.