Graddau arbenigol

Mae ymchwil ym maes cyfrifiadureg yn cael effaith gymdeithasol sylweddol ac uniongyrchol, sy’n gwneud addysg ôl-raddedig yn y ddisgyblaeth hon yn ddewis ysbrydoledig.

Yn y farchnad fyd-eang hynod gystadleuol sydd ohoni, gall ein graddau arbenigol eich rhoi ben ac ysgwydd uwchben ymgeiswyr eraill, gan y byddwch chi wedi dysgu’r wybodaeth arbenigol a’r sgiliau technegol y mae cyflogwyr yn chwilio amdanyn nhw.

Mae nifer o’n rhaglenni ôl-raddedig yn rhoi’r opsiwn i chi ymgymryd â lleoliad gwaith 7-12 mis o hyd i’ch helpu i sicrhau mantais gystadleuol. Bydd y profiad ymarferol hwn nid yn unig yn rhoi hwb i’ch hyder, ond hefyd yn eich helpu i ddatblygu eich rhwydweithiau proffesiynol. Bydd hefyd yn rhoi’r cyfle i chi ddefnyddio eich sgiliau newydd yn y byd go iawn.

Gall addysg ôl-raddedig eich paratoi i astudio ar gyfer PhD neu ymuno â’r gweithlu, lle gallech chi gwrdd â chyn-fyfyrwyr sy’n gweithio ym meysydd datblygu meddalwedd, seiberddiogelwch a rhaglennu ar draws ystod o ddiwydiannau.

Cyfrifiadureg Uwch (MSc)

Mae’r rhaglen flaenllaw hon ar gyfer graddedigion ym maes cyfrifiadura sydd am amlygu eu hunain ymhellach drwy ddod yn feistr yn y maes.

Mae ein hamrywiaeth eang o fodiwlau dewisol sy’n cael eu harwain gan ymchwil yn rhoi'r rhyddid i chi greu eich portffolio unigryw eich hun o sgiliau, gan gynnwys arbenigo mewn meysydd fel systemau cymhleth, cyfrifiadura gweledol a pheirianneg data a gwybodaeth. Datblygwch eich sgiliau datrys problemau ymhellach drwy astudio paradeimau ac ieithoedd rhaglennu uwch.

Ewch ati i ysgrifennu traethawd hir unigol gyda chefnogaeth ein harbenigwyr academaidd a chwblhau prosiect ymchwil mawr y gallwch chi ei nodi ar eich CV.

Peirianneg Meddalwedd

Mae’r rhaglen hon ar gyfer graddedigion o gefndiroedd amrywiol sydd â rhywfaint o brofiad o raglennu, a hynny er mwyn rhoi’r sgiliau, y wybodaeth a’r profiad ymarferol sydd eu hangen arnyn nhw i fod yn effeithiol yn beirianyddion meddalwedd fasnachol. Byddwch chi’n datblygu’n ymarferol gan ddefnyddio offer a thechnegau masnachol arloesol ac yn ymwneud yn uniongyrchol â’r diwydiant mewn amgylchedd masnachol dynamig. Mae'r rhaglen 1-flwyddyn hon yn cael ei chyflwyno yn yr Academi Meddalwedd Genedlaethol.

Seiberddiogelwch (MSc)

Mewn byd sy’n fwyfwy rhwydweithiol, mae risgiau seiber ar frig agendâu busnesau byd-eang. Mae prinder ymarferwyr medrus ym maes seiberddiogelwch ledled y byd yn golygu bod galw mawr am raddedigion sy’n deall y technolegau a’r arferion sy’n sail i systemau diogelwch.

Mae'r rhaglen hon, a ddatblygwyd gyda chymorth amrywiaeth o sefydliadau, yn cynnig cymysgedd o gyd-destun busnes a materion diogelwch, ymddiriedaeth a phreifatrwydd craidd sy'n herio'r sector TG.

Yn ein Labordy Seiberddiogelwch a Fforenseg, byddwch chi’n gallu ymchwilio i’r prif fygythiadau diogelwch sy’n wynebu gweithwyr proffesiynol heddiw drwy wneud arbrofion ar ymosodiadau go iawn mewn senarios yn y byd go iawn.

Deallusrwydd Artiffisial (MSc)

Mae deallusrwydd artiffisial yn bwnc llosg ym maes cyfrifiadureg ac yn y gymdeithas ehangach. Mae’n dod yn fwyfwy amlwg yn ein bywydau bob dydd. Mae’n cael ei defnyddio mewn amrywiaeth o ddiwydiannau a meysydd ymchwil o’r radd flaenaf, fel canfod twyll, dadansoddi fforensig a chefnogi penderfyniadau meddygol.

Ar ein rhaglen newydd sbon, sydd wedi’i chyd-gynllunio gan ymchwilwyr blaenllaw yn y maes, byddwch chi’n ymchwilio i effeithiau moesegol a chymdeithasol deallusrwydd artiffisial a phynciau allweddol sy’n ysgogi tueddiadau a datblygiadau technolegol. Ymhlith y pynciau hyn mae dysgu peiriannol, rhesymu awtomataidd a chynrychioli gwybodaeth.

Byddwch chi’n astudio mewn lleoliad unigryw, wedi'i lywio gan yr ymchwil ddiweddaraf yn y maes, gan ddefnyddio setiau data a phroblemau yn y byd go iawn i ddatblygu barn feirniadol, uniondeb deallusol a sgiliau ymarferol y mae galw mawr amdanyn nhw.

Prosesu Iaith Naturiol (MSc)

Mae’r rhaglen hon, a gynlluniwyd gan arbenigwyr blaenllaw a byd-enwog yn y maes, yn datblygu set unigryw o sgiliau sy’n werthfawr mewn amrywiaeth o sectorau diwydiannol a/neu sy’n ddelfrydol ar gyfer gyrfa ymchwil ym maes deallusrwydd artiffisial.

Estyniad arbenigol i ddeallusrwydd artiffisial yw prosesu iaith naturiol. Mae’n ymdrin â’r data testun sy’n allweddol i gyfathrebu yn y 21ain ganrif. Mae'r rhaglen – sy’n cynnwys pedwar modiwl craidd, wyth modiwl opsiynol a thraethawd hir i orffen – yn cael ei chyflwyno mewn lleoliad unigryw gan ddefnyddio setiau data a phroblemau go iawn, lle bydd y myfyrwyr yn elwa o fewnbwn y diwydiant. Byddwch chi’n datblygu gallu technegol yn ogystal â dealltwriaeth feirniadol o effeithiau moesegol a chymdeithasol delio â data testun.