Meithrin sgiliau Cymru ar gyfer y dyfodol
A ninnau’n brifysgol fwyaf Cymru, byddwn yn croesawu ein rôl i gefnogi adferiad a arweinir gan sgiliau os bydd dirwasgiad ar ôl COVID-19.
Ar gyfer pobl ifanc
Rydym yn sicrhau bod pobl ifanc yn cael pob cyfle i wireddu eu potensial waeth beth fo'u hamgylchiadau neu eu cefndir. Mae ein rhaglenni ehangu cyfranogiad ac allgymorth cymunedol yn canolbwyntio’n benodol ar y rheiny a dangynrychiolir mewn addysg uwch ac unigolion sydd wedi profi anfantais neu darfu addysgol. Rydym yn chwalu'r rhwystrau i addysg uwch ac yn cefnogi pobl ifanc trwy gydol eu taith addysgol.
Rydym yn gweithio'n agos gydag ysgolion a cholegau ledled Cymru i gefnogi pobl ifanc trwy gynnig llawer o adnoddau a gweithgareddau addysgol rhad ac am ddim i athrawon, ysgolion a cholegau mewn ystod o bynciau. Yn y cyfamser, mae ein Menter Llywodraethwyr Ysgol yn annog ac yn cefnogi staff prifysgolion ac aelodau o'n cynfyfyrwyr i gyfrannu eu sgiliau a'u harbenigedd i ysgolion trwy fod yn Llywodraethwyr Ysgol.
Ar gyfer oedolion
Mae ein rhaglen Cymraeg i Oedolion wedi’i chynnal ers dros 30 mlynedd, gan elwa ar ddysgwyr Cymraeg yn y gymuned yn ogystal â’n staff a’n myfyrwyr ein hunain.
Rydym yn cynnig ystod o raglenni astudio hyblyg yn ogystal â chyrsiau Datblygiad Proffesiynol Parhaus byr, gan gynnwys cyrsiau ar-lein rhad ac am ddim, i ddatblygu sgiliau. Mae rhai cyrsiau wedi’u cynllunio ar gyfer pobl mewn meysydd proffesiynol penodol, tra bod eraill yn ymdrin â sgiliau mwy cyffredinol a fydd yn werthfawr i ystod eang o bobl a chyflogwyr.
Rydym yn cynnig ystod eang o weithgareddau ac adnoddau i ysgolion a cholegau yng Nghymru sy’n codi dyheadau, cefnogi’r cwricwlwm ac yn ennyn chwilfrydedd yn ogystal â chefnogi datblygiad proffesiynol athrawon.