Iaith ac Ieithyddiaeth (MA)

Sut y caf fy addysgu?

Yn ystod y cam a addysgir, byddwch yn cael eich addysgu'n bennaf drwy seminarau / gweithdai wythnosol, lle cewch gyfle i ddatblygu dealltwriaeth o bynciau penodol sy'n ymwneud ag iaith ac ieithyddiaeth. Byddwch yn gallu trafod cysyniadau a syniadau mewn grwpiau bach a thrafodaethau dosbarth agored, i atgyfnerthu a chael adborth ar eich dysgu unigol, yn ogystal â datblygu sgiliau cyfathrebu mewn trafodaethau grŵp anffurfiol a chyflwyniadau llafar. Yn dibynnu ar eich profiad blaenorol, efallai y cewch eich annog i fynychu'r darlithoedd ar gyfer gwahanol fodiwlau israddedig hefyd. Byddwch yn cael eich addysgu drwy sesiynau goruchwylio bob wythnos neu bob pythefnos mewn Profiad Ymchwil. Bydd y rhain yn gyfle i chi ddysgu sgiliau ymchwil ymarferol mewn ffordd strwythuredig ond annibynnol. Bydd yr addysgu'n amrywiol ac yn ymatebol.

Mae pob modiwl o fewn yr MA mewn Iaith ac Ieithyddiaeth yn defnyddio amgylchedd dysgu rhithwir y Brifysgol, Dysgu Canolog, yn helaeth. Yma, gallwch gael mynediad at fforymau trafod a dod o hyd i ddeunyddiau cwrs.

Yn ystod y cam traethawd hir, byddwch yn cynnal ymchwil annibynnol ar bwnc o'ch dewis, a bydd aelod o staff yn eich goruchwylio’n rheolaidd.

Sut y caf fy asesu?

Mae'r modiwlau a addysgir yn y rhaglen hon yn cael eu hasesu drwy amrywiaeth o ddulliau, gan gynnwys traethodau academaidd, dadansoddiadau ieithyddol, adroddiadau dadansoddol, prosiectau ymchwil a chyflwyniadau llafar. Nodir ffurf(au) asesu modiwlau unigol yn y disgrifiad o’r modiwl perthnasol. Caiff modiwlau eu hasesu ar sail disgrifiadau dadansoddol o destunau neu gyfryngau eraill a/neu draethodau disgyrsiol. Yn aml, byddwch yn cael eich annog i ddewis eich testunau eich hun i'w dadansoddi, neu i gasglu data gwreiddiol, ac i gysylltu eich dadansoddiadau â meysydd o ddiddordeb personol.

Wrth asesu, rhoddir pwyslais ar soffistigeiddrwydd beirniadol a chysyniadol yn ogystal ag ar gynhyrchu traethodau clir, argyhoeddiadol ac ysgolheigaidd wedi’u cyflwyno mewn modd proffesiynol ac ar amser.

Fe'ch anogir i ymgynghori ag arweinydd y modiwl perthnasol i drafod y prif syniadau a'r cynllun ar gyfer eich aseiniadau.??

Sut y caf fy nghefnogi?

Cewch diwtor personol, a fydd yn eich helpu i fyfyrio ar eich perfformiad ar y cwrs a’ch cynghori ar dechnegau astudio, dewis modiwlau a chynllunio gyrfa (ar y cyd â Gwasanaeth Gyrfaoedd y Brifysgol). Eich tiwtor personol fydd y pwynt cyswllt cyntaf i chi hefyd os ydych chi’n cael unrhyw anawsterau. Bob semester, byddwch yn cael Cyfarfod Cynnydd a Datblygiad Personol Academaidd wedi'i drefnu gyda'ch tiwtor personol, lle trafodir eich dyheadau gyrfa, eich cryfderau a'ch gwendidau. Yma hefyd y bydd strategaethau pendant yn cael eu datblygu i'ch helpu i gyrraedd eich potensial academaidd a phroffesiynol llawn.

Bydd cynullydd y rhaglen ar gyfer yr MA mewn Iaith ac Ieithyddiaeth yn bwynt cyswllt ar gyfer trafod unrhyw broblemau sy'n codi yn ystod y cwrs. Gallwch gael trafodaethau un-i-un â chynullydd y rhaglen neu'ch tiwtor personol yn ystod oriau swyddfa penodol yn ystod wythnosau addysgu. Mae croeso i chi gysylltu â ni dros ebost hefyd.

Yn ogystal â chynullydd y rhaglen a'ch tiwtor personol, mae gan yr Ysgol nifer o staff academaidd a gweinyddol eraill sydd yno i'ch cefnogi:

• mae'r Swyddog Cyflogadwyedd, Interniaethau a Lleoliadau yn sicrhau bod unrhyw brofiad gwaith a chyfleoedd lleoliad yn cael eu hysbysebu i bob myfyriwr a gall eich helpu gyda chwestiynau penodol am gyflogadwyedd;
• mae’r Swyddog Anabledd ac Amrywiaeth yn sicrhau bod addasiadau rhesymol yn cael eu gwneud ar gyfer myfyrwyr gydag anableddau;
• mae'r Tiwtor Cymorth Sgiliau Ysgrifennu yn cynnig cymorth un-i-un gydag ysgrifennu ar gyfer myfyrwyr rhyngwladol a myfyrwyr y DU;
• mae'r Llyfrgellydd Arbenigol ar gyfer Iaith ac Ieithyddiaeth yn cynnig help a chyngor i ddod o hyd i lyfrau a deunyddiau eraill yn y meysydd

Mae tîm Gwasanaethau Proffesiynol Prifysgol Caerdydd hefyd ar gael i roi cyngor a chymorth.

Adborth Ffurfiannol

Mae adborth ffurfiannol yn adborth nad yw'n cyfrannu at gynnydd na phenderfyniadau dosbarthiad gradd. Nod adborth ffurfiannol yw gwella eich dealltwriaeth a'ch dysgu cyn i chi gwblhau eich asesiad crynodol. Yn fwy penodol, mae adborth ffurfiannol yn eich helpu i wneud y canlynol:

• canfod eich cryfderau a’ch gwendidau a thargedu meysydd y mae angen gweithio arnyn nhw.
• helpu staff i’ch cefnogi a rhoi sylw i'r problemau a ganfuwyd, gyda strategaethau wedi'u targedu ar gyfer gwella.

Cynigir adborth ffurfiannol ar gyfer pob modiwl, ar ffurf trafodaethau yn yr ystafell ddosbarth, gweithgareddau a thasgau gwaith cartref (i gefnogi dysgu’r myfyrwyr). Mae pob modiwl a gynigir ar y rhaglen yn cynnwys hyfforddiant wyneb yn wyneb, o fath seminar (yn aml mewn grwpiau bach), sy'n rhoi cyfleoedd i'r myfyrwyr drafod ac egluro syniadau, a chael adborth ffurfiannol gan arweinwyr modiwlau a darlithwyr. Mae natur a strwythur penodol yr adborth ffurfiannol hwn braidd yn amrywiol, yn dibynnu ar y pwnc a’r hyn y mae’r modiwl / sesiwn unigol yn canolbwyntio arno.

Adborth Crynodol

Adborth crynodol yw adborth sy'n cyfrannu at gynnydd neu benderfyniadau dosbarthiad gradd. Nod asesiad crynodol yw nodi pa mor dda rydych chi wedi llwyddo i fodloni deilliannau dysgu bwriadedig Modiwl a bydd yn eich galluogi i nodi unrhyw gamau sydd eu hangen er mwyn gwella. Dylai'r holl adborth gysylltu'n uniongyrchol â meini prawf graddio / asesu'r modiwl.

Cynigir adborth crynodol ar yr holl waith a aseswyd ar ffurf sylwadau a chyngor ar y daflen adborth ar wahân. Mae adborth yn cael ei ddarparu mewn perthynas â'r meini prawf asesu sy'n cael eu dosbarthu i fyfyrwyr drwy waith papur rhaglenni a modiwlau. Fe'ch anogir yn benodol i drafod eich adborth ar eich gwaith a aseswyd ag arweinydd y modiwl a'ch tiwtor personol er mwyn myfyrio ar eich dysgu a mynegi meysydd i'w gwella mor glir â phosibl.

Pa sgiliau y byddaf yn eu hymarfer a’u datblygu?

Ar ôl cwblhau'r Rhaglen, byddwch yn gallu:

• dadansoddi a thrafod meysydd craidd iaith ac ieithyddiaeth Saesneg, gan gynnwys seineg, gramadeg, semanteg, pragmateg a dadansoddi disgwrs
.
• nodi a dehongli ystod o ffenomenau ieithyddol empirig a defnyddio'r derminoleg ddisgrifiadol berthnasol
• dadansoddi ac asesu sut mae gwahanol gyd-destunau cymdeithasol a diwylliannol yn effeithio ar natur iaith ac ystyr
• gwerthuso syniadau, dadleuon ac ymchwil empirig mewn iaith ac ieithyddiaeth
• trafod gwybodaeth a syniadau yn glir ac yn gydlynol mewn fformatau ysgrifenedig a llafar
• myfyrio ac ymholi’n annibynnol a / neu weithio'n effeithiol mewn tîm
• casglu, gwerthuso, cyfuno a dehongli data ieithyddol ansoddol a / neu feintiol
• gwerthuso effaith defnyddio iaith mewn cyd-destun penodol.
• cynnal dadl feirniadol sy'n ymateb i gonfensiynau penodol y genre.