Ymarfer Cyfreithiol (PgDip)

Sut y caf fy addysgu?

Mae'r rhaglen ran-amser yn cael ei haddysgu ar ddydd Gwener. (Fodd bynnag, mae'r Cwrs Sylfaen yn yr wythnos gyntaf yn gwrs dau ddiwrnod ar ddydd Llun a dydd Mawrth. Hefyd, efallai na fydd asesiadau cwrs wedi'u trefnu ar gyfer dydd Gwener.)

Mae’r addysgu’n digwydd mewn gwersi i grwpiau mawr a bach. Mae grwpiau mawr ar ffurf darlithoedd i bob myfyriwr ac mae pob grŵp mawr yn para awr. Yn y Cwrs Sylfaen cyflwynir gwersi grŵp mawr yn fyw ac maen nhw wedi cael eu hamserlennu. Ond ar ôl hynny, ni fydd myfyrwyr rhan-amser yn mynd i ddarlithoedd byw. Yn hytrach, byddant yn cael gafael ar recordiadau o'r darlithoedd ar-lein, ar amgylchedd dysgu rhithwir y Brifysgol, sef Dysgu Canolog.

Bydd addysgu grŵp bach yn cael ei drefnu mewn grwpiau o hyd at 16-18 o fyfyrwyr er y gallech gael eich trefnu'n grwpiau llai ar gyfer rhai gwersi. Fel arfer, trefnir bod gwersi grwpiau bach yn cael eu cynnal am ddwy awr, er y gall rhai bara dwy awr a hanner neu dair awr. Mae mynd i sesiynau grŵp bach yn orfodol.

Nodwedd nodedig o’r LPC yw y bydd eich cynnwys chi mewn cyflawni Sgiliau’r Cwrs yn llunio rhan sylweddol o’r amser sy’n cael ei neilltuo i ymarfer yr ystafell dosbarth.

Sut y caf fy asesu?

Mae'r asesiadau LPC wedi'u cynllunio i fod yn deg, yn drylwyr, yn realistig, gan roi digon o sylw manwl a/neu eang i'r sgiliau a'r pynciau a asesir. Bydd asesiadau unigol yn cynnwys cynrychiolaeth o'r deilliannau yn y maes pwnc neu sgiliau penodol. Bydd yna bob amser bwyslais ar yr elfen ymarferol.

Mae asesiadau ffurfiannol ar gyfer pob un o bynciau a sgiliau Cam un. Mae'r asesiadau ffurfiannol hyn yn eich helpu i addasu i ofynion gwahanol yr asesiadau ar gwrs galwedigaethol, yn hytrach na chwrs academaidd.

Mae 14 o asesiadau crynodol, sy'n asesu pob un o bynciau a sgiliau gorfodol Cam un a'r tri modiwl galwedigaethol dewisol. Mae pob asesiad yn cael ei oruchwylio, ac eithrio'r asesiad mewn Ymchwil Gyfreithiol Ymarferol, sydd ar ffurf gwaith cwrs ysgrifenedig.

Mae'r rhan fwyaf o'r asesiadau dan oruchwyliaeth yn arholiadau ysgrifenedig llyfr agored ond mae asesiadau sgiliau llafar dan oruchwyliaeth mewn Eiriolaeth, Cyfweld a Chynghori ac Ewyllysiau a Gweinyddu Ystadau.

Sut y caf fy nghefnogi?

Defnyddir e-ddysgu i gefnogi eich dysgu; cefnogir pob modiwl gan Dysgu Canolog, sef amgylchedd dysgu rhithwir sydd ar gael ar ac oddi ar y campws, lle byddwch yn gallu cael gafael ar ystod eang o ddeunyddiau ar gyfer eich modiwlau. Rydyn ni’n darparu'r rhan fwyaf o'r deunyddiau gwersi ar ffurf electronig yn ogystal â chopïau caled. Rydyn ni hefyd yn sicrhau bod recordiadau o sesiynau grŵp mawr ar gael drwy Dysgu Canolog.

Byddwch yn derbyn cymorth bugeiliol penodol drwy ein cynllun tiwtor personol. Rydyn ni’n cynnig rhaglen helaeth o ddarlithoedd a gweithdai gyrfaoedd gyda Chynghorydd Gyrfaoedd arbenigol. Mae'r gweithgareddau Gyrfaoedd fel arfer wedi'u trefnu ar ddydd Iau, nid ar ddydd Gwener, ond bydd recordiadau o'r cyflwyniadau ar gael i fyfyrwyr rhan-amser ar Dysgu Canolog.

Mae Swyddog Anabledd ac Amrywiaeth dynodedig yn sicrhau bod addasiadau rhesymol yn cael eu gwneud ar gyfer myfyrwyr ag anableddau. Hefyd, mae gan y Brifysgol amrywiaeth o wasanaethau i'ch cefnogi, gan gynnwys y Gwasanaeth Gyrfaoedd, y Gwasanaeth Cwnsela, y Gwasanaeth Anabledd a Dyslecsia, y Gwasanaeth Cymorth i Fyfyrwyr a llyfrgelloedd rhagorol gyda llyfrgellwyr y gyfraith arbenigol a chanolfannau adnoddau.

Adborth

Ystyrir bod adborth yn flaenoriaeth a'i fwriad yw codi eich lefelau cymhwysedd. Byddwch yn cael asesiadau ffurfiannol yn y pynciau Cam un ac adborth cynhwysfawr ar yr asesiadau ffurfiannol hynny, i'ch helpu i baratoi ar gyfer yr asesiadau crynodol. Byddwch yn cael adborth ar gyfer pob ymarfer sgiliau llafar. Byddwch hefyd yn cael adborth gan eich tiwtor yn y sesiynau grŵp bach wrth i'r cwrs fynd yn ei flaen ac adborth gan eich cydfyfyrwyr.

Pa sgiliau y byddaf yn eu hymarfer a’u datblygu?

Yn unol â'r cwricwlwm, byddwch yn datblygu eich gallu i ddysgu’n annibynnol a datblygu sgiliau gweithio mewn tîm. Datblygir sgiliau cyfathrebu mewn grwpiau bach, lle bydd gofyn i chi gydweithio ar broblemau a thasgau. Mae'r cwrs yn canolbwyntio ar ddefnyddio gwybodaeth gyfreithiol mewn sefyllfaoedd ffeithiol ffug, rhoi cyngor i'r cleient a chyflawni tasgau yn unol â chyfarwyddiadau'r cleient.

Mae'r LPC yn gwrs ymarferol ac mae angen i chi ddadansoddi'r ffeithiau i nodi'r materion perthnasol y mae’r cleient angen cyngor arnyn nhw; nodi'r gyfraith a'r weithdrefn berthnasol; cymhwyso'r gyfraith a'r weithdrefn berthnasol i'r ffeithiau perthnasol a chynghori'r cleient, yn glir ac yn llawn, gan ystyried rheolau ymddygiad proffesiynol ac anghenion masnachol a busnes y cleient.

Ochr yn ochr â'r cwricwlwm, cewch gyfle i ddatblygu sgiliau cyflogadwyedd ehangach drwy gymryd rhan yng nghynlluniau pro-bono y Gyfraith ar Waith yr ysgol, sy'n cael eu rhedeg ar y cyd â sefydliadau partner, lle mae gwirfoddolwyr sy'n fyfyrwyr yn cynorthwyo pobl go iawn wrth ymwneud â'r gyfraith. Dyma enghreifftiau o'r cynlluniau sydd ar gael i fyfyrwyr ar hyn o bryd:

• Y Gyfraith mewn Cyfiawnder: Prosiect Dieuogrwydd (sy'n ymdrin ag achosion honedig o gamweinyddu cyfiawnder);
• Y Gyfraith mewn Gofal Iechyd: Cynllun Gofal Iechyd Parhaus y GIG (helpu teuluoedd i hawlio ffioedd cartrefi gofal yn ôl y gellid dadlau y dylai'r GIG fod wedi'u talu);
• Y Gyfraith mewn Chwaraeon: Prosiect Rygbi'r Undeb (darparu cyngor cyfreithiol a chylchlythyrau cyfreithiol i glybiau rygbi);
• Y Gyfraith ac Iechyd Meddwl: Cynllun Oedolion Priodol Hafal (mae myfyrwyr yn cael eu hyfforddi i gefnogi oedolion sy'n agored i niwed sy'n cael eu cyfweld ar ôl cael eu harestio).

Mae gweithgareddau eraill yn cynnwys cystadlaethau ymryson, negodi a chyfweld cleientiaid.