Cyflyrau Seicolegol Plant (MSc)

Sut y caf fy addysgu?

Defnyddir ystod amrywiol o ddulliau addysgu a dysgu trwy gydol ein rhaglen. Byddwch yn mynychu darlithoedd ac yn cymryd rhan mewn seminarau, clybiau cyfnodolion a thiwtorialau. Byddwch yn cael cryn dipyn o brofiad ymarferol (caffael a dadansoddi data) mewn amrywiol weithdai/arddangosiadau. Gallai hyn gynnwys cyfweld clinigol, olrhain llygaid, codio arsylwadol, gweithrediad gweithredol a phrofi gallu llafar. Yn y semester olaf, byddwch yn ymgymryd â phrosiect ymchwil mawr, y traethawd hir, ynghyd ag arbenigwr ym maes addysg neu seicoleg ddatblygiadol.

Yn ogystal â'r dosbarthiadau MSc, bydd disgwyl i chi fynychu seminarau ymchwil yng Nghanolfan Gwyddoniaeth Datblygiad Dynol Prifysgol Caerdydd, lle mae'r rhaglen wedi'i lleoli, a seminarau ymchwil yr Ysgol Seicoleg. Mae'r seminarau hyn yn eich amlygu i ymchwil arloesol a materion ymarferol perthnasol.

Sut y caf fy asesu?

Mae'r asesiadau'n cynnwys arholiadau, aseiniadau ysgrifenedig a'r traethawd hir. Mae'r strategaeth asesu hon yn sicrhau y gallwch ddefnyddio'r sgiliau a'r wybodaeth a gafwyd i lywio'ch gwaith ymarferol a hefyd defnyddio eich profiad yn ymarferol i werthuso'ch gwybodaeth yn feirniadol. 

Sut y caf fy nghefnogi?

Bydd tiwtor personol yn cael ei neilltuo i chi, a fydd yn un o arweinwyr y modiwl ar y cwrs. Bydd y tiwtor hwn ar gael i ddarparu gofal bugeiliol a chyngor cyffredinol a bydd hefyd yn gyfrifol am fonitro eich cynnydd academaidd. 

Mae’r Brifysgol yn cynnig amrywiaeth o wasanaethau sy’n cynnwys y Gwasanaeth Gyrfaoedd, y Gwasanaeth Cwnsela, y Gwasanaeth Anabledd a Dyslecsia, y Gwasanaeth Cymorth i Fyfyrwyr, a llyfrgelloedd a chanolfannau adnoddau ardderchog.

Byddwn hefyd yn rhoi cymorth academaidd priodol i chi drwy adborth. Prif bwrpas adborth yw darparu gwybodaeth werthusol i'ch helpu i ddeall cryfderau a gwendidau eich gwaith a sut y gallwch wella ymhellach – nid i ddarparu ateb enghreifftiol diffiniol. Felly mae adborth yn bwysig yng nghyd-destun gwella ac ymestyn eich sgiliau gwybyddol. Hefyd, bwriedir iddo ategu’ch datblygiad fel dysgwyr annibynnol. Byddwch yn cael adborth ar eich cynnydd academaidd mewn sawl ffordd trwy gydol eich astudiaethau: er enghraifft, yn ystod goruchwyliaeth eich prosiect neu ddosbarthiadau ymarferol, sesiynau tiwtorial a seminarau, ac yn ystod sesiynau holi ac ateb gyda darlithwyr. Byddwch hefyd yn derbyn sylwadau ysgrifenedig ar y gwaith cwrs rydych chi'n ei gyflwyno ac yn cael digon o gyfleoedd i drafod materion gyda staff addysgu. Byddwn yn eich annog i ddefnyddio pob cyfle i ryngweithio â staff yn y modd hwn. Byddwch yn derbyn adborth generig manwl ar arholiadau trwy ddadansoddiadau ysgrifenedig o atebion myfyrwyr fesul cwestiwn, ynghyd â dadansoddiad o'ch marciau.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu meithrin. Byddant hefyd yn eich helpu i ddeall yr hyn a ddisgwylir gennych.

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Dangos gwybodaeth systematig a dealltwriaeth feirniadol o ddamcaniaethau sydd ar flaen y gad o ran seicoleg ddatblygiadol a seicopatholeg.
• Cysylltu gwybodaeth gynhwysfawr a dealltwriaeth feirniadol o berthnasedd a chyfyngiadau ymarfer proffesiynol sydd ar flaen y gad o ran seicoleg ddatblygiadol a seicopatholeg.
• Dangos gwybodaeth arbenigol am ymchwil allweddol, gan gynnwys dulliau meintiol ac ansoddol, materion moesegol, offer digidol a technegau ystadegol priodol, i ymchwiliadau mewn seicoleg ddatblygiadol a seicopatholeg.

Sgiliau Deallusol:

• Cymhwyso a gwerthuso ystod o dechnegau ymchwil a phroffesiynol wrth ddatblygu prosiect ymchwil annibynnol.
• Datblygu a mynegi dealltwriaeth ymarferol ac ymwybyddiaeth feirniadol o sut y defnyddir technegau ymchwil sefydledig i greu a dehongli gwybodaeth mewn lleoliadau ymarferol.
• Dylunio astudiaethau, dadansoddi data, dehongli canfyddiadau, a chynhyrchu awgrymiadau gwreiddiol ar gyfer gwell theori ac ymarfer proffesiynol.

Sgiliau Ymarferol Proffesiynol:

• Cyfleu’n systematig y gwaith o gymhwyso egwyddorion ac ymarfer moesegol arbenigol i seicoleg ddatblygiadol ac ymchwil seicopatholeg.
• Casglu, storio a defnyddio data yn effeithiol mewn ymchwil ac ymarfer seicolegol, a dangos gwerthfawrogiad beirniadol o wahanol dechnegau ar gyfer gwneud hynny.
• Cyfleu syniadau seicolegol a seicopatholegol cymhleth a'u gwerthusiad yn glir, gan ddefnyddio fformatau ysgrifenedig a digidol, wrth ystyried amrywiaeth a goblygiadau moesegol.

Sgiliau Trosglwyddadwy/Allweddol:

• Casglu gwybodaeth a chynhyrchu syniadau’n annibynnol, gan gynnwys defnyddio ystod o offer digidol, gan gynnwys cronfeydd data cyfeirio, taenlenni, a phrosesu geiriau, i gyfleu gwybodaeth yn glir ac yn briodol, gydag ymwybyddiaeth o’r gynulleidfa.
• Cyfrannu at waith tîm mewn amrywiaeth o sefyllfaoedd gyda'r sgiliau angenrheidiol ar gyfer cydweithio, gan ddangos sensitifrwydd i ffactorau rhyngbersonol a chyd-destunol.
• Myfyrio ar gryfderau a gwendidau personol ar gyfer datblygiad parhaus.