Ieithoedd modern a chyfieithu

Pam astudio gyda ni?

Gydag enw da rhyngwladol am ragoriaeth mewn ymchwil ac addysgu, mae yma amgylchedd cyffrous a rhyngddisgyblaethol sy'n cynnig cyfle i fyfyrwyr fynd ar drywydd eu diddordeb mewn ieithoedd a diwylliant.

Ennill profiad hanfodol

Gallwch ddod yn fentor myfyrwyr gyda’n Cynllun Mentora Myfyrwyr Ieithoedd Tramor Modern neu fel llysgennad iaith dros Lwybrau at Ieithoedd Cymru.

Rhagoriaeth ymchwil

Yn 9fed ar gyfer effaith ein hymchwil ac yn 11eg ar gyfer ein hamgylchedd ymchwil (Ieithoedd Modern ac Ieithyddiaeth, REF 2021).

Cymuned amrywiol

Rydym yn denu ystod eang o fyfyrwyr rhyngwladol ac o’r DU bob blwyddyn sy'n ffynnu yn ein hamgylchedd ôl-raddedig amrywiol.

Astudiaethau Cyfieithu (MA)

Amser llawn, Rhan amser

Fe gewch chi hyfforddiant craidd o ran theori ac ymarfer cyfieithu a gweithio trwy gyfrwng iaith sy’n addas i chi.

Diwylliannau Byd-eang (MA)

Amser llawn

Datblygwch eich gwybodaeth a’ch dealltwriaeth o’r diwydiannau creadigol a diwylliannol mewn cyd-destunau cenedlaethol a rhyngwladol

Treftadaeth Fyd-eang (MA)

Amser llawn

Dysgwch am bŵer treftadaeth mewn cyd-destun byd-eang ac ystyriwch ei pherthynas â dadleuon mawr ynghylch cynaliadwyedd, dad-drefedigaethu, gwrthdaro a hawliau dynol.

Astudiaethau Iaith a Chyfieithu (PhD, MPhil)

Amser llawn, rhan-amser

Mae gennym ddiwylliant ymchwil cryf, deallusol ysgogol a bywiog y mae ôl-raddedigion yn cael eu hymsefydlu a’u hymgorffori iddo.

Ein cyflwyniadau

Croeso i astudiaethau cyfieithu ym Mhrifysgol Caerdydd

Mae ein cyflwyniad diwrnod agored cyfieithu, gyda Dr Cristina Marinetti, yn rhoi blas ar ein cwrs cyfieithu ôl-raddedig, sut rydym ni'n addysgu a'r cyfleoedd ychwanegol sydd ar gael fel rhan o'ch gradd.

Croeso i ddiwylliannau byd-eang ym Mhrifysgol Caerdydd

Mae’r cyflwyniad diwrnod agored diwylliannau byd-eang hwn, gyda'r Athro David Clarke, yn rhoi trosolwg o'r rhaglen, yn egluro sut y byddwch chi'n cael eich asesu, yn cyflwyno'r arbenigwyr iaith a diwylliant a fydd yn eich dysgu chi ac yn trafod pa yrfaoedd allai ddilyn y radd hon.

Safbwynt myfyriwr

"Rwy'n dod o Wlad Belg, felly dim ond sector diwylliannol y wlad honno oedd yn gyfarwydd i mi mewn gwirionedd. Pan gyrhaeddais i Brifysgol Caerdydd sylweddolais i pa mor wahanol yw'r sector diwylliannol yng Nghymru.

"Ces i fy synnu gan yr amrywiaeth a'r cynhwysiant. Ar y rhaglen, buom ni’n edrych ar astudiaethau achos o fewn y diwydiannau diwylliannol, gan gynnwys ymweliad ag Opera Cenedlaethol Cymru a sgwrs gyda threfnydd Gŵyl Gwobr Iris.

"Cawsom ni gyfleoedd i gwrdd â llawer o bobl yng Nghaerdydd a helpodd fi i ddarganfod pa mor fywiog a chyfoethog yw'r sector diwylliannol yma."

Florence Gygax

Rhagor o wybodaeth am MA Diwylliannau Byd-eang

Byd o bosibiliadau

Dysgu gyda ni cyn ymuno â ni

O iechyd i’r system gyfiawnder, o’r sector gwirfoddol i chwaraeon a’r celfyddydau, rydym i gyd yn byw ac yn gweithio’n fwyfwy mewn cyd-destunau lle mae pobl yn siarad mwy nag un iaith. Rydym yn cynnig y cwrs ar-lein am ddim, Gweithio gyda Chyfieithu, mewn cydweithrediad â Future Learn. Mae'r cwrs a sefydlwyd yn 2016, yn pwysleisio pwysigrwydd cyfieithu a hyd yma, mae dros 50,000 o bobl wedi ei ddilyn.

Ble gall ieithoedd fynd â chi

Mae nifer o’n myfyrwyr graddedig yn byw bywydau cyffrous, amlieithog mewn gwledydd ar draws y byd. Maent yn gweithio ym maes diplomyddiaeth, TG, chwaraeon rhyngwladol, gweithgynhyrchu, y lluoedd arfog, cyfrifeg, y gyfraith, dadansoddi ariannol, ymgynghoriaeth rheoli a busnes rhyngwladol. Mae’r rhestr yn ddiddiwedd!

Ein cyfleoedd ymchwil

Mae ein hamgylchedd amlddisgyblaethol yn denu amrywiaeth o grantiau ymchwil a buddsoddiadau ac mae iddo enw da am ansawdd. Rydym ni'n cynnig cyfleoedd PhD ac MPhil amser llawn a rhan-amser dan faner Astudiaethau Iaith a Chyfieithu. Trefnir ein hymchwil dan dair thema: Astudiaethau Diwylliannol a Gweledol Trawswladol; Hanes a Threftadaeth; ac Astudiaethau Ardal Byd-eang Seiliedig ar Iaith.

Astudiwch yng nghanol dinas fywiog Caerdydd

Byddwch yn gweithio yn yr Ysgol Ieithoedd Modern ym Mhlas y Parc, sydd yng nghanol ein campws ac yng nghalon prifddinas Cymru. Cewch hyd i ni drws nesaf i orsaf drenau Cathays, Undeb y Myfyrwyr a phum munud ar droed o ganol y ddinas.