Meddygaeth: Mynediad i raddedigion (MBBCh)

Bydd eich cwrs yn cael ei rannu’n dri chyfnod penodol. Yn ystod Cam 1 (eich Blwyddyn 1) byddwch yn dysgu’r wyddoniaeth graidd ac ymarfer clinigol. Yn ystod cam 2 (Blynyddoedd 2 a 3) byddwch yn dysgu sut i ofalu drwy brofiad clinigol cyfoes integredig, ac yn ystod Cyfnod 3, byddwch yn dysgu ar sail gwaith ac yn y gwaith, gan atgyfnerthu eich gwaith paratoi ar gyfer ymarfer.

Mae'r Cwrs Israddedig ym Mhrifysgol Caerdydd yn Gwrs Anfodiwlaidd ac felly mae'n amhosibl rhoi’r dulliau dysgu mewn adrannau. Y syniad y tu ôl i C21 yw meithrin ac ennill gwybodaeth a syniadau newydd drwy ehangu a datblygu’r hyn rydych chi’n ei wybod yn barod. Mae ""cwricwlwm cynyddol"" yn rhoi cyfle i chi ailymweld ag agweddau ar ddysgu, a thrwy hynny ddyfnhau eich dealltwriaeth.

Y prif ddull o gyflawni yn eich Blwyddyn 1 fydd drwy ddysgu seiliedig ar achos, lle’r ydych yn cael eich cefnogi mewn grwpiau bach gan hwylusydd hyfforddedig. Byddwch yn dysgu gwyddoniaeth sylfaenol a chlinigol drwy astudio’r thema ‘Cwrs Cronolegol Bywyd’. Bydd pob uned astudio yn cynnwys cyfres o achosion cleifion, a fydd yn para tua phythefnos fel arfer.

Yn ystod blynyddoedd 3 a 4 byddwch yn cymhwyso ac yn meithrin yr hyn a ddysgwyd yn flaenorol drwy fwy o amser clinigol mewn ysbytai a meddygfeydd ledled Cymru. Bydd dysgu yn cael ei ganoli ar brofiad cleifion wrth i chi ddilyn cleifion ar hyd y llwybr gofal o leoliadau cymunedol i ofal ysbyty ac yn ôl i'r gymuned ar leoliadau gwaith. Bydd dysgu ar leoliad clinigol yn cael ei ategu gyda chyfnodau pellach o hyfforddiant yn ôl yng Nghaerdydd, lle byddwch yn ailymweld ag egwyddorion gwyddonol craidd ac yn adeiladu ar y rhain, ond gyda rhagor o bwyslais ar y patho-ffisioleg, dulliau diagnostig, rheoli a thrin clefydau cyffredin.

Erbyn Blwyddyn 4 byddwch yn barod i ymgymryd â rôl fwy gweithredol mewn timau clinigol. Mae'r pwyslais ar gyfnerthu gwybodaeth a sgiliau i'ch paratoi ar gyfer gweithio fel meddyg yn y GIG, gan sicrhau trosglwyddiad llyfn o fod yn fyfyriwr i fod yn Feddyg Sylfaen.

Mae'r dysgu craidd yn cael ei ategu gan gyfres o “gydrannau a ddewiswyd gan y Myfyriwr” (SSC) ym mhob blwyddyn o'r rhaglen, sy'n eich galluogi i ddewis prosiectau o blith rhestr o ddewisiadau sydd ar gael, neu i ddatblygu eich prosiect eich hun. Mae SSC yn darparu'r ysgogiad a'r cyfle i chi, dan arweiniad a chyfarwyddyd priodol, i gaffael gwybodaeth drwy broses archwilio ac eich ymdrechion deallusol eich hun.

Mae SSC yn ategu addysgu MBBCh craidd, sy'n eich galluogi i astudio meysydd o ddiddordeb arbennig, gan gyflwyno sgiliau ymchwil ac annog meddwl dadansoddol a beirniadol o’ch blwyddyn gyntaf ymlaen. Cewch eich annog i ddatblygu sgiliau a gwybodaeth mewn amrywiaeth o arbenigeddau meddygol a gwyddonol, gan gynnwys y rhai y tu allan i barth meddygaeth draddodiadol. Yn y flwyddyn olaf, byddwch yn cael cyfle i fynd ar leoliad gwaith 'dewisol' ac ymweld â lleoliadau meddygol yn unrhyw le yn y Deyrnas Unedig neu'n rhyngwladol. Mae'r 'dewisiadau' hyn yn eich galluogi i fynd ar drywydd agwedd ar feddygaeth sydd o ddiddordeb arbennig i chi.

Mae'r modiwlau a ddangosir yn adlewyrchu'r cwricwlwm presennol a gallai gael ei adolygu cyn dechrau eich blwyddyn academaidd.

Mae'r modiwlau a ddangosir yn esiampl o'r cwricwlwm arferol. Byddant yn cael eu hadolygu cyn blwyddyn academaidd 2024/2025. Bydd y modiwlau terfynol yn cael eu cyhoeddi erbyn mis Medi 2024

Blwyddyn un

Mae eich blwyddyn gyntaf ar y MBBCh yn cyfateb i Flwyddyn 2 ar gyfer y garfan y byddwch chi'n ymuno â hi.

Byddwch yn cychwyn yn gynharach na myfyrwyr eraill Blwyddyn 2 C21, h.y. ym mis Awst, gydag Ysgol Haf. (Cysylltir â chi gyda dyddiadau ar ôl i chi dderbyn eich cynnig.) Byddwch yn cael eich cyflwyno i Ddysgu Seiliedig ar Achosion mewn sesiwn 2-3 wythnos wedi'i gwneud yn arbennig. Yn ystod y cyfnod hwn bydd gennych addysg benodol mewn sgiliau cymryd hanes clinigol ac arholi a byddwch hefyd yn treulio amser yn y cyfleuster sgiliau clinigol yn yr Ysgol Meddygaeth.

Yn dilyn hyn, rydych chi'n integreiddio â'r myfyrwyr israddedig sy'n dechrau ail flwyddyn eu cwrs.

Wrth ymuno â'r cwrs, bydd yr holl fyfyrwyr ar y rhaglen pedair blynedd yn cael eu cyflwyno i'r cysyniad o ddysgu ar sail achosion yn ystod pythefnos pwrpasol a gynlluniwyd yn arbennig. Yn ystod y cyfnod hwn byddwch yn cael addysg bwrpasol hefyd mewn cymryd hanes a sgiliau archwiliadau clinigol, a byddwch hefyd yn treulio amser yn y cyfleuster sgiliau clinigol yn yr Ysgol Meddygaeth. Wedi hynny byddwch ar yr un lefel yn llwyr â'r myfyrwyr israddedig sy'n dechrau ail flwyddyn eu cwrs. Mae gweddill eich blwyddyn gyntaf yn seiliedig ar gyfres o senarios clinigol sy'n cysylltu'r gwyddorau sylfaenol â chyflyrau clinigol cyffredin, megis anafiadau cyhyrysgerbydol, clefyd y galon, diabetes a phroblemau gastroberfeddol.

• Fe ddysgwch sut i drin problemau meddygol ar sail yr egwyddorion sylfaenol a datblygu eich sgiliau rhesymu gwyddonol
• Cefnogir y sesiynau grŵp bach gan ddarlithoedd a seminarau, mynediad at wyddor bywyd ac adnoddau sgiliau clinigol
• Gan amlaf, byddwch yn treulio diwrnod yr wythnos yn gweld cleifion mewn ysbytai lleol, meddygfeydd a gwasanaethau cymunedol eraill ar hyd a lled de-ddwyrain Cymru
• I ddechrau, byddwch yn canolbwyntio ar strwythur a swyddogaeth arferol, ond, wrth i achosion ddatblygu, byddwch yn symud ymlaen at gyflwyniadau clinigol mwy cymhleth yn canolbwyntio ar strwythur a swyddogaeth annormal.

Bydd yr addysgu yn digwydd yn ein cyfleusterau o’r radd flaenaf yn adeilad Cochrane, datblygiad blaenllaw ar safle Ysbyty Athrofaol Cymru, Caerdydd, ac yn Ysgol y Biowyddorau. Byddwch hefyd yn cylchdroi drwy ganolfannau addysgu a dysgu clinigol rhanbarthol ym Merthyr Tudful, Pen-y-bont ar Ogwr a Chasnewydd. Byddwch yn astudio 11 achos yn ystod eich blwyddyn gyntaf. Mae pob achos yn para pythefnos fel arfer. Yn ogystal â dysgu gwyddoniaeth graidd, mae uchafbwyntiau’r flwyddyn hon yn cynnwys:

1. Dysgu yn y gymuned

Caiff y pwysigrwydd o weld y claf yn ei gymuned ei bwysleisio ac mae’r rhaglen Dysgu Clinigol Cymunedol yn adeiladu ar y dysgu yn seiliedig ar achosion. Bydd pob lleoliad yn cynnwys dysgu sy’n seiliedig ar dasgau, fel eich bod yn casglu portffolio o brofiad dysgu clinigol. Bydd hyn yn eich helpu i gysylltu ‘pobl go iawn’ â’r achos rydych yn ei astudio yn ogystal â nodau mwy hirdymor fel agweddau proffesiynol, dealltwriaeth o’r gwaith o ddarparu gwasanaeth iechyd, ac arweinyddiaeth. Un o uchafbwyntiau'r rhaglen dysgu clinigol cymunedol yw’r diwrnod iechyd gwledig. Mae hyn yn eich galluogi chi i ddysgu am heriau darparu gofal iechyd mewn lleoliad gwledig o’u cymharu â'r gwasanaethau sydd ar gael mewn lleoliad trefol. Byddwch yn dysgu gan feddygon a pharafeddygon sut i ymateb i argyfwng drwy gymryd rhan mewn efelychiad o ddamwain draffig wledig.

2. Rhaglen Cydrannau o Ddewis y Myfyriwr

Mae’r rhaglen SSC ym Mlwyddyn 1 yn cynnwys pedwar cyfle dysgu penodol.

Prosiectau profiad

Mae'r ddau brosiect profiad yn eich amlygu chi i amrywiaeth eang o leoliadau a phynciau, a byddwch yn cael cyfleoedd i ddatblygu sgiliau ymchwil ar lefel uwch. Yn bwysig, mae prosiectau a fydd yn hwyluso astudio y tu hwnt i ffiniau meddygaeth draddodiadol, ac mae'r rhain yn cynnwys lleoliadau mewn gwaith cymdeithasol, meddygaeth gyflenwol a'r proffesiynau sy'n gysylltiedig â meddygaeth.

Erthygl newyddiadurol

Bydd yr erthygl newyddiadurol yn eich galluogi i arddangos sgiliau academaidd beirniadol chwilio am lenyddiaeth, arfarnu deunydd gwyddonol cymhleth yn seiliedig ar dystiolaeth a’r cyfathrebu syml, cydlynol a chryno a ddaw i ganlyn hynny. Bydd hefyd yn eich herio i gyfleu eich neges newyddiadurol mewn modd difyr ond sy’n procio'r meddwl.

Cynhadledd unigryw Blwyddyn 1 (2)/Blwyddyn 4 (5) C21

Bydd y gynhadledd yn cynnwys sesiynau llawn gyda siaradwyr gwadd yn rhoi sylw i nifer o themâu amrywiol ynghylch ffynnu a goroesi yn yr ysgol feddygol a moeseg feddygol. Mae myfyrwyr Blwyddyn 5 (eich Blwyddyn 4) yn hwyluso ac yn rhannu eu profiadau o leoliadau clinigol yng Ngham 2; Lleoliadau mewnosod ac Erasmus. Mewn grwpiau bach, bydd myfyrwyr Blwyddyn 2 (eich Blwyddyn 1) yn paratoi cyflwyniadau poster yn seiliedig ar eu prosiect profiad SSC cyntaf. Bydd myfyrwyr Blwyddyn 5 yn "beirniadu" y posteri ac yn rhoi adborth i academyddion. Bydd yr SSC hwn yn eich galluogi i gael profiad o fynd i gynhadledd wyddonol/meddygol a chyflwyno yno, ac yn cynnig cyfle sylweddol i ryngweithio â chyfoedion hŷn wrth iddyn nhw gychwyn ar gam nesaf eu gyrfaoedd academaidd a chlinigol.

Blwyddyn dau

Ym Mlwyddyn 3 rydych chi'n dysgu egwyddorion gofal clinigol integredig, i ddysgu am ddull clinigol a rhesymu diagnostig ac yn cysylltu hyn ag egwyddorion gwyddonol sylfaenol meddygaeth. Rhennir y flwyddyn yn bum cyfle dysgu penodol:

• Tri lleoliad clinigol 10 wythnos gydag wythnosau ar y dechrau ac ar y diwedd ar Gampws Caerdydd
• Chwe wythnos o addysg ar Wyddorau Clinigol Cymhwysol (pob blwyddyn addysgu)
• 'Elfen Dewis y Myfyriwr' dros saith wythnos – cyfle i fynd y tu hwnt i ddysgu craidd ac astudio pwnc sydd o ddiddordeb penodol i chi.

Yn ystod Blwyddyn 2, byddwch yn treulio'r rhan fwyaf o'ch amser ar leoliadau clinigol, gan ddysgu meddygaeth drwy ddilyn cleifion drwy'r system gofal iechyd. Rydym yn disgwyl i chi ganolbwyntio ar y cleifion o ran eich dulliau dysgu drwy weld taith y claf drwy'r system gofal iechyd. Bydd hyn yn rhoi cipolwg i chi ar brofiad cleifion o safbwynt salwch a'r system gofal iechyd, a dysgu am hanfodion gofal clinigol rhagorol.

Dylech fynd am bob cyfle clinigol a gynigir, er mwyn i chi allu:

• Bod yn hyddysg wrth gyflawni asesiadau clinigol
• Llunio diagnosis gwahaniaethol
• Disgrifio ac esbonio egwyddorion ymchwiliadau
• Disgrifio dulliau rheoli a thrin clefydau cyffredin a'u hesbonio.

Blwyddyn tri

Mae Blwyddyn 3 (sy'n cyfateb i Flwyddyn 4 y garfan rydych chi wedi ymuno â hi) yn dilyn patrwm tebyg i Flwyddyn 2, ond bydd eich amser yn canolbwyntio ar achosion cynyddol arbenigol. Byddwch yn parhau i ymarfer y sgiliau craidd a ddysgir ym mlwyddyn 2 ond yn cymhwyso hyn mewn lleoliadau clinigol gwahanol. Rhennir y flwyddyn yn nifer o gyfleoedd dysgu ar wahân:

• Tri lleoliad clinigol ar draws ysbytai Cymru, gydag wythnosau ar y dechrau ac ar y diwedd ar Gampws Parc y Mynydd Bychan yng Nghaerdydd
• 'Elfen Dewis y Myfyriwr' dros flwyddyn gyfan - cyfle i fynd y tu hwnt i ddysgu craidd ac astudio pwnc sydd o ddiddordeb penodol i chi.

A. Menywod, Plant a Theuluoedd

Nod cyffredinol y lleoliad hwn yw eich galluogi i ennill sgiliau sy'n berthnasol i fenywod a phlant, i wneud asesiad clinigol o broblem, a datblygu cynllun gofal yn ei ystyr ehangaf. Byddwch yn treulio amser gydag obstetryddion a phediatregwyr ledled Cymru ac yn cael y cyfle i weld drosoch eich hunan pa mor bwysig yw gwaith aml-ddisgyblaeth yn y gymuned ac mewn lleoliadau gofal eilaidd. Dylai'r claf barhau i fod yn ganolbwynt y dysgu a bydd cyfleoedd i ryngweithio â menywod, plant a rhieni sy'n cael mynediad at y system gofal iechyd.

B. Niwrowyddoniaeth Clinigol, Seiciatreg ac Offthalmoleg

Mae'r ymlyniad hwn yn defnyddio arbenigedd un o'r pedwar Sefydliad Ymchwil yn yr Ysgol Feddygaeth. Byddwch yn profi arferion mwy arbenigol yn ystod yr ymlyniad Niwrowyddoniaeth glinigol ond byddwch yn gweld sut mae sylfaen ardderchog mewn sgiliau generig yn hwyluso rhesymu clinigol a diagnostig. Mae'r rhain yn sgiliau hanfodol i bob meddyg da eu datblygu a’u perffeithio. Cewch gyfleoedd gwych hefyd i weld cleifion â salwch seiciatrig, a dod i werthfawrogi pa mor gyffredin yw anhwylderau seiciatrig yn ein poblogaeth. Byddwch yn dysgu am anhwylderau seiciatryddol sylfaenol ac yn gweld sut y gall problemau iechyd meddwl ddylanwadu ar sut mae cleifion yn cyflwyno gyda salwch eraill ac yn ei reoli. Bydd yr addysgu offthalmoleg yn wythnos bwrpasol a dreulir yng Nghaerdydd. Yn ystod eich lleoliad un wythnos mewn offthalmoleg, byddwch yn cael cyfleoedd i ehangu eich dealltwriaeth o batholeg offthalmolegol, sgiliau archwilio a rheoli yn ogystal â thynnu sylw at y gofynion cymorth i gleifion â nam ar eu golwg.

C. Clefydau Cronig 2 - Geriatreg, Clefydau Cyhyrysgerbydol a Dermatoleg

Mae gennym boblogaeth sy'n heneiddio fwyfwy a baich sylweddol o glefydau cronig yn ein poblogaeth. Mae'r rhain yn feysydd blaenoriaeth i’r GIG fynd i'r afael â nhw ar hyn o bryd, ac mae angen i chi ddeall yr heriau a ddaw yn sgil yr afiechydon hyn.  Mae'r lleoliad yn adeiladu ar egwyddorion rheoli clefydau cronig a gyflwynwyd ym Mlwyddyn 3 (eich Blwyddyn 2), ond gyda phwyslais arbennig ar yr unigolyn oedrannus ac unigolion sydd â chlefydau cyhyrysgerbydol a chlefydau ar y croen.

Cynllun cyfnewid ERASMUS

Yn ystod Blwyddyn 4 (eich Blwyddyn 3), bydd myfyrwyr sydd â sgiliau iaith yn cael y cyfle i wneud cais am le ar gynllun cyfnewid ERASMUS.  Gall myfyrwyr llwyddiannus ddewis astudio'r lleoliad menywod, plant a theuluoedd yn un o'r ysgolion meddygol sy’n bartneriaid i ni yn Ffrainc, Sbaen, Portiwgal a'r Eidal.

Blwyddyn pedwar

(Blwyddyn olaf, sy'n cyfateb i Flwyddyn 5 y garfan rydych wedi ymuno â hi). Mae ein Rhaglen Gysoni unigryw yn dwyn holl elfennau'r cwrs ynghyd, gan gyfuno'r wybodaeth a'r sgiliau sy'n bodoli’n barod gyda'r rhai sy'n ofynnol gan y Rhaglen Sylfaen i’ch paratoi chi ar gyfer bywyd ar ôl graddio.

• Mae eich integreiddio o fewn timau clinigol a chyfrifoldeb dros ofal cleifion yn cynyddu drwy gydol eich blwyddyn olaf yn astudio, gyda'r bwriad o’ch paratoi chi ar gyfer eich rôl fel meddyg sy'n gweithio yn y GIG, ac yn barod ar gyfer astudiaethau ôl-raddedig
• Byddwch yn canolbwyntio ar asesu a rheoli cyflwyniadau clinigol acíwt a chronig, a chewch fwy a mwy o gyfrifoldeb ar hyd y flwyddyn
• Bydd dau leoliad clinigol dros gyfnod o wyth wythnos, un mewn ysbyty a'r llall yn y gymuned (meddygfa). Bydd disgwyl i chi gyfrannu at ofal cleifion dan oruchwyliaeth
• Byddwch yn dysgu yn y gweithle yn bennaf, gyda sesiynau yn y ganolfan efelychu a sesiynau grwpiau bach wedi eu dylunio i fireinio eich meddwl clinigol a’ch sgiliau gwneud penderfyniadau
• Dilynir y lleoliadau hyn gan gyfnod dewisol o rhwng 8 a 10 wythnos mewn cyrchfan o’ch dewis, unrhyw le yn y byd, i astudio’r agweddau ar feddygaeth sy’n apelio at eich dychymyg
• Bydd pedwar bloc dysgu creiddiol dros gyfnod o bythefnos yr un yn rhoi sylw i agweddau pwysig ar yrfa feddygol. Mae’r gweithgareddau hyn yng Nghaerdydd, ar thema “Paratoi ar gyfer Ymarfer”, “Newid Ymarfer”, “Gwyddoniaeth Ymarferol” ac “Ymarfer ar gyfer Ymarfer,” yn cynnig dealltwriaeth o beth i’w ddisgwyl pan fyddwch yn dechrau gwaith. Maen nhw’n cynnwys gweithio mewn tîm, arweinyddiaeth, gwella gwasanaethau, sgiliau ymchwil academaidd, a bywyd fel meddyg Sylfaen
• Daw’r Rhaglen Gysoni i ben gyda’r dyfarniad Uwch Gynorthwy-ydd dan Hyfforddiant saith wythnos o hyd i fyfyrwyr. Mae hyn yn eich galluogi chi i weithio fel rhan o'r tîm clinigol drwy reoli cleifion yn uniongyrchol dan oruchwyliaeth timau ysbytai. Mae'n digwydd yn yr ysbyty lle byddwch chi’n ymgymryd â’ch swydd sylfaen gyntaf, os yw honno yng Nghymru. Os yw’r swydd yn rhywle arall, gallwch ddewis trefnu cyfle i fod yn uwch gynorthwyydd dan hyfforddiant yn yr ysbyty hwnnw eich hun, neu adael i ni drefnu eich cyfle ar eich rhan yng Nghymru.

Mae'r flwyddyn olaf yn sicrhau eich bod chi’n barod ar gyfer eich gyrfa mewn meddygaeth, gan atgyfnerthu’r sgiliau a'r wybodaeth sydd eu hangen i berfformio ar y lefel uchaf o fewn y GIG.

Mae'r Brifysgol wedi ymrwymo i ddarparu ystod eang o opsiynau modiwl lle bo modd, ond er y gwneir pob ymdrech i gynnig dewis, dylech fod yn ymwybodol y gallai hyn gael ei gyfyngu mewn rhai amgylchiadau. Y rheswm am hyn yw'r ffaith mai dim ond nifer cyfyngedig o leoedd sydd ar gael ar rai modiwlau, a gaiff eu dyrannu ar sail y cyntaf i'r felin. Mae'n ofynnol i fodiwlau eraill sicrhau isafswm nifer o fyfyrwyr cyn gallu eu cynnal, er mwyn gwneud yn siŵr y gellir cyflwyno addysg o ansawdd priodol. Mae'n ofynnol i fyfyrwyr fod wedi dilyn rhai pynciau penodol yn barod cyn cael lle ar rai modiwlau, ac mae modiwlau eraill yn rhai craidd neu'n ofynnol ar eich rhaglen ddewisol. Gall modiwlau gael eu cyfyngu oherwydd gwrthdaro yn yr amserlen hefyd, ac er bod y Brifysgol yn ymdrechu i amharu cyn lleied â phosibl ar eich dewis, byddai'n syniad da i chi ofyn am gyngor gan yr Ysgol berthnasol am y dewisiadau modiwl sydd ar gael.

Mae'r Brifysgol wedi ymrwymo i ddarparu amrywiaeth eang o opsiynau modiwl lle'n bosibl. Ond byddwch yn ymwybodol er y byddwn yn gwneud pob ymdrech i gynnig dewis, gall hyn gael ei gyfyngu mewn rhai amgylchiadau. Y rheswm am hyn yw'r ffaith mai dim ond nifer cyfyngedig o leoedd sydd ar gael ar rai modiwlau, a gaiff eu dyrannu ar sail y cyntaf i'r felin. Mae'n ofynnol i fodiwlau eraill sicrhau isafswm nifer o fyfyrwyr cyn gallu eu cynnal, er mwyn gwneud yn siŵr y gellir cyflwyno addysg o ansawdd priodol. Gall modiwlau gael eu cyfyngu oherwydd gwrthdaro yn yr amserlen hefyd, ac er bod y Brifysgol yn ymdrechu i amharu cyn lleied â phosibl ar eich dewis, byddai'n syniad da i chi ofyn am gyngor gan yr Ysgol berthnasol am y dewisiadau modiwl sydd ar gael.