Diwinyddiaeth (MTh)

Sut y caf fy addysgu?

Cyflwynir yr ymchwil a'r addysgu a arweinir gan ymarfer gan academyddion yng Ngholeg y Bedyddwyr Caerdydd. Mae’r modiwlau yn seiliedig ar gryfderau sefydledig ym maes astudiaethau Beiblaidd ac mewn ffyrdd ymarferol a chyd-destunol o ymdrin â diwinyddiaeth.

Byddwch hefyd yn elwa ar eu hymrwymiad i arfer diwinyddiaeth mewn ffyrdd sy'n ymwneud ag ymarfer a chyd-destun. Mae hyn yn sicrhau bod trylwyredd academaidd yn cael ei gyfuno â pherthnasedd ymarferol. Bydd profiad eich tiwtoriaid o ymarfer proffesiynol yn y weinidogaeth hefyd yn llywio'ch addysgu. Yn ogystal â sgiliau ymarfer myfyriol diwinyddol, bydd hyn yn eich helpu i ddatblygu eich gwybodaeth a'ch dealltwriaeth ddiwinyddol mewn ffyrdd sy'n ymwneud â bywyd a chyd-destunau cyfoes.  

Mae'r addysgu’n digwydd mewn grwpiau bach, ac fel arfer defnyddir darlith-seminarau rhyngweithiol.  

Sut y caf fy asesu?

Mae’r asesiadau wedi'u cynllunio i adlewyrchu'r ffocws deublyg o ddyfnhau eich dealltwriaeth ddiwinyddol ynghyd â gwella'ch ymarfer. Er nad oes arholiadau, defnyddir dulliau amrywiol o asesu, a all gynnwys cyflwyniadau, cynigion ymchwil, adolygiadau o lenyddiaeth, dehongliadau Beiblaidd, myfyrio diwinyddol, a thraethodau traddodiadol.

Mae llawer o'r asesiadau yn eich gwahodd i gysylltu eich dealltwriaeth ddiwinyddol â'ch ymarfer (pan fo'n briodol) ac â'r cyd-destun cyfoes mewn rhyw ffordd. Yn aml ceir cyfle i gyd-greu aseiniad mewn trafodaeth gyda thiwtor y modiwl; a gellir cynllunio'r asesiad ar gyfer y prosiect dysgu annibynnol ar gyfer ffocws penodol, ee portffolio o bregethau gyda sylwebaeth a dadansoddiad beirniadol. Yn y modd hwn, gellir sicrhau bod eich holl ddysgu yn berthnasol i'ch sefyllfa  benodol chi.

Bydd y sgiliau academaidd a gaiff eu datblygu a'u mireinio drwy'r asesiadau hyn yn ddefnyddiol ar gyfer astudiaethau ac ymchwil academaidd pellach, ac fel sgiliau trosglwyddadwy ar gyfer ystod o gyd-destunau proffesiynol. Mae'r rhain yn cynnwys y sgiliau o ymchwilio i bwnc drwy chwiliadau llenyddiaeth, ymgysylltu’n ofalus ac yn greadigol â thestunau, dadansoddi’n feirniadol, a chyflwyno dadl gydlynol a pharhaus.   

Sut y caf fy nghefnogi?

Bydd amgylchedd bach, cyfeillgar Coleg y Bedyddwyr Caerdydd ar gael i chi, ynghyd â'r ystod lawn o gymorth sydd ar gael i bob myfyriwr ym Mhrifysgol Caerdydd.

Bydd tiwtor personol yn cael ei ddyrannu i chi, a fydd fel arfer yn un o'r tiwtoriaid ar y rhaglen. Mae arweinydd y rhaglen hefyd ar gael fel ffynhonnell o gymorth a chyngor.

Rydym yn cydnabod bod nifer o fyfyrwyr sy'n astudio ar y cwrs MTh Diwinyddiaeth yn dychwelyd i astudiaethau academaidd ar ôl seibiant. Mae'r modiwl cychwynnol, craidd ar y rhaglen – er ei fod yn canolbwyntio'n bennaf ar ddulliau ymchwil – yn cynnwys sesiynau sy'n helpu i ddatblygu'r sgiliau sydd eu hangen arnoch i weithio ar lefel gradd meistr. Mae'r asesiad ar gyfer y modiwl hwn mewn dwy ran, felly byddwch yn cael adborth ar eich darn cyntaf o waith yn eithaf cyflym. Mae'r holl fodiwlau yn cynnwys asesiad ffurfiannol yn ogystal ag asesiad crynodol. Mae hynny'n golygu y cewch adborth arbenigol ar waith cyn y daw’n bryd i chi gyflwyno aseiniad i gael ei farcio'n ffurfiol. Cewch adborth manwl ar yr holl waith rydych chi'n ei gyflwyno, a fydd yn esbonio pam y cawsoch y marc a roddwyd i chi a'r hyn y mae angen i chi ei wneud i wella. 

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a dealltwriaeth:

• Cymhwyso dealltwriaeth ddofn a systematig o wybodaeth ddiwinyddol i gwestiynau cymhleth.
• Addasu methodolegau diwinyddol uwch yn greadigol  mewn ymateb i sefyllfaoedd sy'n newid.
• Syntheseiddio dulliau arbenigol o astudio diwinyddol mewn cyd-destunau anrhagweladwy. 
• Gwerthuso'n feirniadol y dulliau cyfredol mewn diwinyddiaeth, gan fod yn effro i faterion ymyleiddio wrth gynhyrchu gwybodaeth ddiwinyddol.

Sgiliau deallusol:

• Arddangos sgiliau soffistigedig o ddadansoddi ffynonellau cynradd ac eilaidd.
• Dangos hyblygrwydd deallusol a phwerau gwerthuso drwy gwblhau astudiaethau ac ymchwil annibynnol.
• Ymateb yn systematig ac yn greadigol i faterion cymhleth.
• Penderfynu rhwng gwahanol ddulliau methodolegol o ymdrin â chwestiynau cymhleth. 

Sgiliau ymarferol proffesiynol:

• Defnyddio sgiliau uwch o gyfathrebu, rheoli gwybodaeth a myfyrio’n feirniadol. 
• Esbonio'n feirniadol, dadansoddi a gwerthuso materion allweddol a cdilemâu sy'n codi mewn cyd-  destunau penodol  yn y gymdeithas gyfoes (ee eglwysi, elusennau, byd addysg).
• Dangos meddylfryd atblyg mewn perthynas â'r ffordd yr ydych chi’ch hun yn cymryd rhan mewn ymchwil academaidd a/neu ymarfer proffesiynol.
• Defnyddio sgiliau uwch o fyfyrio ar ymarfer yng ngwasanaeth eich gweinidogaeth a/neu eich gwaith.

Sgiliau trosglwyddadwy/allweddol:

• Dangos menter, annibyniaeth a chreadigrwydd wrth ddatrys problemau.
• Gwneud penderfyniadau  gwybodus yng nghanol  ansicrwydd a newid. 
• Cyfleu syniadau cymhleth yn glir ac yn briodol ar gyfer cynulleidfaoedd arbenigol ac anarbenigol.