Cefnogi lleoliadau dysgu

Gall lleoliadau gynnig cyfleoedd dysgu unigryw a gwerthfawr iawn i fyfyrwyr sy'n cyd-fynd â'u hastudiaethau academaidd. Gall arddull a dull dysgu lleoli fod yn wahanol iawn i rannau eraill o raglen academaidd, gyda threfn, arferion a disgwyliadau anghyfarwydd. Felly mae angen cymorth ar fyfyrwyr mewn nifer o gamau, gan gynnwys paratoi ar gyfer lleoliad, yn ystod y lleoliad, ac ar ddychwelyd i’r Brifysgol ar ôl cwblhau lleoliad.  Yn benodol bydd angen cymorth ar fyfyrwyr yn aml i ddeall beth maent yn ei ddysgu ar y lleoliad. Mae myfyrio’n rhan bwysig dros ben o'r broses hon – ac yn sgìl y bydd angen ymarfer a chanllawiau ar fyfyrwyr.

Gall y ffyrdd mae dysgu ac asesu yn cael eu cofnodi ar leoliad hefyd fod yn anghyfarwydd i fyfyrwyr, ac mae angen ystyried ac esbonio hyn yn ofalus. Mae hefyd yn bwysig sicrhau y gall myfyriwr roi tystiolaeth ynglŷn â’i leoliad dysgu, ar gyfer asesu ac i’w gyflwyno i eraill ar ôl graddio.

Mae cyflogwyr a darparwyr lleoliadau hefyd yn cynnig cefnogaeth sylweddol ar gyfer lleoliadau dysgu, ac yn aml yn cefnogi’r dysgu hwnnw’n ddyddiol. Felly mae'n bwysig bod cyflogwyr yn cael yr adnoddau a'r wybodaeth ynghylch nodau a gofynion asesu rhaglen er mwyn cefnogi myfyrwyr yn unol â hynny.

Mae'r pwnc hwn yn cynnig cipolwg ar yr amrywiaeth o gyfleoedd am leoliadau sy'n bodoli ar draws Prifysgol Caerdydd a sut caiff myfyrwyr eu cefnogi’n effeithiol yn ystod profiadau o'r fath.