Ymgysylltu ag Adborth Myfyrwyr

Mae llawer o gyfleoedd ffurfiol ar gael i fyfyrwyr i roi adborth ar arferion dysgu ac addysgu. Mae’r rhain yn cynnwys gwerthuso modiwl, cymryd rhan mewn pwyllgorau neu brosiectau yn yr Ysgol, a’r Arolwg Myfyrwyr Cenedlaethol. Mae dulliau anffurfiol ategol fel trafodaethau yn y dosbarth ac adborth hanner ffordd drwy’r modiwl hefyd yn cael eu defnyddio i nodi barn a chynnydd myfyrwyr.

Mae’r canlynol ymysg yr argymhellion o ran arfer da yn y maes gweithgarwch hwn:

• Cyfathrebu’n glir ynghylch sut y gweithredir ar adborth gan fyfyrwyr; neu’r rhesymau dros beidio â gwneud hynny.
• Dealltwriaeth a rennir o’r mathau gwahanol o bartneriaethau myfyrwyr sy’n bodoli. Er enghraifft, cydnabod nad yw rhai trafodaethau/gweithgareddau yn cynrychioli partneriaeth 50-50.
• Defnyddio amrywiaeth briodol o ddulliau (ffurfiol ac anffurfiol) i gasglu adborth, adolygu gwybodaeth ac adrodd ar unrhyw gamau dilynol.
• Rhoi cyfle i fyfyrwyr gymryd rhan ym mhob agwedd ar y cylch gwella adborth. Er enghraifft, cynnig cyfleoedd i gydweithio ar ddatblygiadau ymarferol yn seiliedig ar yr adborth a roddwyd. Bydd hyn yn osgoi canfyddiad o fodel adborth hollol ymatebol sy’n seiliedig ar y berthynas rhwng defnyddiwr a chleient.

Mae’r pwnc hwn yn dangos sut mae dulliau o ymateb i adborth myfyrwyr yn datblygu y tu hwnt i’r dull “dywedoch chi, gwnaethom ni”, a fu’n boblogaidd yn y gorffennol. Ceir enghreifftiau hefyd o sut mae gweithio mewn partneriaethau gwirioneddol gyda myfyrwyr yn gwella arferion dysgu ac addysgu ac yn datblygu’r profiad myfyriwr cyffredinol.