Gyrfaoedd
Rydym yn cefnogi myfyrwyr i ddatblygu gwybodaeth wyddonol, profiad ymarferol, a sgiliau trosglwyddadwy sydd eu hangen gan gyflogwyr yn y farchnad swyddi byd-eang.
O ymchwilwyr canser i geidwaid anifeiliaid cigysol, amgylcheddwyr i flogwyr gwyddoniaeth, mae ein graddedigion yn mynd yn eu blaen i fwynhau ystod eang o yrfaoedd llwyddiannus a gwobrwyol.
Mae gan ein myfyrwyr enw da rhagorol am ddod o hyd i waith ar ôl iddynt raddio. Yn ôl ein data mwyaf diweddar, roedd 93% o'n graddedigion mewn cyflogaeth neu astudiaethau pellach ymhen chwe mis ar ôl graddio.
Mae cyfran sylweddol o’n graddedigion yn mynd yn eu blaen i astudio gradd meistr neu PhD, tra bod eraill yn cael gyrfaoedd llwyddiannus mewn meysydd sy’n ymwneud â gwyddoniaeth, megis ymchwil a datblygu, cadwraeth, rheoli amgylcheddol, ymchwil feddygol, cyhoeddi gwyddonol, iechyd cyhoeddus, a rheoli bywyd gwyllt, ymysg pethau eraill.
Mae hefyd gan ein graddedigion nifer o sgiliau trosglwyddadwy sy’n denu ystod eang o gyflogwyr mewn diwydiannau eraill. Yn olaf, gall gradd Biowyddoniaeth fod yn gam at gael hyfforddiant pellach mewn meysydd proffesiynol, gan gynnwys addysgu, meddygaeth, deintyddiaeth, nyrsio a gwyddoniaeth filfeddygol.
Straeon graddedigion
Cyflwynais gais am le ar gwrs Sŵoleg Caerdydd er mwyn dilyn fy mreuddwyd a bod yn amgylcheddwr. Mae'r sgiliau a ddatblygais drwy fy ngradd a'r gweithgareddau allgyrsiol ym Mhrifysgol Caerdydd wedi bod yn hanfodol er mwyn adeiladu fy ngyrfa hyd yma.
Yn ystod fy ngradd Sŵoleg israddedig yng Nghaerdydd a’r PhD dilynol, cefais fy hyfforddi yn y bôn i fod yn wyddonydd cyflawn - i werthuso gwaith eraill yn feirniadol a chanfod bylchau o fewn llenyddiaeth i ddatblygu damcaniaethau ymchwil diddorol. Mae’r sgiliau a ddatblygwyd yma wedi galluogi cynnydd cyflym i fy swydd bresennol fel Uwch-epidemiolegydd yn Uned TB Iechyd Cyhoeddus Lloegr.
Roeddwn i wastad wedi bod eisiau astudio Meddygaeth, ond yn anffodus ni chafodd fy nghais ei dderbyn y tro cyntaf. Cefais radd mewn Niwrowyddoniaeth cyn clywed am gynllun Mynediad Graddedigion i Feddygaeth (GEM), ac fe benderfynais roi cynnig arni. Mwynheais fodiwlau’r cwrs yn fawr ac roeddent wedi’u teilwra ar gyfer cwrs GEM. Cawsom ddarlithwyr cefnogol i’n helpu i baratoi ar gyfer y broses gyfweld. Rwyf nawr wedi cymhwyso fel meddyg, ac wedi cael fy swydd gyntaf mewn ysbyty.
Gwasanaethau Dyfodol Myfyrwyr
Mae Dyfodol Myfyrwyr yn cynnig ystod eang o wasanaethau drwy gydol y flwyddyn gyda’r nod o helpu myfyrwyr i ddatblygu eu sgiliau cyflogadwyedd, cynllunio ar gyfer eu dyfodol a bod yn barod i drosglwyddo i fyd gwaith. Wedi’i leoli yn y Ganolfan Bywyd Myfyrwyr ac yn agored i holl fyfyrwyr Prifysgol Caerdydd, mae ein gwasanaethau’n cynnwys:
- cyfres eang o adnoddau ar-lein gan gynnwys Dyfodol Myfyrwyr+, y cartref ar gyfer gwybodaeth, cyngor ac adnoddau gyrfaoedd wedi’u teilwra i fyfyrwyr Caerdydd
- gweithdai cyflogadwyedd ar amrywiaeth o bynciau gan gynnwys archwilio opsiynau gyrfa, CVs, ceisiadau, LinkedIn, paratoi ar gyfer cyfweliadau a llawer mwy
- apwyntiadau y gellir eu harchebu gyda Chynghorwyr Gyrfa a Chyflogadwyedd a gwasanaeth galw heibio gyda Chynorthwywyr Dyfodol Myfyrwyr
- rhaglen datblygiad proffesiynol Gwobr Caerdydd
- mynediad i ystod o gyfleoedd profiad gwaith, interniaeth a lleoliadau
- cymorth wedi’i deilwra ar gyfer grwpiau heb gynrychiolaeth ddigonol a’r rhai sydd angen cymorth un-i-un ychwanegol
- ffeiriau gyrfaoedd a digwyddiadau a arweinir gan gyflogwyr i hwyluso rhwydweithio gyda chyflogwyr graddedigion gorau a thrafodaethau ar yrfaoedd a chyfleoedd swyddi
- cyfleoedd i weithio, astudio neu wirfoddoli dramor
- mentora busnes, gwobrau cychwyn busnes, gofod desgiau poeth a chyfleoedd menter
Ar ôl i chi raddio
Nid yw ein cefnogaeth yn dod i ben ar ôl graddio, gan y bydd gennych fynediad i ystod o wasanaethau a buddion i gyn-fyfyrwyr yn unig. Gall graddedigion barhau i gael cymorth gyrfaoedd am 3 blynedd ar ôl graddio gan y byddwch yn gallu trefnu apwyntiadau gyrfaoedd, mynychu digwyddiadau a gweithdai cyflogwyr, yn ogystal â chael mynediad at gyfleoedd gwaith a gwybodaeth, cyngor ac adnoddau ar-lein.
Darganfyddwch mwy am ein cyrsiau Biowyddorau israddedig.
