Pam mynd i Brifysgol?
Bob blwyddyn, mae cannoedd o filoedd o ddarpar fyfyrwyr yn dewis addysg uwch fel y cam nesaf ar ôl yr ysgol neu’r coleg.
Nid oes angen i chi fynd i’r brifysgol a gallwch fagu gyrfa heb radd - ond gall y brifysgol gynnig cymaint mwy na gyrfa yn y pendraw.
Dyma pam dylai eich plentyn ystyried gwneud gradd.
O ran eu gyrfa
Gwella rhagolygon gyrfa
Yn 2016/17, roedd 96% o’n graddedigion mewn cyflogaeth neu astudiaethau pellach ymhen chwe mis ar ôl graddio. Gall ennill gradd wella rhagolygon gyrfa eich mab neu’ch merch, a rhoi hwb iddo/iddi. Yn ogystal â chael amrywiaeth ehangach o ddewisiadau gyrfa i ddethol o’u plith ar ôl ennill eu gradd, bydd yn debycach o wneud cynnydd yn ei yrfa'n gynt hefyd!
Dilyn galwedigaeth
Yn aml, mae myfyrwyr yn dewis astudio ar lefel addysg uwch er mwyn dilyn diddordeb mewn pwnc penodol, neu mewn galwedigaeth benodol. Mewn rhai gyrfaoedd, fel meddygaeth, nyrsio, pensaernïaeth, y gyfraith a fferylliaeth, mae’n amhosibl ymarfer heb radd alwedigaethol benodol.
Ro’n i wastad wedi bod eisiau cael fy musnes fy hun, ac fe roddodd fy amser ym Mhrifysgol Caerdydd hwb i fy meddylfryd entrepreneuraidd.
Ennill mwy
Mae’r ystadegau’n dangos y gall graddedigion ennill cryn dipyn yn fwy na’r rhai sydd heb gymwysterau addysg uwch. Fel myfyriwr graddedig, bydd dewisiadau eich mab neu’ch merch yn ehangach a bydd yn haws iddynt gael swydd a’i chadw.
Meithrin sgiliau cyflogadwy
Bydd gradd yn rhoi’r cyfle i fyfyrwyr fagu dealltwriaeth fanwl o’u pwnc dewisol, yn ogystal â datblygu sgiliau trosglwyddadwy megis sgiliau cyfathrebu, cyflwyno a datrys problemau. Bydd y rhain yn gwella eu gallu i weithio’n rhan o dîm.
O ran eu hunanddatblygiad
Magu hunanhyder, annibyniaeth a chyfrifoldeb
Gall y brifysgol helpu myfyrwyr i fagu eu hunanhyder a’u hannibyniaeth. Caiff myfyrwyr lawer o gyfleoedd i wneud ffrindiau o wahanol wledydd a chefndiroedd. Gall byw’n annibynnol feithrin ymdeimlad cryfach o gyfrifoldeb.
Astudio pwnc y maent yn ei fwynhau
Yn aml, mae myfyrwyr yn dewis astudio pwnc am eu bod wedi’i fwynhau yn yr ysgol neu’r coleg. Mae’r brifysgol yn cynnig cyfle iddynt gael dealltwriaeth well o bwnc y maent yn ei fwynhau, gan greu’r sail berffaith ar gyfer gyrfa sydd o ddiddordeb iddynt.
Mae Prifysgol Caerdydd yn adnabyddus am annog ei myfyrwyr i "deithio'r byd" a phrofi diwylliannau eraill, am fod hynny’n beth gwych ar gyfer meithrin cymeriad yn ogystal â rhagolygon gyrfa da yn y dyfodol.
Mwynhau cyfleoedd cyffrous
Mewn llawer o achosion, mae mynd i’r brifysgol yn cynnig y cyfle i astudio mewn sefydliadau addysg uwch o fri ledled y byd. Yma ym Mhrifysgol Caerdydd, mae gennym bartneriaethau gyda 300 o sefydliadau, sy’n rhoi’r cyfle i chi fynd ar leoliadau yn Ewrop a’r byd cyfan, gan ddibynnu ar eich rhaglen astudio.
O ran eu dyfodol
Ennill profiad drwy weithgareddau allgyrsiol
Mae llawer o gyfleoedd allgyrsiol ar gael yn y brifysgol, a bydd y rhain yn gyfle i fwynhau yn ogystal â rhoi hwb i'w cyflogadwyedd drwy gydol eu haddysg uwch. Mae Prifysgol Caerdydd yn cynnig dros 200 o wahanol glybiau chwaraeon a chymdeithasau i fyfyrwyr ac ar ben hynny, mae pob myfyriwr yn cael cyfle i ddysgu iaith newydd yn rhad ac am ddim drwy ein rhaglen ‘Ieithoedd i Bawb’.
Meithrin cysylltiadau fydd yn para am weddill eu hoes
Mae’r brifysgol yn cynnig y cyfle i feithrin cysylltiadau am weddill eu hoes â chyd-fyfyrwyr o wahanol gefndiroedd a diwylliannau, ynghyd â’r dinas newydd y bydd myfyrwyr yn ei galw’n gartref drwy gydol cyfnod eu harhosiad. Mae Caerdydd ymhlith y deg prifysgol fwyaf prydferth yn y DU, ac mae wastad yn barod i groesawu ei chynfyfyrwyr adref. (Times Higher Education, 2018)
Mae Caerdydd yn brifddinas ffyniannus sy'n cael ei chydnabod yn gyffredinol fel lle neilltuol o dda i fyw ynddo.
