Peirianneg Adeileddol (MSc)

Sut y caf fy addysgu?

Defnyddir ystod eang o arddulliau addysgu i ddarparu'r deunydd amrywiol sy'n llunio cwricwlwm y rhaglen. Byddwch yn mynychu darlithoedd ac yn cymryd rhan mewn dosbarthiadau enghreifftiol. Rhaid i bob myfyriwr gwblhau 120 o gredydau yng Ngham 1 er mwyn symud ymlaen i'r traethawd hir, a bryd hynny bydd goruchwyliwr yn cael ei ddyrannu i’r myfyrwyr o blith y staff addysgu. Fel arfer, dewisir pynciau traethawd hir o amrywiaeth o deitlau prosiect a gynigir gan staff academaidd, fel arfer mewn meysydd o ddiddordeb ymchwil cyfredol, er eich bod yn cael eich annog i gyflwyno eich syniadau eich hun ar gyfer prosiect.

Sut y caf fy asesu?

Asesir cyflawniad deilliannau dysgu yn y rhan fwyaf o fodiwlau drwy gyfuniad o aseiniadau gwaith cwrs, ynghyd ag arholiadau'r Brifysgol ym mis Ionawr neu ym mis Mai. Mae arholiadau'n cyfrif am 60%-70% o'r asesiad yng Ngham 1 y rhaglen, yn dibynnu ar yr opsiynau a ddewiswyd, a'r gweddill yn waith prosiect a darnau o waith cwrs yn bennaf.

Mae angen cwblhau Cam 2 yn llwyddiannus, sef y Traethawd Hir, a chael marc o 50% neu uwch er mwyn cael MSc. Gellir dyfarnu Rhagoriaeth i ymgeiswyr sy’n cael marc o 70% ar gyfartaledd. Gellir dyfarnu Teilyngdod i ymgeiswyr sy’n cael marc o 60% ar gyfartaledd. Gall ymgeiswyr nad ydyn nhw’n llwyddo i ennill cymhwyster MSc gael Diploma Ôl-raddedig ar gyfer y 120 credyd yng Ngham 1. Gall ymgeiswyr nad ydyn nhw’n llwyddo i gwblhau’r 120 credyd angenrheidiol ar gyfer Cam 1 fod yn gymwys ar gyfer dyfarniad Tystysgrif Ôl-raddedig am gyflawni o leiaf 60 credyd.

Sut y caf fy nghefnogi?

Bydd tiwtor personol yn cael ei neilltuo i chi er mwyn eich helpu gyda chynnydd academaidd a chymorth bugeiliol pan fo angen. Bydd y tiwtor personol yn eich gweld yn gynnar yn y rhaglen, ac yna yn ôl yr angen. Ar gyfer cam y traethawd hir, byddwch yn cael goruchwyliwr yn y maes ymchwil perthnasol, a dylech ddisgwyl cwrdd â’r goruchwyliwr yn rheolaidd.

Yn ogystal â'r ystod eang o wasanaethau cymorth sy’n cael eu darparu’n ganolog gan Brifysgol Caerdydd, bydd myfyrwyr ag anghenion penodol yn cael eu cefnogi yn ôl yr angen.

Bydd Dysgu Canolog, amgylchedd dysgu rhithwir Prifysgol Caerdydd, yn cael ei ddefnyddio'n helaeth i gyfathrebu â myfyrwyr, cefnogi darlithoedd a darparu deunyddiau cyffredinol rhaglenni, fel rhestrau darllen a disgrifiadau o’r modiwlau. Gellir ei ddefnyddio hefyd ar gyfer asesiadau hunan-brofi ac i roi adborth.

Adborth

Byddwch yn derbyn adborth ysgrifenedig ar gyfer aseiniadau gwaith cwrs ysgrifenedig, ac adborth llafar ar gyfer cyflwyniadau a asesir.

Pa sgiliau y byddaf yn eu hymarfer a’u datblygu?

Fel myfyriwr ar y rhaglen MSc hon mae'r sgiliau y byddwch yn eu hymarfer a'u datblygu fel a ganlyn:

Gwybodaeth a dealltwriaeth

• Deall natur amlddisgyblaethol peirianneg strwythurol a'r angen i integreiddio gwybodaeth o ystod o ddisgyblaethau peirianneg wrth reoli heriau peirianneg strwythurol.
• Dangos dealltwriaeth fanwl o egwyddorion nodweddion dur a phren a'u cymhwyso mewn codau dylunio.
• Mynd ati i gymharu’n feirniadol y dull peirianneg a mathemategol o ymdrin ag elastigedd.
• Dangos dealltwriaeth sylfaenol o nifer o gyfansoddion sy'n seiliedig ar sment a defnyddio mecaneg toriadau wrth ddylunio concrit.
• Deall yr achosion a'r technegau ar gyfer dadansoddi symudiad strwythurol a chysylltu'r rhain â dyluniad adeiladau.
• Deall sail dulliau gwahaniaeth cyfyngedig elfennau cyfyngedig a chymhwyso'r dulliau i broblemau strwythurol 2D.
• Dangos gwybodaeth sydd ar flaen y gad o ran ystod o ddisgyblaethau a ddewisir; peirianneg strwythurol, geodechnegol, amgylcheddol a phriffyrdd a rheoli peirianneg.

Sgiliau deallusol

• Defnyddio gwybodaeth a dulliau gwyddonol, sy'n seiliedig ar dystiolaeth, wrth asesu a datrys heriau peirianneg strwythurol, yn aml heb fawr o wybodaeth ac o bosibl, gwybodaeth anghyson.
• Delio â materion peirianneg strwythurol cymhleth yn systematig ac yn greadigol.
• Bod yn wreiddiol wrth fynd i'r afael â phroblemau cyfarwydd ac anghyfarwydd.
• Adolygu cefndir problem peirianneg strwythurol yn feirniadol a llunio rhaglen o waith i fynd i'r afael â'r mater.
• Cyflawni prosiect ymchwil sylweddol mewn peirianneg strwythurol yn systematig, sy'n cynnwys bod yn wreiddiol wrth gymhwyso gwybodaeth ac arfer barn peirianneg feirniadol.
• Casglu, gwerthuso, cyfosod a dehongli data ansoddol a meintiol mewn amrywiaeth o ffyrdd; a chanfod ffyrdd o gael data newydd pan fo angen.
• Ystyried, cynllunio, gweithredu a chyfleu canlyniadau darn manwl estynedig o waith prosiect unigol.
• Cynnal dadl feirniadol, yn ysgrifenedig a thrwy gyflwyniadau.

Sgiliau ymarferol

• Defnyddio dulliau mathemategol ac arbrofol priodol ar gyfer modelu a dadansoddi problemau peirianneg strwythurol.

Sgiliau trosglwyddadwy

• Trin, cyflwyno ac adrodd ar ddata mewn amrywiaeth o ffyrdd.
• Rheoli adnoddau ac amser.
• Cyfleu syniadau, egwyddorion a theorïau'n effeithiol drwy ddulliau llafar, ysgrifenedig a chorfforol neu ymarferol.