Cynllunio ymlaen llaw – Myfyrwyr Meistr yn sicrhau cymorth bwrsariaeth

Sicrhawyd tair gwobr Cronfa Fwrsariaeth Brian Large gan fyfyrwyr MSc Trafnidiaeth a Chynllunio yn Ysgol Daearyddiaeth a Chynllunio Prifysgol Caerdydd.

Bydd yr ymgeiswyr llwyddiannus Aled Evans, Stephen Hughes a Matthew Dapré yn derbyn £8,000.

Sefydlwyd Cronfa Fwrsariaeth Brian Large ym 1990 mewn teyrnged i Brian Large, gan barhau â'i waith yn cefnogi datblygiad proffesiynol a sgiliau'r rhai yng nghamau cynnar eu gyrfaoedd ac yn sicrhau y gall myfyrwyr cymwys gwblhau eu hastudiaethau ym maes trafnidiaeth a chynllunio.

Ar ôl clywed y newyddion dywedodd Aled, "Rwy'n falch iawn o gael Bwrsariaeth BrianLarge, a fydd yn cefnogi fy astudiaethau cynllunio trafnidiaeth eleni. Mae'r cwrs MSc Trafnidiaeth a Chynllunio yn rhan annatod i mi o ddatblygu sgiliau perthnasol ym maes polisi, cynllunio a rheoli trafnidiaeth."

Mae'r MSc mewn Cludiant a Chynllunio yn uchel ei pharch am ei haddysgu'n seiliedig ar ymchwil. Fe'i hachredir gan y Sefydliad Cynllunio Trefol Brenhinol (RTPI) fel rhaglen meistr 'arbenigol' a'r Sefydliad Siartredig Priffyrdd a Chludiant (CIHT)

Dywedodd Cyfarwyddwr y Rhaglen, Dr Dimitris Potoglou, "Rwy'n llongyfarch Aled, Stephen a Matthew. Mae'n dyst i'w gwybodaeth, eu galluoedd a'u hymrwymiad i ddatblygu ymarfer ac ysgolheictod ym maes cludiant a chynllunio.

"Mae eu llwyddiant yn gymeradwyaeth i'w groesawu o ansawdd a thrylwyredd ein rhaglen ac mae tri o'r pedair bwrsariaeth Brian Large a ddyfarnwyd eleni i fynd i fyfyrwyr Prifysgol Caerdydd yn newyddion gwych."