Ymchwil Caerdydd a Bryste ar y cyd i Niwrowyddoniaeth

Dechreuodd ein gwaith ar y cyd â Phrifysgol Bryste ym mis Ebrill 2006, a hynny yn fenter i alluogi mwy o rannu gwybodaeth a chydweithio rhwng ein cymunedau niwrowyddoniaeth.

Gwaith cyfredol ar cyd

Yn ystod yr ychydig flynyddoedd diwethaf, rydym wedi ymgymryd â sawl prosiect newydd ar y cyd, gan gynnwys:

• Astudiaeth o gysylltiadau rhwng aml-gydafiechedd ac anhwylderau iechyd meddwl - prosiect £3.6 miliwn a ariennir gan MRC/Sefydliad Cenedlaethol dros Ymchwil Iechyd (NIHR)
• Moddau ar gyfer deall cofnodi ac integreiddio data ar draws clwstwr bywyd cynnar (MURIDAE) - prosiect £2.7 miliwn a ariennir gan MRC
• Newidiadau biolegol a gwybyddol sy'n digwydd mewn sgitsoffrenia - prosiect gwerth £2.1 miliwn a ariennir gan y Cyngor Ymchwil Feddygol
• Deall mwtaniadau genetig mewn cyflyrau iechyd meddwl a niwroddatblygiadol - prosiect £2 filiwn a ariennir gan y Cyngor Ymchwil Feddygol (MRC)
• Haeniad cwsg mewn pobl ifanc sy'n wynebu risg uchel o seicosis - prosiect wedi'i ariannu gan Ymddiriedolaeth Wellcome gwerth £930,000
• Gwella deilliannau iechyd meddwl plant sy’n cael eu geni â hollt yr wyneb - prosiect gwerth £748,000 wedi’i ariannu gan yr Cyngor Ymchwil Feddygol

Cefndir

I ddechrau, canolbwyntiodd ein gwaith ar y cyd ar sefydlu grwpiau ffocws arbenigol mewn meysydd amrywiol o niwrowyddoniaeth, gan gynnwys seiciatreg, niwroddelweddu, sgitsoffrenia, niwrowyddoniaeth systemau, a sail fiolegol anhwylderau iechyd meddwl.

Ffurfiwyd y grwpiau hyn drwy gyfarfodydd ar y cyd, ymweliadau cyfnewid â labordai, teithiau o amgylch ein Canolfan Ymchwil Delweddu'r Ymennydd (CUBRIC) a'r Ganolfan MRI Arbrofol (EMRIC), yn ogystal â diwrnodau hyfforddi a gweithgareddau cydweithredol eraill. Arweiniodd y grwpiau ffocws hyn at nifer o brosiectau ar y cyd, ceisiadau grant, ac ysgoloriaethau PhD, diwrnodau hyfforddi, gweithdai, ac arddangosfa dridiau rhyngwladol a groesawodd dros 150 o gynrychiolwyr.

Datblygiad nodedig arall yw Diwrnod Niwrowyddonydd Gyrfa Cynnar GW4, sydd wedi’i gynnal ym Mryste (2007, 2010, 2015), Caerdydd (2008, 2012, 2017), a Chaerwysg (2019). Trefnwyd y digwyddiad hwn gan bwyllgor a oedd yn cynnwys niwrowyddonwyr ifanc o'r ddwy brifysgol. Roedd wedi helpu i feithrin perthynas waith gynhyrchiol a chydweithio parhaus, yn ogystal â denu cryn sylw gan gannoedd o niwrowyddonwyr ifanc o bob rhan o'r DU.

Er mwyn annog cydweithio pellach rhwng ein prifysgolion, cyflwynwyd cynllun gwobrau teithio, gyda grantiau gwerth hyd at £500 ar gael. Roedd y grantiau hyn yn galluogi ymchwilwyr ar ddechrau eu gyrfa i fynychu cynadleddau rhyngwladol — gan ehangu eu golwg ar y byd a chaniatáu iddynt adeiladu cyfleoedd rhwydweithio gwerthfawr.

Y Dyfodol

Wrth inni gychwyn cyfnod newydd o ddatblygiadau niwrowyddonol, mae cynnal ac ehangu ein perthynas â Phrifysgol Bryste yn mynd yn fwyfwy hanfodol. Drwy gyfuno meddyliau academaidd a chlinigol gwych ein sefydliadau ein nod yw sicrhau mai rhanbarth de Cymru/Gorllewin Lloegr fydd safon aur ymchwil niwrowyddoniaeth ac iechyd meddwl y DU.

Digwyddiadau i ddod