Tocsicoleg Feddygol (PgCert)

Sut y caf fy addysgu?

• Mae'r cwrs yn manteisio ar dechnegau dysgu seiliedig ar ymarfer a chartref (amgylchedd y myfyriwr ei hun).
• Mae'r cwrs yn cael ei reoli a'i gyflwyno drwy'r rhyngrwyd ar blatfform e-ddysgu Prifysgol Caerdydd, Dysgu Canolog.
• Mae'r rhan fwyaf o'r broses addysg yn canolbwyntio ar broblemau ac mae nifer o gydrannau integredig gwahanol i strwythur y cwrs.
• Mae yna waith darllen bob pythefnos ar gyfer pob modiwl gyda chopïau o erthyglau allweddol neu ddolenni iddyn nhw.
• Mae ymarferion clinigol rheolaidd i'w cwblhau sy'n sail i asesiadau yn ystod y cwrs. Caiff y rhain eu hadolygu gan diwtoriaid y cwrs a byddwch yn cael adborth yn ystod y cwrs.
• Mae yna fforwm trafod a rhif ffôn uniongyrchol hefyd i sicrhau cyfathrebu da â'r Brifysgol a rhwng myfyrwyr.
• Anogir ymgeiswyr i fynychu cwrs deuddydd Tocsicoleg - y Diweddaraf, sy’n cael ei drefnu gan NPIS Caerdydd i gwrdd â thîm y cwrs a chydfyfyrwyr yn bersonol. Nid oes ffi ychwanegol yn cael ei chodi am hwn.

Sut y caf fy asesu?

Mae'r asesiad ffurfiannol a chrynodol yn y cwrs yn cael ei ddarparu a'i gyflwyno drwy Dysgu Canolog. Cynhelir asesiad crynodol ar gyfer pob modiwl drwy gyfrwng un aseiniad ysgrifenedig ac un set o ymarferion prawf gwrthrychol (e.e. cwestiynau amlddewis) a gynhelir bob pythefnos drwy gydol pob un o'r modiwlau.

Mae'r ymarferion prawf gwrthrychol crynodol yn cael eu marcio'n fewnol. Mae adborth yn cael ei roi ac esbonnir yr atebion cywir i fyfyrwyr. Mae'r elfen hon yn werth 30% o'r marciau ar gyfer pob modiwl. Mae'r aseiniad ysgrifenedig yn cael ei farcio gan un o farcwyr y rhaglen ac mae'r marcio'n cael ei gymedroli gan aelod o dîm y cwrs. Mae'r elfen hon yn cyfrannu'r 70% sy'n weddill o'r marciau ar gyfer y modiwl.

Sut y caf fy nghefnogi?

Mae'r cwrs yn cael ei gyflwyno'n gyfan gwbl fel cwrs dysgu o bell drwy Amgylchedd Dysgu Rhithwir Prifysgol Caerdydd, Dysgu Canolog, lle byddwch yn dod o hyd i ddeunyddiau cwrs, asesiadau a dolenni i ddeunyddiau cysylltiedig.

Caiff tiwtor personol ei neilltuo i bob myfyriwr i roi cymorth a chefnogaeth gydag anghenion academaidd a bugeiliol. Gallwch gysylltu â’ch tiwtor personol yn rheolaidd i drafod cynnydd a chael cyngor ac arweiniad fel bo angen.

Adborth

Byddwch yn cael adborth ffurfiannol drwy ddulliau electronig ac ysgrifenedig mewn modd amserol. Bydd adborth crynodol ar asesu yn cael ei gyflwyno o fewn yr amserlen a bennwyd gan y Brifysgol.

Pa sgiliau y byddaf yn eu hymarfer a’u datblygu?

Drwy gymryd rhan lawn yn y cwrs hwn, cewch gyfle i ddatblygu sgiliau sy'n berthnasol i ddiagnosio a rheoli cleifion mewn perthynas â gwenwynau cyffredin.

Byddwch hefyd yn cael cyfle i ymarfer a datblygu nifer o sgiliau y gellir eu trosglwyddo i'ch bywyd gwaith bob dydd, fel y gallu i ddefnyddio'r llenyddiaeth feddygol gyffredinol a dod yn fwy cyfarwydd â strategaethau chwilio effeithiol ac effeithlon a ddefnyddir wrth chwilio drwy'r cronfeydd data o lenyddiaeth feddygol a ddefnyddir yn fwyaf cyffredin, a defnyddio amgylchedd dysgu rhithwir Prifysgol Caerdydd (Dysgu Canolog) a'r cyfleusterau llyfrgell ar gyfer myfyrwyr dysgu o bell yn effeithiol.

Yn ogystal, o ganlyniad i gymryd rhan lawn yn y cwrs hwn, dylech allu gwneud y canlynol

• Dangos y sgiliau sydd eu hangen i roi diagnosis o wenwyn, rheoli'r claf a defnyddio gwrthwenwynau.
• Dangos gwybodaeth drylwyr am wenwyn cyffredin, sut gellir dod i gysylltiad â gwenwyn, safleoedd gweithredu, metabolaeth cyffuriau, tocsicocineteg ac epidemioleg achosion o wenwyno.
• Dadansoddi effeithiau gwenwyndra, nodweddion gwenwyno a thociscoddeinameg cynhyrchion fferyllol cyffredin.
• Nodi'r adweithiau niweidiol, yr effeithiau niweidiol, y rhyngweithiadau a gwenwyndra mewn perthynas ag ystod o wenwynau planhigion ac anifeiliaid, cynhyrchion a meddyginiaethau anfferyllol.
• Gwybodaeth drylwyr am y mecanweithiau a'r ffactorau risg sy'n ymwneud ag adweithiau/rhyngweithiadau niweidiol i gyffuriau a dylunio strategaethau i’w canfod, eu rheoli a'u hosgoi.
• Dangos sut mae defnyddio technoleg gwybodaeth berthnasol yn effeithiol i gyfosod a chyfleu dulliau seiliedig ar dystiolaeth ar gyfer diagnosio, rheoli ac ymchwilio i wenwyno yn sgil cynhyrchion fferyllol cyffredin.
• Ymchwilio i'r gwahanol offer diagnostig a dulliau rheoli sydd ar gael ar gyfer rheoli gwenwyn yn glinigol, gan werthuso'r sylfaen dystiolaeth ar gyfer offer a dulliau o'r fath.
• Bod yn gyfrifol am ddefnyddio'r offer diagnostig a'r dulliau rheoli ar gyfer diagnosio a rheoli cleifion sydd wedi cael eu gwenwyno ac wrth lunio cynlluniau ar gyfer gwella eich arfer presennol mewn perthynas â rheoli gwenwyn.
• Trosglwyddo eich gwybodaeth am Docsicoleg Feddygol ac egwyddorion diagnosio a rheoli i'ch maes clinigol.