Hanes a threftadaeth
Mae'r thema drawsddisgyblaethol hon yn dod ag ymchwilwyr at ei gilydd sy'n archwilio'r gorffennol a'i waddol yn feirniadol.
Rydym ni'n ymchwilio sut y caiff y gorffennol ei bortreadu ac yn gweithio gyda phartneriaid yn y sectorau treftadaeth a diwylliannol i helpu i ffurfio'r ffordd y caiff ei ddarlunio yn y presennol. Yn sail i'r gwaith mae ein harbenigedd amlieithog ac amlddiwylliannol, sy'n atgyfnerthu ein hymagwedd drawswladol at hanes a threftadaeth.
Manteisiwyd ar ein harbenigedd mewnol ar y diwydiannau treftadaeth a diwylliannol i greu ein rhaglen MA Diwylliannau Byd-eang lle gall myfyrwyr astudio esblygiad diwydiannau diwylliannol mewn cyd-destun byd-eang.
Ein nod yw
- Creu cyfleoedd ar gyfer dialog a chydweithio yn yr Ysgol, yn y gymuned academaidd ehangach ym Mhrifysgol Caerdydd a thu hwnt.
- Mynd ati i ymgysylltu â'r diwydiannau treftadaeth a diwylliannol yng Nghymru ac yn rhyngwladol.
- Hyrwyddo ymchwil hanesyddol yn yr Ysgol drwy ddarparu amgylchedd colegol lle gall ymchwilwyr ar bob cam o'u gyrfa rannu a datblygu gwaith sydd ar y gweill, ac adfyfyrio a thrafod datblygiadau disgyblaethol.
- Eiriol dros bwysigrwydd hyfforddiant iaith ar gyfer ysgolheictod hanesyddol.
Ein gwaith
Nodir y thema hon gydag ysgolheictod hanes a threftadaeth yn seiliedig ar iaith mewn cyd-destun byd-eang. Mae ei haelodau'n gweithio ar draws amrywiol gyd-destunau cenedlaethol a thrawswladol yn Ewrop, Cyfandiroedd America, Affrica ac Asia.
Mae meysydd arbenigedd ein haelodau'n cynnwys cof rhyfel, caethwasiaeth, trychineb, chwyldro a chyfieithu ac yn aml byddant yn darparu sylwebaeth arbenigol yn y cyfryngau cenedlaethol a rhyngwladol. Caiff amrywiol fethodolegau a ffynonellau cyfryngol eu cwmpasu yn ein gwaith yn cynnwys ffotograffiaeth, ffilm, radio, yn ogystal â llenyddiaeth a nofelau graffig. Mae aelodau hefyd yn ymchwilio i brosesau paratoi ar gyfer amgueddfeydd a chadwraeth atgofion, a gwleidyddiaeth y cof.
Rydym ni'n ceisio adfyfyrio ar ein harferion cynhyrchu hanesyddol ein hunain ac ymarferwyr eraill, ac edrych ar sut ac i ba ddiben y caiff y gorffennol ei ddefnyddio yn y presennol. Rydym ni hefyd yn gweithio gyda phartneriaid yn y diwydiannau treftadaeth a diwylliannol i ffurfio dealltwriaeth gyfoes o'r gorffennol.
Effaith ein hymchwil
Rydym ni'n gartref i brosiectau a rhwydweithiau sy'n cynnwys ysgolheictod hanesyddol wrth ymdrin â materion cyfoes hollbwysig. Mae enghreifftiau'n cynnwys:
Y Rhwydwaith Celfyddydau a Threftadaeth Gwrth-gaethwasiaeth Mae'r rhwydwaith hwn yn mynd i'r afael â gwaddol parhaus caethwasiaeth drefedigaethol a'i chysylltiadau â mathau modern o gamfanteisio ar lafur.
Diwylliannau Arddangos Ôl-Wrthdaro a Hyrwyddo Heddwch Mae ein hymchwilwyr yn chwarae rhan flaenllaw yn y rhwydwaith hwn sy'n gweithio ar draws Coleg y Celfyddydau, y Dyniaethau a’r Gwyddorau Cymdeithasol.
Amgueddfa Rhyddhad Mae ein hymchwilwyr yn cydweithio gyda'r Amgueddfa Rhyddhad ym Mharis. Mae'r amgueddfa Ail Ryfel Byd hon yn olrhain llwybrau bywyd unigol gwrthwynebwyr Ffrainc yn cynnwys Jean Moulin a'r Cadfridog Leclerc gan ddangos sut yr arweiniodd mudiad y gwrthsafiad at Ryddhau Paris.
Ymchwil PhD
Rydym ni'n cynnig amgylchedd cefnogol ac ysgogol ar gyfer ymchwil ôl-raddedig. Rydym ni'n rhan o Raglen Hyfforddi Doethurol Cymru a De Orllewin Lloegr yr AHRC, ac yn cynnig cyfleoedd rheolaidd ar gyfer astudio doethurol lle caiff ymchwil ei chynnal ar y cyd â sefydliadau diwylliannol a threftadaeth.
Os yw eich ymchwil yn cyd-fynd â disgrifiad a nodau'r thema hon, a'ch bod yn yn dymuno cynnal eich astudiaethau MPhil neu PhD gyda ni, edrychwch ar broffiliau ein haelodau arbenigol o staff a chysylltwch â'n gweinyddwr ymchwil ôl-raddedig.
Gweinyddwr ymchwil ôl-raddedig
Ein goruchwylwyr PhD
Mae Dr Tilmann Altenberg yn cynnig goruchwylio ym meysydd hanes diwylliannol a llenyddol yn cynnwys y byd Sbaeneg ei iaith, a threftadaeth rhyfel a chwyldro.
Mae'r Athro David Clarke yn cynnig goruchwylio mewn amrywiaeth eang o themâu’n ymwneud â gwleidyddiaeth a diwylliant cof a threftadaeth, yn cynnwys atgofion am ddioddefaint, atgofion am gomiwnyddiaeth, atgofion rhyfel a gwrthdaro a materion yn ymwneud ag astudiaethau amgueddfa.
Mae'r Athro Hanna Diamond yn croesawu ceisiadau gan fyfyrwyr PhD sydd â diddordeb ym mhob agwedd ar hanes a gwleidyddiaeth Ffrainc yn yr ugeinfed ganrif mewn perthynas â rhywedd a hanes llafar.
Mae Dr Heiko Feldner yn croesawu ymholiadau'n ymwneud â hanes a chysyniad cyfalafiaeth, gwerthusiad o ideolegau cyfoes, yr ysgol barnu-gwerth Almaenig (Wertkritik) a pherthnasedd cyfoes Marx, Foucault a Žižek.
Gall Dr Dorota Goluch oruchwylio ymchwil ar theori cyfieithu a hanes, yn enwedig ar bynciau sy'n ymwneud â chyfieithu, ôl-drefedigaeth ac actifiaeth; Cyfieithu a derbyniad llenyddol Pwyleg; cyfieithu a'r Holocost; cyfieithu mewn amgueddfeydd coffa.
Yr Athro Claire Gorrara
Deon Ymchwil ac Arloesi ar gyfer Coleg y Celfyddydau, y Dyniaethau a'r Gwyddorau Cymdeithasol, Athro Astudiaethau Ffrangeg
Gall yr Athro Claire Gorrara oruchwylio mewn meysydd yn ymwneud â hanes ac atgofion yr Ail Ryfel Byd yn Ffrainc; diwylliant poblogaidd a gwleidyddiaeth y cof; nofelau graffig ac ysgrifennu am hanes.
Mae'r Athro Kate Griffiths yn goruchwylio ar addasu a chyfieithu o unrhyw gyfnod o hanes mewn cyd-destunau Ffrengig a byd-eang. Mae'n hapus i weithio ar wahanol gyfryngau (radio, ffilm, teledu, theatr, llenyddiaeth) a gwahanol genhedloedd.
Mae Dr Charlotte Hammond yn canolbwyntio ar hanes a gwaddol caethwasiaeth drefedigaethol yn y Caribî; perfformiad rhywedd, tecstilau a gwisg fel gwrthsafiad gwrth-drefedigaethol; mathau modern o gaethwasiaeth mewn cadwyni cyflenwi dillad.
Mae Dr Alastair Hemmens yn croesawu ceisiadau am oruchwylio ar bob maes yn hanes diwylliannol a deallusol modern Ffrainc. Mae ei ddiddordebau ymchwil yn canolbwyntio'n benodol ar theori ac ymarfer Marcsaidd, gwrth-gyfalafiaeth a'r avant-garde yn Ffrainc yn yr ugeinfed ganrif.
Mae Dr Christopher Hood yn cynnig goruchwylio ar amrywiaeth eang o bynciau'n ymwneud â Japan, yn cynnwys agweddau ar goffau a thwristiaeth dywyll.
Hanesydd diwylliannol yw Dr Nick Hodgin gyda diddordeb penodol yn yr ugeinfed ganrif ac astudiaethau diwylliannol cyfoes, yn ogystal ag astudiaethau ffilm, astudiaethau'r cof ac astudiaethau trawma. Ei ddiddordebau ymchwil penodol yw diwylliant yr Almaen, yn enwedig diwylliant gweledol.
Gall Dr Cristina Marinetti oruchwylio ymchwil ar theori cyfieithu, yn enwedig ar ymagweddau diwylliannol a chymdeithasegol at gyfieithu, hanes theatr a chyfieithu theatr a'r portread o amlieithrwydd yn yr Eidal gyfoes.
Gall Dr Ruselle Meade oruchwylio ar bynciau'n ymwneud â hanes cyfieithu, yn enwedig mewn cyd-destunau Dwyrain Asia; hanes Modern Japan; ac atgofion rhyfel.
Mae Dr Jenny Nelson yn croesawu ceisiadau am oruchwylio ar hanes Brasil yn y bedwaredd ganrif ar bymtheg, hanes cymharol America Ladin, yr Iwerydd Lwsoffon, Diaspora Afficanaidd, caethwasiaeth a'i gwaddol yn America Ladin a'r Caribî.
Cysylltu â ni
Rydym ni'n cynnal seminarau gyda siaradwyr gwadd o'r byd academaidd a'r sectorau treftadaeth, yn ogystal â gweithdai, cynadleddau bach, byrddau crwn ac encilion darllen.
Os hoffech siarad yn un o'n digwyddiadau neu ymholi am ymchwil cysylltwch â Dr Jenny Nelson neu Dr Nick Hodgin.
Caiff ein cyfleoedd PhD ac MPhil eu grwpio ynghyd dan faner Astudiaethau Iaith a Chyfieithu.