Amdanom ni

Rydym yn Ysgol fywiog, lewyrchus a chartrefol.

Er mai ni yw'r adran Gymraeg hynaf yng Nghymru, rydym yn edrych tua'r dyfodol ac ar ddatblygiad ein hiaith, ein cymdeithas a'n hunaniaeth yn y Gymru gyfoes.

Cyfunir astudiaethau ym maes iaith a llên â modiwlau unigryw sy’n ymwneud â’r Gymraeg yn y Gymru gyfoes. A beth bynnag y bo’r meysydd dan sylw — o farddoniaeth ganoloesol hyd at dechnoleg iaith — byddwn bob amser yn defnyddio dulliau arloesol a blaengar i’w hastudio. Mae'r amrywiaeth eang o fodiwlau ar gael i fyfyrwyr israddedig yn cynnwys astudiaethau cyfieithu, technoleg iaith mewn oes ddigidol, sosioieithyddiaeth, caffael iaith, ethnigrwydd ac amlddiwylliannedd, mapio’r Cymry, a diwylliant Cymraeg dinas Caerdydd, a llawer mwy.

Gyda staff academaidd blaenllaw a gweithgar yn eu meysydd, rydym yn dylanwadu ar fywyd cymdeithasol, diwylliannol a gwleidyddol.

Rydym yn bwydo ein harbenigeddau ymchwil i’n dysgu ac yn awyddus i feithrin eich sgiliau a chyfrannu at eich llwyddiant mewn ffordd a fydd yn gwneud gwahaniaeth i'ch dyfodol. Yn ôl yr ystadegau diweddaraf mae 91% o raddedigion yr Ysgol yn gweithio neu yn ymgymryd ag astudiaethau pellach o fewn chwe mis i raddio. Cewch nifer o gyfleoedd hefyd i ddilyn cyfnod o brofiad gwaith mewn amrediad o sefydliadau.

Y tu hwnt i raglenni gradd, rydym yn helpu i sicrhau ffyniant yr iaith trwy wasanaethu'r gymuned leol. Mae ein Canolfan Cymraeg i Oedolion yn dysgu'r iaith i dros 1,700 o oedolion yng Nghaerdydd a'r Fro. Yn ogystal â hyn, mae cynllun newydd Cymraeg i Bawb yn cynnig y cyfle i fyfyrwyr Prifysgol Caerdydd ddysgu Cymraeg yn rhad ac am ddim, ochr yn ochr â'u hastudiaethau mewn meysydd eraill.