Ysgol yn ymuno â phartneriaeth dysgu fyd-eang
16 Mai 2019
![Two female students sat at a computer](https://cardiff.imgix.net/__data/assets/image/0005/1496660/Students-using-trading-room.jpg?w=570&h=321&fit=crop&q=60&auto=format)
Mae Ysgol Busnes Caerdydd wedi’i chydnabod yn arweinydd ym maes dysgu drwy brofiad.
Yr Ysgol yw’r diweddaraf i ddod yn Bartner Dysgu Profiadol (ELP) Bloomberg, sef grŵp neilltuedig o sefydliadau addysgol byd-eang.
Mae ELP Bloomberg yn cydnabod sefydliadau academaidd fel arweinwyr ym maes dysgu drwy brofiad drwy gynnwys arferion terfynellau Bloomberg yn eu cwricwla.
Ymwybyddiaeth o’r farchnad a pharodrwydd gyrfaol
Nod y fenter yw creu cymuned o brifysgolion ac athrawon cyfoedion sy’n cynnig cyrsiau arloesol i fyfyrwyr er mwyn meithrin eu hymwybyddiaeth o’r farchnad ariannol a’u parodrwydd gyrfaol.
![Black and white logo](https://cardiff.imgix.net/__data/assets/image/0005/1496732/Bloomberg-ELP-logo.jpg?w=575&ar=16:9)
Dywedodd Dr Woon Wong, Cyfarwyddwyr Gweithrediadau Ystafell Fasnachu Ysgol Busnes Caerdydd: “Mae cydnabod yr Ysgol fel ELP Bloomberg wedi amddiffyn themâu strategol Y Ffordd Ymlaen sy’n anelu at wneud Prifysgol Caerdydd yn sefydliad addysgol o’r radd flaenaf sy’n rhoi pwyslais ar ragoriaeth ei hymchwil...”
![](https://cardiff.imgix.net/__data/assets/image/0009/691569/wong_w.jpg?w=100&h=100&auto=format&crop=faces&fit=crop)
“Yn wir, cychwynnwyd ystafell fasnachu terfynellau Bloomberg yn gyntaf gan Kent Matthews, Athro Bancio a Chyllid Syr Julian Hodge, er mwyn cynnig amgylchedd addysgu ac ymchwil ardderchog i academyddion a myfyrwyr ill dau.”
Cyflawnodd Ysgol Busnes Caerdydd feini prawf cymhwysedd Bloomberg er mwyn cael ei hystyried ar gyfer y rhaglen. Rhagorodd yr Ysgol ym meysydd darparu cyrsiau a defnyddio terfynellau Bloomberg.
Sefyllfaoedd yn y byd go iawn
Mae’r terfynellau’n ffurfio rhan o Ystafell Fasnachu o’r radd flaenaf yr Ysgol (sef y mwyaf yng Nghymru) sydd wedi’i lleoli yn y Ganolfan Addysgu Ôl-raddedigion gwerth £13.5 miliwn.
Defnyddir Bloomberg ym mhum modiwl ar draws cwricwlwm israddedig ac ôl-raddedig yr Ysgol – mae oddeutu 1093 o fyfyrwyr wedi cofrestru arnynt.
Mae Bloomberg hefyd yn ffurfio rhan o’r gronfa ddata y mae myfyrwyr yn ei defnyddio i ysgrifennu traethodau hir MSc.
Meddai Dr Hossein Jahanshahloo, Darlithydd mewn Cyllid yn Ysgol Busnes Caerdydd: “Rydym yn ymdrechu i roi profiad dysgu bywiog i’n myfyrwyr. Profiad sy’n rhyngweithiol ac yn ennyn eu diddordeb mewn ffordd efallai na fyddai ystafell addysgu draddodiadol yn ei gwneud...”
![](https://cardiff.imgix.net/__data/assets/image/0009/1422963/jahanshahloo_h.jpg?w=100&h=100&auto=format&crop=faces&fit=crop)
“Mae’r math hwn o ddull ymarferol hefyd yn hanfodol wrth roi mantais gystadleuol iddynt pan fyddant yn mynd i’r gweithlu.”
“Felly, yn ogystal â rhoi’r cyfle i fyfyrwyr ddatblygu sgiliau dadansoddi y gallant eu defnyddio mewn sefyllfaoedd yn y byd go iawn, mae ein partneriaeth yn stamp gymeradwyo ar gyfer darpar gyflogwyr sydd bob amser yn chwilio am raddedigion sydd â dealltwriaeth o Bloomberg.”