OPT039 - Therapiwteg Ocwlar ar gyfer mân gyflyrau llygaid

Nod y modiwl hwn yw darparu diweddariad i chi ar y cyffuriau y gall optometryddion cofrestredig yn y DU eu cyflenwi neu eu gwerthu fel rhan o’u hymarfer proffesiynol ar gyfer trin mân gyflyrau llygaid sy’n effeithio ar flaen y llygad a’r rhithbilennau.

Mae'r diweddariad hwn yn ymwneud ag optometryddion y DU heb gymwysterau cyflenwi na rhagnodi annibynnol ychwanegol, ac mae'n cynnwys yr holl gynhyrchion meddyginiaethol ar GSL a phob meddyginiaeth P, yn ogystal â POMs y gellir eu gwerthu neu eu cyflenwi mewn argyfwng.

Modiwl dysgu o bell yn unig yw’r modiwl hwn. Nid oes unrhyw elfen ymarferol i'r modiwl hwn. Mae'r modiwl hwn yn cael ei astudio dros un semester.

Amcanion dysgu

Ar ôl cwblhau’r modiwl, dylech allu gwneud y canlynol:

• gwneud penderfyniadau rheoli ar y strategaethau rheoli priodol ar gyfer mân gyflyrau’r llygaid sy'n effeithio ar flaen y llygad
• dangos gwybodaeth fanwl am gyffuriau therapiwtig ocwlar sy'n gynhyrchion meddyginiaethol GSL, meddyginiaethau P a POMs y gellir eu gwerthu neu eu cyflenwi mewn argyfwng
• dangos dealltwriaeth o sut i fonitro'r ymateb i driniaeth, adolygu'r gwaith a'r diagnosis gwahaniaethol, ac addasu triniaeth neu gyfeirio / ymgynghori / ceisio arweiniad fel y bo'n briodol
• llunio, argymell a chyfiawnhau (drwy ddarparu tystiolaeth o arfarnu'r llenyddiaeth) gynllun rheoli priodol

Dull cyflwyno’r modiwl

Bydd y modiwl hwn yn cael ei gyflwyno drwy gyflwyniadau a darlithoedd Xerte ar-lein a gyflwynir trwy Dysgu Canolog, sef system e-ddysgu'r Brifysgol, gydag adnoddau a chyfeiriadau ategol yn cael eu darparu. Mae trafodaethau achos rhyngweithiol ac addysgu arall mewn gweminarau, a chynigir aseiniadau ffurfiannol i arwain a gwella dysgu.

Bydd byrddau trafod y gellir eu cyrchu trwy Dysgu Canolog yn rhoi llwyfan i chi drafod unrhyw gwestiynau neu ymholiadau a ddaw i fyny drwy gydol y tymor gyda thiwtoriaid y cwrs a'ch cyd-fyfyrwyr.

Sgiliau a gaiff eu hymarfer a'u datblygu

Sgiliau academaidd

• Datblygu eich gwybodaeth a'ch dealltwriaeth eich hun
• Casglu ynghyd a chyfosod gwybodaeth o sawl adnodd i wella dysgu
• Ysgrifennu'n gryno ac yn glir ar gyfer y gymuned academaidd a chlinigol
• Dehongli data

Sgiliau cyffredinol

• Rheoli prosiectau ac amser
• Gweithio’n annibynnol
• Defnyddio ystod o becynnau meddalwedd TG ac adnoddau ar-lein
• Datrys problemau

Dull asesu’r modiwl

Byddwch yn cael eich argymell i gyflwyno ateb byr ffurfiannol i gael adborth cyn y gwaith cwrs crynodol.

• Gwaith cwrs ysgrifenedig (100%): Rhoddir senarios ichi sy'n cynrychioli ymgyflwyniadau arferol cleifion wrth ymarfer yn y DU. Bydd gofyn i chi ymchwilio i'r rhain a chyflwyno cynllun rheoli priodol ar ffurf ateb byr, ei argymell a’i gyfiawnhau.