System Prifysgol Illinois

Prifysgol Illinois Urbana-Champaign yw un o’r 37 sefydliad grant tir cyhoeddus gwreiddiol a grëwyd ar ôl i’r Arlywydd Abraham Lincoln lofnodi Deddf Morrill ym 1862.

Mae’r brifysgol yn y gefeillddinasoedd Champaign ac Urbana (poblogaeth o 207,000) yn nwyrain canol Illinois. Mae tua 140 milltir i’r de o Chicago, 125 milltir i’r gorllewin o Indianapolis a 180 milltir i’r gogledd-ddwyrain o St Louis.

Yn rhan o gymuned Prifysgol Illinois Urbana-Champaign mae 29 o enillwyr Gwobr Pulitzer. Y brifysgol hefyd a ddyfeisiodd y porwr gwe graffigol cyntaf.

Mae gan y brifysgol fwy na 56,000 o fyfyrwyr sy’n hanu o bob un o 50 talaith UDA a mwy na 100 o wledydd ledled y byd.

Mae gan Brifysgol Illinois Urbana-Champaign 15 o golegau ac unedau hyfforddi:

• Y Coleg Gwyddor Defnyddwyr a’r Gwyddorau Amaethyddol ac Amgylcheddol
• Y Coleg Gwyddorau Iechyd Cymhwysol
• Coleg Busnes Gies
• Y Coleg Addysg
• Coleg Peirianneg Grainger
• Coleg y Celfyddydau Cain a Chymhwysol
• Coleg y Graddedigion
• Yr Ysgol Llafur a Chysylltiadau Cyflogaeth
• Coleg y Gyfraith
• Coleg y Celfyddydau a'r Gwyddorau Rhyddfrydol
• Yr Ysgol Gwyddor Gwybodaeth
• Coleg y Cyfryngau
• Coleg Meddygaeth Carle Illinois
• Yr Ysgol Gwaith Cymdeithasol
• Y Coleg Milfeddygaeth

Prifysgol Illinois Chicago yw prifysgol fwyaf ac unig sefydliad Carnegie Ymchwil 1 cyhoeddus y ddinas.

Mae ei 16 coleg blaenllaw (y mae saith coleg gwyddorau iechyd ac unig ysgol cyfraith gyhoeddus Chicago yn eu plith) yn gwasanaethu mwy na 33,500 o fyfyrwyr israddedig, ôl-raddedig a phroffesiynol.

Mae Prifysgol Illinois Chicago yn cael ei chydnabod yn un o’r prifysgolion cyhoeddus gorau ac un o’r campysau mwyaf ethnig a diwylliannol amrywiol yn y genedl.

A hithau wedi’i lleoli yng nghanol Chicago, mae’n rhan annatod o wead addysgol, technolegol a diwylliannol un o ddinasoedd mwyaf y byd.

Cafodd ei sefydlu ym 1969 gan Gynulliad Cyffredinol Illinois, a hynny o dan yr enw Prifysgol Daleithiol Sangamon. Ar 1 Gorffennaf 1995, daeth yn un o gampysau System Prifysgol Illinois. Prifysgol Illinois Springfield oedd ei henw newydd ar ôl hynny.

Mae Prifysgol Illinois Springfield yn dathlu ei hamrywiaeth gyda champws sy’n cynnwys myfyrwyr a staff o wahanol oedrannau, cefndiroedd a chymunedau ethnig.

Mae ganddi bedwar coleg: Busnes a Rheolaeth; Iechyd, Gwyddoniaeth a Thechnoleg; Y Gwyddorau Cymdeithasol a’r Celfyddydau Rhyddfrydol; Addysg a Materion Cyhoeddus.

Mae gan Brifysgol Illinois Springfield gyfanswm o fwy na 4,500 o fyfyrwyr, 60 o raglenni israddedig a 44 o raglenni ôl-raddedig.

Mae’n cynhyrchu tua $7 miliwn bob blwyddyn mewn cyllid ymchwil.

Mae Prifysgol Illinois Springfield wedi’i lleoli yn ne-ddwyrain Springfield, Illinois, ger Llyn Springfield. Mae tua 200 milltir i’r de-orllewin o Chicago a 100 milltir i’r gogledd-ddwyrain o St Louis. Mae ei champfa yn ymestyn dros 746 erw.

Mae’r DPI yn grymuso pobl i roi cychwyn egnïol i’w gyrfaoedd neu gwmnïau technoleg yn Chicago.

Mae’r DPI, o dan arweiniad System Prifysgol Illinois ar y cyd â phrifysgolion ymchwil o’r radd flaenaf, yn gwneud tri pheth: hyfforddi pobl ar gyfer swyddi technoleg y mae galw mawr amdanyn nhw; gwneud gwaith ymchwil a datblygu; a datblygu busnesau i dyfu ecosystem dechnoleg Chicago.

Mae’r DPI yn sefydliad ymchwil ryngddisgyblaethol preifat-gyhoeddus sydd wrth galon Rhwydwaith Arloesi Illinois. Ynghyd â nifer fach o bartneriaid rhyngwladol eraill, mae Prifysgol Caerdydd yn Aelod Academaidd o’r DPI (ac wedi bod yn aelod ers 2018).

Mae gwaith Prifysgol Caerdydd gyda’r DPI eisoes wedi arwain at dri chais i Sefydliad Gwyddoniaeth Cenedlaethol (NSF) UDA a chais llwyddiannus am grant sbarduno gan y DPI mewn cysylltiad â’r “Llwybr at Sero Net” ar gyfer cerbydau trydan yn ardal Chicago.

Y DPI yw angor cymdogaeth newydd, lle mae 13 miliwn troedfedd sgwâr o swyddfeydd, siopau, preswylfeydd a gwestai wedi’i fapio.

Mae cyfleuster y DPI yn cynnwys:

• Labordai cyfrifiant a pheirianneg
• Ystafelloedd dosbarth
• Swyddfeydd a labordai i ddechrau busnes
• Mannau ar gyfer cyfarfodydd a digwyddiadau
• Man cyhoeddus