Grŵp Lipidomeg Caerdydd

Nod pen draw ein hymchwil yw deall metaboledd lipidau’n well a'r rôl weithredol y mae lipidau yn ei chwarae mewn diabetes, strôc, canser, arthritis, clefyd Alzheimer a chlefydau eraill sy'n seiliedig ar lipidau er mwyn hwyluso datblygiad triniaethau mwy effeithiol.

Mae Strategaeth Metabolitau a Llwybrau LIPIDAU (LIPID MAPS_®) yn ymdrech aml-sefydliad a grëwyd yn 2003 i nodi a meintioli, gan ddefnyddio dull bioleg systemau a sbectromedrau màs soffistigedig, yr holl rywogaethau lipidau mawr - a llawer o’r mân rywogaethau - mewn celloedd mamaliaid, yn ogystal á meintioli'r newidiadau yn y rhywogaethau hyn mewn ymateb i aflonyddiad.

Ers ein sefydlu, rydym wedi cymryd camau breision tuag at ddiffinio'r "lipidome" (rhestr o'r miloedd o rywogaethau moleciwlaidd lipidau unigol) ym macroffag y llygoden. Rydym hefyd wedi gweithio i wneud dadansoddi lipidau yn haws ac yn fwy hygyrch i'r gymuned wyddonol ehangach ac i ddatblygu seilwaith ymchwil cadarn ar gyfer y gymuned ymchwil ryngwladol.

Rydym yn rhannu canfyddiadau a dulliau lipidomeg newydd, yn cynnal cyfarfodydd blynyddol sy'n agored i bob ymchwilydd â diddordeb, ac yn archwilio ymdrechion ar y cyd i ehangu'r defnydd o'r dulliau newydd pwerus hyn i gymhwysiad newydd.

Mae ein labordy yn gartref i ddau offeryn AB Sciex Q-Trap (4000, 6500) a ThermoFisher Orbitrap Elite, sydd ar gael ar gyfer astudiaethau cydweithredol am gost isel.

Ymchwil

Rhennir yr ymchwil yn ddau brif gam.

Eicosanoidau esteredig mewn imiwnedd cynhenid

Darganfuom sawl teulu o lipidau newydd sy'n cael eu cynhyrchu trwy actifadu aciwt gan gelloedd imiwnedd cynhenid. Maent yn arddangos bioweithgareddau amrywiol gan gynnwys hyrwyddo ceulo a rheoleiddio ymatebion gwrth-bacteriol lewkosytau. Ein rhagdybiaeth yw eu bod yn chwarae rhan ffisiolegol mewn ymatebion clwyfo, ond gallai eu camreoleiddio gyfrannu at thrombosis gwythiennol ac atherosglerosis. Mae astudiaethau cyfredol a arweinir gan y grŵp yn canolbwyntio ar ddeall eu swyddogaeth mewn iechyd ac afiechyd

Darganfod cyfryngwyr lipidau newydd gan ddefnyddio LC/MS/MS cydraniad uchel a dulliau biowybodeg

Rydym yn datblygu dulliau newydd i alluogi darganfod dosbarthiadau lipidau ychwanegol sydd o bwys ar gyfer iechyd ac afiechyd. Yn fras, rydym yn amcangyfrif nad yw cyfran fawr o lipidau presennol mewn celloedd mamalaidd wedi'u nodweddu’n adeileddol hyd yn hyn. Mae llawer o ddarganfyddiadau allweddol yn dal i gael eu gwneud ynghylch y dosbarth biomoleciwlau mewndarddol pwysig hwn.

Cyllid

Rhaglen Ymddiriedolaeth Wellcome (£1.3m grant) i gynnal y gronfa ddata lipidau mwyaf yn y byd ac adnoddau cysylltiedig. Bydd y grant newydd, a ddyfarnwyd gan Ymddiriedolaeth Wellcome, yn galluogi Sefydliad Ymchwil Imiwnedd Systemau Prifysgol Caerdydd, Sefydliad Babraham, Caergrawnt; a Phrifysgol California San Diego (UCSD), i barhau â'r gwaith pwysig o amlygu a dadansoddi lipidau. Dyma'r moleciwlau y mae ein cyrff yn eu defnyddio i reoleiddio prosesau arferol megis gwaed yn ceulo, ymladd heintiau a datblygu.
Rhaglen Ymddiriedolaeth Wellcome (£1.2M, 2011-2016): Ei nod yw deall bioleg celloedd a bioffiseg y lipidau ac asesu eu rôl mewn thrombosis gwythiennol mewn astudiaeth glinigol.
Rhaglen Sefydliad Prydeinig y Galon (£820K, 2012-2017): Ei nod yw asesu rôl y lipidau newydd yn natblygiad atherosglerosis mewn modelau llygoden.
Grant Ymchwil y Cyngor Ymchwil Feddygol (£820K, 2015-2019): Ei nod yw asesu rôl y lipidau mewn ffisioleg croen arferol ac ymatebion clwyfau in vivo.
Gwobr Gwella Ymddiriedolaeth Wellcome (£120K, 2014-2016): Ei nod yw datblygu dulliau synthesis cyflawn ar gyfer cynhyrchu lipidau newydd ar gyfer astudiaethau biolegol.
Grant Uwch y Cyngor Ymchwil Ewropeaidd (€2.9M, 2014-2019). Datblygu dull cydraniad uchel o'r enw LipidArrays a fydd yn galluogi nodweddu amrywiaeth a nifer y lipidau mewn samplau biolegol. Rydym yn canolbwyntio'n arbennig ar ddatblygiad celloedd, clefyd cardiofasgwlaidd a dementia yn yr astudiaeth hon. Mae datblygiad dulliau sylweddol wedi cynnwys datblygu meddalwedd newydd ar y cyd â'r Ysgol Cyfrifiadura a Gwybodeg.