Helpu babanod i deimlo’n hapusach
1 Awst 2017
Mae astudiaeth newydd gan ymchwilwyr ym Mhrifysgol Caerdydd yn ceisio tyrchu’n ddyfnach i awgrymiadau bod babanod yn deall nid yn unig geiriau, ond hefyd goslef llais.
Dan arweiniad Dr Netta Weinstein o’r Ysgol Seicoleg, bydd yr astudiaeth yn edrych ar y gwahanol fathau o negeseuon cadarnhaol y mae babanod rhwng 10-12 mis oed yn eu deall
Bydd babanod yn gweld cyfres o luniau ar sgrîn ac yn clywed brawddegau byr i weld sut gall goslef llais eu hysgogi.
Dywedodd Dr Weinstein: “Mewn llawer o sefyllfaoedd, mae babanod yn deall ystyr yr hyn a ddywedwyd wrthynt cyn eu bod yn deall y geiriau. Mae ymchwil wedi dangos bod babanod yn gallu gwahaniaethu rhwng negeseuon cadarnhaol a negyddol megis rhybuddion a geiriau sy’n eu cysuro erbyn eu bod nhw’n 5 mis oed.
“Yn ein hastudiaeth, mae gennym ddiddordeb arbennig yn y modd y gall lleisiau helpu babanod i deimlo'n hapusach ac yn fwy hyderus. Mewn geiriau eraill, mae gennym ddiddordeb yn y modd y mae lleisiau’n ysgogi babanod...”
“Gwyddom fod negeseuon cymhellol erbyn y pryd y mae’r plentyn yn dechrau ysgol yn bwysig i ba mor dda y gwnânt yn yr ysgol. Ond ychydig iawn rydyn ni’n ei wybod ynghylch p’un a yw babanod yn poeni ynghylch y negeseuon cymhellol y mae lleisiau yn eu mynegi, neu a ydyn nhw’n cael eu haffeithio ganddynt.”
Mae ymchwilwyr yn chwilio am deuluoedd sydd â babanod 10 i 12 mis oed sy'n barod i gymryd rhan yn yr astudiaeth fer fydd yn para chwarter awr.
Cynhelir yr astudiaeth yng Nghanolfan Gwyddoniaeth Datblygiad Dynol newydd Prifysgol Caerdydd, a bydd y rhai sy’n cymryd rhan yn cael £7 am eu hamser. Bydd babanod yn cael tegan i’w diolch am eu help.
Os oes gennych ddiddordeb mewn cymryd rhan anfonwch ebost at Tiny to Tots am fanylion pellach.
