Myfyrwyr yn ymuno ag Urdd Gobaith Cymru i lansio neges wrth-hiliaeth

Mae myfyrwyr Prifysgol Caerdydd ac Urdd Gobaith Cymru yn rhoi sylw i wrth-hiliaeth fel rhan o Neges Heddwch ac Ewyllys Da blynyddol yr elusen Gymreig.

Mae mudiad ieuenctid mwyaf Cymru yn galw ar bobl ar draws y byd i’w Galw Allan, cyn ei Eisteddfod flynyddol yn Sir Gaerfyrddin, lle bydd gan y Brifysgol hefyd bresenoldeb.

Wedi ei chreu mewn gweithdy yng Nghaerdydd, mae neges gwrth-hiliaeth 2023 yr Urdd yn galw ar bobl ar draws y byd i ‘annog caredigrwydd, dysgu i dderbyn ac i alw allan hiliaeth a rhagfarnau’.

Mae’r neges, sy’n cael ei chefnogi gan y cerddor Eäydyth, yn cael ei chyflwyno mewn ffilm fer a’i rhyddhau heddiw ar lwyfannau cyfryngau cymdeithasol yr Urdd.

Dywedodd Y Dirprwy Is-Ganghellor Yr Athro Damian Walford Davies: “Mae aelodau staff a myfyrwyr Prifysgol Caerdydd yn eilio’r pwyslais ar wrth-hiliaeth sy’n nodweddu neges Heddwch ac Ewyllys Da yr Urdd eleni. Ysgwydd-yn-ysgwydd â’r Urdd, rydym yn ein herio ein hunain yn ogystal ag eraill i brofi, drwy weithredoedd, ein bod yn wrth-hiliol.”

Meddai Siân Lewis, Prif Weithredwr yr Urdd: “Pob blwyddyn mae’r Urdd yn rhoi llais a llwyfan i ieuenctid Cymru gael eu clywed ar draws y byd, ac mae ein neges gwrth-hiliaeth yn neges di flewyn ar dafod, yn dweud wrth bawb fod yn rhaid i ni alw allan hiliaeth pryd bynnag a lle bynnag y byddwn yn ei weld.

“Fel sefydliad rydym yn cydnabod bod yn rhaid i ni gymryd camau a chyfrifoldeb i wneud yn siŵr nad oes lle i hiliaeth yn y byd. Mae’r Urdd i bawb, ac fel Mudiad mae’n bwysig ein bod ni’n cynrychioli ac yn adlewyrchu Cymru gyfoes.”

Dywedodd y Prif Weinidog Mark Drakeford: "Mae neges Heddwch ac Ewyllys Da yr Urdd yn parhau i chwarae rhan annatod wrth gyflwyno gwerthoedd Cymru ledled y byd. "Rwy'n falch iawn o gefnogi'r neges eleni sy'n galw ar ddinasyddion y byd i weithredu a gwrthwynebu hiliaeth a rhagfarnau anymwybodol.

"Mae'r neges bwysig hon yn rhan o weledigaeth Llywodraeth Cymru i fod yn genedl wrth-hiliol erbyn 2030 - man lle gallwn ni oll fyw a ffynnu, gan greu cymdeithas lle mae pawb yn cael eu gwerthfawrogi."

Mae Neges Heddwch ac Ewyllys Da yr Urdd yn rywbeth unigryw i Gymru. Am dros ganrif, ar 18 Mai mae pobl ifanc Cymru wedi rhannu negeseuon ar themâu sy’n bwysig iddyn nhw trwy rannu’r neges gyda’r byd.

Mae neges gwrth-hiliaeth yr Urdd ar gael mewn amryw o ieithoedd, yn ogystal â BSL a gellir ei lawr-lwytho yma.  Mae’r Urdd yn annog pobl ledled y byd i helpu rhannu lleisiau Ieuenctid Cymru ar 18 Mai drwy rhannu’r neges ar y cyfryngau cymdeithasol a defnyddio’r hashnod #Heddwch2023.

https://youtu.be/9FnRXSwW5sM

Bydd Prifysgol Caerdydd yn Eisteddfod yr Urdd Sir Gaerfyrddin ar 29 Mai. Cewch ragor o wybodaeth am ein rhaglen o ddigwyddiadau yma.