Prosiect dan arweiniad Prifysgol Caerdydd yn rhan o raglen COP27

Mae prosiect dan arweiniad Prifysgol Caerdydd sy’n dogfennu effeithiau go iawn newid yn yr hinsawdd ar gymunedau bregus yn Sychdiroedd Corn Affrica (HAD) yn rhan o raglen swyddogol COP27.

Bydd prosiect DOWN2EARTH, wedi’i gyllido gan raglen Horizon 2020 yr Undeb Ewropeaidd, dan arweiniad yr Athro Michael Singer, Dirprwy Gyfarwyddwr Sefydliad Ymchwil Dŵr y Brifysgol, yn dangos dwy ffilm fer ar ddiogelwch dŵr a bwyd yn HAD am y tro cyntaf yn y digwyddiad byd-eang.

Bydd cyfres o bodlediadau a grëwyd gan y tîm ymchwil a’r chwaer brosiectau, sydd hefyd yn cael eu hariannu gan yr UE, hefyd yn cael ei lansio yn COP27. Recordiwyd y podlediadau, sy'n canolbwyntio ar addasu i’r newid yn yr hinsawdd, yng nghymunedau gwledig dwyrain Affrica.

“Mae’r COP hwn, sy’n canolbwyntio ar Affrica, yn hynod bwysig. Mae angen gweithredu ar frys i fynd i’r afael â dulliau o addasu i’r newid yn yr hinsawdd,” meddai’r Athro Singer.

“Mae prosiect DOWN2EARTH yn canolbwyntio’n uniongyrchol ar yr effeithiau ar bobl, sefydliadau a pholisïau yn y cymunedau amaethyddol a bugeiliol gwledig yr effeithir arnyn nhw yn HAD a thu hwnt. Dyna pam rydyn ni mewn sefyllfa unigryw i rannu ein gwaith gyda chynrychiolwyr COP27.

“Braint yw cael fy ngwahodd i’r digwyddiad i gyflwyno ein hymchwil ddiweddaraf ar effeithiau newid yn yr hinsawdd ar gymunedau ymgynhaliol bregus yn Affrica – y rhai nad oedd ganddyn nhw fawr ddim i’w wneud ag achosi newid yn yr hinsawdd ond sy’n dioddef fwyaf o effaith hwn.”

Bydd y ffilmiau a’r podlediadau’n rhan o ddau ddigwyddiad ymylol yn COP27, y naill ym Mhafiliwn Gwyddoniaeth Sefydliad Meteorolegol y Byd (WMO) a’r llall ym Mhafiliwn yr Undeb Ewropeaidd, y mae’r Athro Singer wedi’i drefnu ar y cyd â’r chwaer brosiectau.

“Dyma gyfle gwych i godi ymwybyddiaeth o heriau addasu i gymunedau Corn Affrica, sy’n wynebu’r posibilrwydd ar hyn o bryd o newyn ar ôl nifer fawr o dymhorau glawog aflwyddiannus o’r bron,” ychwanegodd yr Athro Singer.

Mae COP27 yn digwydd yn Sharm el Sheik rhwng 6 a 18 Tachwedd. Cynhelir digwyddiadau'r Athro Singer ar Dachwedd 14 (Pafiliwn Gwyddoniaeth yr WMO) a 16 Tachwedd (Pafiliwn yr UE).