Myfyriwr o Gaerdydd yn ennill Gwobrau Menywod mewn Eiddo
25 Mehefin 2020
Mae myfyriwr israddedig o Brifysgol Caerdydd wedi ennill rownd De Cymru o Wobrau Myfyrwyr Menywod mewn Eiddo 2020.
Cafodd y gwobrau eu dathlu ar-lein, a gwnaethon nhw ganmol cyflawniadau’r myfyrwyr talentog a gyrhaeddodd y rownd ranbarthol derfynol.
Enillodd Tamika Hull, sy’n astudio Cynllunio a Datblygu Trefol yn yr Ysgol Daearyddiaeth a Chynllunio, siec am £500, tlws a mynediad at raglen mentora Menywod mewn Eiddo.
Disgrifiodd y beirniaid bod Tamika’n “angerddol am greu lleoedd a gwella bywydau - mae ei thraed hi ar y ddaear, mae hi’n huawdl ac yn ddeallusol”.
Dywedodd Tamika: “Mae’n gyffrous iawn cael cydnabyddiaeth fel person heb ddigon o gynrychiolaeth mewn maes o ddynion yn bennaf, yn enwedig fel menyw o liw. Mae hynny’n fy ngwneud i’n rhan fwy unigryw fyth o’r gymuned hon, ond mae hynny’n gyfle gwirioneddol gyffrous i wneud newid a gweithio ochr yn ochr â menywod gweithgar ac ysbrydoledig eraill.”
Ychwanegodd Clare Jones, cadeirydd cangen De Cymru Menywod mewn Eiddo: “Rydym wrth ein boddau’n cyhoeddi buddugoliaeth Tamika. Cynhaliwyd y paneli beirniadu yn ôl ym mis Chwefror cyn i’r cyfyngiadau symud ddod i rym, ac er ei bod hi’n siomedig peidio â gallu cynnal cinio’r gwobrau eleni, roedd yn wych gallu dathlu rhai cyflawniadau rhagorol gan fyfyrwyr yn rhithwir.”
Mae Tamika’n mynd drwy i’r rownd derfynol genedlaethol ar 16 Medi yn Llundain.
