Canmoliaeth i CUBRIC yng ngwobrau Ewrop
14 Mehefin 2018
Mae Canolfan Delweddu'r Ymennydd Prifysgol Caerdydd (CUBRIC) wedi ennill anrhydedd dylunio arall, y tro hwn yng Ngwobrau Gofal Iechyd Ewrop.
Cafodd CUBRIC, a ddyluniwyd gan Grŵp IBI, ganmoliaeth uchel gan banel o feirniaid rhyngwladol yng nghategori Iechyd a Gwyddorau Bywyd.
Enillwyd y categori gan Sefydliad Francis Crick, sefydliad darganfod biofeddygol yn Llundain sy'n gweithio i ddeall y fioleg sy'n sail i iechyd a chlefydau.
Mae'r gwobrau'n dathlu ac yn cydnabod rhagoriaeth broffesiynol yn nyluniad amgylcheddau gofal iechyd yn Ewrop a ledled y byd.
Dyma'r gydnabyddiaeth ddiweddaraf ar gyfer CUBRIC yn dilyn llwyddiant mewn amryw wobrau yn 2017 gan gynnwys Gwobrau Adeiladu Arbenigrwydd yng Nghymru, Gwobrau RICS a Gwobrau S-Lab.
At hynny, roedd CUBRIC yn yr ail safle yng nghategori Adeiladau sy'n Ysbrydoli yng Ngwobrau Prifysgol The Guardian 2017.
Mae'r ganolfan yn arwain y byd o ran ymchwil i feysydd fel seicoleg, seiciatreg a'r niwrowyddorau, ac yn gartref i gyfleusterau sganio MRI pwerus, cyfarpar ysgogi'r ymennydd, labordai cwsg, swyddfeydd modern, a mannau ymgynnull.
Agorwyd CUBRIC gan y Frenhines yn 2016.
