Myfyriwr y Flwyddyn Gwobr Caerdydd
6 Mehefin 2018
Ddydd Mawrth 8 Mai, daeth myfyrwyr a staff ar draws y Brifysgol ynghyd i ddathlu blwyddyn fwyaf lwyddiannus Gwobr Caerdydd hyd yma.
Dyfarnwyd gwobr Myfyriwr y Flwyddyn i Lauren, sy’n fyfyriwr ail flwyddyn yn yr Ysgol Cerddoriaeth, am ei phortffolio eithriadol o weithgareddau allgyrsiol. Cwblhaodd dros 700 awr o weithgareddau allgyrsiol yn ystod ei chyfnod ar y rhaglen, sy’n llawer uwch na'r isafswm o 70 awr oedd yn ofynnol.
Ar ôl treulio amser yn gwirfoddoli gyda Heddlu De Cymru, mae Lauren wedi nodi llwybr gyrfa ar ei chyfer a chafodd ei phenodi’n gwnstabl arbennig yn ddiweddar. Bydd yn dechrau ei hyfforddiant yn yr haf tra’n parhau i astudio ar gyfer ei gradd.
Yn ôl yr Athro Ken Hamilton, Pennaeth yr Ysgol Cerddoriaeth: "Mae staff a myfyrwyr yn yr Ysgol Cerddoriaeth wedi bod wrth eu bodd o glywed am lwyddiant Lauren — mae’n gyflawniad aruthrol mewn maes hynod gystadleuol."
Rhaglen hybu cyflogadwyedd strwythurol Prifysgol Caerdydd yw Gwobr Caerdydd. Mae’n rhoi’r cyfle i fyfyrwyr gael cydnabyddiaeth am y sgiliau a enillir drwy weithgareddau allgyrsiol.
Eleni, cwblhaodd 330 o fyfyrwyr y rhaglen hon ac ymgymryd â 73,771 o oriau o weithgareddau allgyrsiol i gyd - y nifer uchaf erioed.
Mae cwblhau'r Wobr yn helpu myfyrwyr i wella eu proffesiynoldeb a'u cyflogadwyedd. Mae hefyd yn eu helpu i ragori mewn marchnad recriwtio hynod gystadleuol ymhlith graddedigion.
Cyflwynodd yr Athro Karen Holford, Rhag Is-Ganghellor araith yn y seremoni wobrwyo i longyfarch y myfyrwyr a'r staff ar flwyddyn lwyddiannus dros ben. Rhoddodd Daniel Harborne, Myfyriwr y Flwyddyn Gwobr Caerdydd 2017 gyflwyniad am ei ddatblygiad proffesiynol ers cwblhau'r Wobr. Ar hyn o bryd, mae Daniel ar leoliad gwaith yn Sefydliad Ymchwil Trosedd a Diogelwch Prifysgol Caerdydd fel cynorthwy-ydd ymchwil ac fe gyflwynodd bapur yn ddiweddar mewn cynhadledd yn Orlando, Florida.
