Ras Hwylio Volvo

Mae Prifysgol Caerdydd wedi'i chyhoeddi'n bartner lleol blaenllaw yn Ras Hwylio Volvo, prif gyfres hwylio'r byd, pan fydd yn cyrraedd y ddinas ddydd Llun 28 Mai.

Bydd y digwyddiad, a gynhelir am bythefnos, yn denu miloedd o wylwyr i Fae Caerdydd i brofi un o'r arosiadau olaf yn y ras byd-eang 45,000 o filltiroedd môr, a bydd Prifysgol Caerdydd yn cymryd rhan mewn amrywiaeth o weithgareddau allgymorth ac ymgysylltu.

Bydd Bae Caerdydd ac Alexandra Head, a ddatblygwyd yn ddiweddar, yn cael eu trawsnewid yn bentref ras bywiog, fydd yn cynnal gŵyl rad ac am ddim ag adloniant a cherddoriaeth fyw, chwaraeon dŵr, atyniadau a bwyd â thema Ras Hwylio Volvo, stondinau diodydd a masnachu.

Bydd academyddion o wahanol rannau o'r Brifysgol yn camu i'r bocs sebon i gyflwyno eu hymchwil i bobl sy'n cerdded heibio ym mhentref y ras, yn debyg i'r digwyddiadau 'Gwyddoniaeth Bocs Sebon' hynod lwyddiannus a gynhelir yn y ddinas bob blwyddyn.

Fel rhan o'r Rhaglen Addysg i'r Cyhoedd, bydd academyddion yn trafod nifer o bynciau, gan gynnwys ceryntau'r cefnforoedd a newid hinsawdd, neu ficro-blastigau.

Yn wir, bydd y digwyddiad ei hun yn canolbwyntio'n fawr ar y broblem gynyddol o lygredd plastig yn ein cefnforoedd, a bydd nifer o ymgyrchoedd i godi proffil y broblem anodd hon.

Yn unol â thema amgylcheddol y digwyddiad, bydd y Brifysgol hefyd yn amlinellu ei hymrwymiad i ddyfodol mwy ecogyfeillgar drwy lansio ei Strategaeth Cynaliadwyedd Amgylcheddol yn ystod y digwyddiad.

"Rydym wrth ein bodd, felly, bod cyfle wedi codi nid yn unig i ddinas Caerdydd gynnal y digwyddiad gwych hwn, ond hefyd i'r Brifysgol ddangos ei chefnogaeth mewn mwy nag un ffordd i sicrhau bod y digwyddiad mor llwyddiannus â phosibl."

Dywedodd yr Aelod Cabinet dros Ddiwylliant a Hamdden, y Cynghorydd Peter Bradbury: "Mae Prifysgol Caerdydd yn sefydliad â gwreiddiau dwfn yn ein dinas, ac rydw i wrth fy modd y bydd ganddi bresenoldeb canolog pan fydd Caerdydd ymhlith y dinasoedd fydd yn croesawu Ras Hwylio Volvo yn ddiweddarach y mis hwn.

"Gydag ethos cynaliadwyedd ac addysg am y moroedd yn cael sylw yn y digwyddiad, mae'n briodol bod gan y Brifysgol le yn y rhaglen addysgol i gynnig ei gwybodaeth a'i hymchwil.

“Mae partneriaethau fel hyn yn hanfodol fel y gall Caerdydd barhau i groesawu a chynnal digwyddiadau chwaraeon byd-eang sy'n cynhyrchu hwb economaidd sylweddol i economi Caerdydd a Chymru.

Wrth i'r digwyddiad agosáu, edrychwn ymlaen at groesawu Ras Hwylio Volvo i Gaerdydd a miloedd o ymwelwyr newydd i Gymru, fydd yn cael profiad o brifddinas fywiog a chenedl â threftadaeth ddiwylliannol gyfoethog ac amrywiol."