Lleoliadau fferylliaeth glinigol ar gyfer fferyllwyr israddedig

Ers 2016, mae CUREMeDE wedi arwain ar werthuso carfanau lluosog sy’n gwneud hyfforddiant amlsector ar gyfer fferyllwyr Sylfaen (fferyllwyr cyn-gofrestru gynt). Ynghlwm wrth ygwerthusiad hwn mae dilyniant hydredol o'r unigolion hyn o fod yn hyfforddai i’r flwyddyn ar ôl cofrestru. Ynghlwm wrth y gwerthusiad roedd casglu barn yr hyfforddeion, y goruchwylwyr, yr arweinwyr addysg a hyfforddiant a’r rheolwyr llinell presennol.

Yn sgil y canfyddiadau, canfuwyd nifer fawr o fanteision allweddol yn y rhaglen amlsector ond tynnwyd sylw at yr anfantais yn sgil lleihau’r amser a dreulir mewn unrhyw un sector o’i gymharu â modelau un sector. Mae canfyddiad o'r fath o blaid cyflwyno lleoliadau clinigol yn gynharach yn yr hyfforddiant er mwyn i’r hyfforddeion fod yn gyfarwydd â'r lleoliadau yn gynt a gellir defnyddio eu blwyddyn Sylfaen yn fwy effeithiol.

Mae Addysg a Gwella Iechyd Cymru (AaGIC) yn gweithio mewn partneriaeth ag Ysgolion Fferylliaeth Cymru (Prifysgol Caerdydd a Phrifysgol Abertawe) i gynyddu nifer y lleoliadau dysgu drwy brofiad a chlinigol sy’n rhan o’r radd MPharm pedair blynedd cyn y flwyddyn Sylfaen. Bydd myfyrwyr yn ymgymryd â lleoliadau ar draws sectorau fferylliaeth gwahanol: y gymuned, yr ysbyty ac ymarfer cyffredinol.

Bydd cyflwyno lleoliadau clinigol yn rhan o’r radd MPharm yn rhoi profiadau i fyfyrwyr MPharm na fyddent wedi eu cael o'r blaen tan eu blwyddyn Sylfaen (ar ôl cwblhau'r radd MPharm pedair blynedd). Mae’r lleoliadau hyn yn cael eu cyflwyno i fyfyrwyr fferylliaeth a rhennir y rhain yn ddau gam. Ar gyfer blwyddyn academaidd 2022/23, dim ond myfyrwyr y 3edd a’r 4edd flwyddyn ym Mhrifysgol Caerdydd fydd yn ymgymryd â’r lleoliadau hyn. Yn 2023/24, bydd y lleoliadau’n cael eu hymestyn i bob myfyriwr ym mlynyddoedd 1 i 4 ym Mhrifysgol Caerdydd a hefyd ym Mhrifysgol Abertawe.

Bydd yr astudiaeth hon yn gwerthuso’r ffordd y caiff lleoliadau clinigol eu rhoi ar waith yn y radd MPharm ac yn trin a thrafod y broses o brofi cysyniad rhoi Gweithgareddau Proffesiynol Ymddiriedadwy (EPA) ar waith yn ystod y cyfnod cynharach hwn o addysg a hyfforddiant fferyllwyr. Bydd yr astudiaeth hon yn trin a thrafod safbwyntiau a phrofiadau myfyrwyr, yn ogystal â rhanddeiliaid perthnasol eraill gan gynnwys y safleoedd cynnal lleoliadau, staff y brifysgol, arweinwyr y lleoliadau ac arweinwyr AaGIC.