Pam y pleidleisiodd Cymru o blaid Brexit?
2 Awst 2017
![](https://cardiff.imgix.net/__data/assets/image/0009/859869/Welsh-badge-on-top-of-lots-of-EU-badges.jpg?w=570&h=321&fit=crop&q=60&auto=format)
Bydd arbenigwr gwleidyddol blaenllaw o Brifysgol Caerdydd yn cyflwyno’r dadansoddiad manwl cyntaf o’r hyn ddigwyddodd mewn gwirionedd yng Nghymru yn ystod y refferendwm dramatig ar yr UE.
Bydd darlith arbennig yr Athro Richard Wyn Jones yn yr Eisteddfod Genedlaethol yn egluro pam pleidleisiodd Cymru o blaid Brexit er ei bod yn elwa o ryw £245m y flwyddyn gan yr UE.
Dywedodd yr Athro Jones fod ei waith ymchwil yn datgelu gwahaniaethau barn sylweddol iawn yng Nghymru, a hynny yn dilyn ymdeimlad pleidleiswyr o’u hunaniaeth genedlaethol.
Addawodd, erbyn diwedd y ddarlith “y bydd pobl yn dechrau deall gwleidyddiaeth Cymru mewn ffordd wahanol”.
![Professor Richard Wyn Jones at Eisteddfod 2015](https://cardiff.imgix.net/__data/assets/image/0011/839009/Professor-Richard-Wyn-Jones-at-Eisteddfod-2015.jpg?w=575&ar=16:9)
“Hon fydd yr ymgais gyntaf i esbonio canlyniad y refferendwm ar yr UE yng Nghymru, oedd fel petai wedi synnu llawer o bobl”, meddai’r Athro Jones.
![](https://cardiff.imgix.net/__data/assets/image/0020/65135/22729019_10214743648933128_8884066585577554976_n.jpg?w=100&h=100&auto=format&crop=faces&fit=crop)
“Mae rhai wedi dehongli’r bleidlais fel arwydd o wrthod Cymru a Chymreictod, tra bod eraill wedi’i gweld fel gweithred o hunan-niwed o ystyried dibyniaeth Cymru ar y farchnad sengl a’r cronfeydd strwythurol.”
“Bydda i’n dangos bod rhai gwahaniaethau barn dramatig yn bodoli oddi mewn i Gymru, a bod cysylltiad agos iawn rhwng y gwahaniaethau yma a’r modd y mae pobl yng Nghymru yn synio am eu hunaniaeth genedlaethol.”
Cynhelir y ddarlith ym Mhabell y Cymdeithasau 1 am 11:00 ddydd Iau 10 Awst.
Cynhelir Eisteddfod Genedlaethol eleni ar Ynys Môn rhwng 4 a 12 Awst.
Cysylltu Caerdydd yw thema Prifysgol Caerdydd ar gyfer Eisteddfod Genedlaethol 2017 - sut mae Prifysgol Caerdydd a’i myfyrwyr, ei staff a’i chyn-fyfyrwyr wedi eu cysylltu â Chymru a’r tu hwnt.