Gallwch gyflwyno cais ar gyfer Ysgol Haf Wolfson 2024 nawr

Bydd Canolfan Wolfson ar gyfer Iechyd Meddwl Pobl Ifanc yn cynnal ei thrydedd Ysgol Haf rithwir ym mis Gorffennaf eleni.

Cynhelir y cwrs tri diwrnod ar-lein rhwng dydd Llun 15 a dydd Mercher 17 Gorffennaf, yng ngofal y tîm rhyngddisgyblaethol arbenigol yng Nghanolfan Wolfson ar gyfer Iechyd Meddwl Pobl Ifanc ym Mhrifysgol Caerdydd.

Mae Dr Vicky Powell, Dr Chris Eaton, Dr Amy Shakeshaft, a Dr Becky Anthony yn arwain rhaglen yr ysgol haf, gyda chymorth ychwanegol gan y swyddog cyfathrebu, sef Margarida Maximo.

Ychwanegodd Dr Chris Eaton: “Bydd yr ysgol haf yn cael ei chyflwyno gan ymchwilwyr o'r radd flaenaf, a fydd yn cynnig cyflwyniadau a gweithdai yn eu meysydd arbenigedd. Byddant yn canolbwyntio ar ddeall achosion problemau iechyd meddwl y glasoed a all lywio ffyrdd effeithiol newydd o gynnig cymorth ymarferol i bobl ifanc.

Bydd y rhaglen gynhwysfawr yn trafod gwahanol agweddau ar ddulliau a chanfyddiadau ymchwil iechyd meddwl ieuenctid, gan ddefnyddio cipolygon o ddisgyblaethau megis epidemioleg, geneteg, niwrowyddoniaeth a datblygu ymyriadau.

Mae agenda’r ysgol haf yn cynnwys sgyrsiau byr sy'n rhoi cyngor ar gyfer gyrfa mewn ymchwil, trafod arwyddocâd cynnwys y cyhoedd mewn ymchwil, a sut y gall ymchwilwyr gyfrannu at drosi canfyddiadau yn bolisïau'r llywodraeth. Bydd cyfle i rwydweithio yn rhithwir gyda’r rhai sy’n cymryd rhan a gyda siaradwyr hefyd.

Mae’n rhad ac am ddim i ddod i’r ysgol haf ac mae wedi’i hanelu at wyddonwyr ymchwil (PhD, gradd Meistr, ôl-ddoethurol, neu fyfyrwyr israddedig yn ei ^thrydedd flwyddyn) neu hyfforddeion clinigol (hyfforddiant sylfaen/craidd/arbenigol) sydd â diddordeb mewn symud i ymchwil iechyd meddwl ieuenctid, neu’r rhai sydd am gael cyflwyniad i’r maes.

Dywedodd Dr Vicky Powell "Hoffem eich annog i gyflwyno cais ar gyfer y cyfle hwn. Mae'r rhaglen yn gyfle i gael rhagor o wybodaeth am symud i faes iechyd meddwl ieuenctid mewn rolau ymchwil a chlinigol a gobeithiwn y bydd o ddiddordeb i ystod eang o bobl."

Sut i wneud cais

I wneud cais i fynd i Ysgol Haf Canolfan Wolfson mewn Ymchwil Iechyd Meddwl Ieuenctid, llenwch y ffurflen gais ar-lein.

Gallwch gael rhagor o wybodaeth drwy fynd i wefan yr Ysgol Haf.

Darllenwch am brofiadau myfyrwyr yn Ysgol Haf Wolfson ar ein blog:

• Sangita - Tynnodd yr ysgol haf sylw at arwyddocâd cysylltedd ymchwil fyd-eang
• Jemma - Gwnaeth yr ysgol haf fy ysbrydoli i feddwl am yrfa mewn ymchwil iechyd meddwl ieuenctid
• Charlotte - Fe wnaeth yr ysgol haf sicrhau bod fy holl waith yn cael ei lywio gan dystiolaeth gadarn
• Sidney - Roedd yn brofiad heb ei ail