Partneriaeth strategol gyntaf gydag un o brifysgolion UDA
25 Ebrill 2023
Bydd cyd-fentrau ymchwil ac addysg yn cael eu datblygu rhwng Prifysgol Caerdydd a Phrifysgol Wyoming yn yr Unol Daleithiau yn rhan o bartneriaeth strategol newydd.
Bydd prosiectau ymchwil ar y cyd, cyfres flynyddol o seminarau, cynadleddau a gweithdai, ymweliadau gan staff a myfyrwyr PhD a rhaglenni addysg ar y cyd oll yn rhan o’r bartneriaeth pum mlynedd a lofnodwyd mewn digwyddiad yn Ysgol Cerddoriaeth Prifysgol Caerdydd.
Y cytundeb gyda Phrifysgol Wyoming yw partneriaeth gyntaf Caerdydd â sefydliad addysg uwch yn yr Unol Daleithiau ac mae'n dilyn trefniadau tebyg gyda phrifysgolion yn Tsieina, Brasil, yr Almaen, Gwlad Belg, Affrica ac, yn fwyaf diweddar felly, Seland Newydd, a hynny’n rhan o'i strategaeth gyffredinol Y Ffordd Ymlaen.
Dyma a ddywedodd yr Athro Colin Riordan, Is-Ganghellor Prifysgol Caerdydd: "Yn sail i bob un o’n partneriaethau rhyngwladol mae’r uchelgais i fynd i’r afael â materion o bwys rhyngwladol tra ar yr un pryd yn sicrhau manteision i’r gymdeithas a’r economi yma yng Nghymru.
"Ein partneriaeth â Wyoming yw ein hymrwymiad diweddaraf i’r genhadaeth ddinesig hon ac felly rwyf yn edrych ymlaen at weld y manteision yn cynyddu wrth i gymunedau yn y ddwy brifysgol gydweithio yn ystod y blynyddoedd i ddod."
Sefydlwyd Prifysgol Wyoming ym 1886. Mae'n sefydliad ymchwil grant tir a gydnabyddir yn genedlaethol ac mae academyddion arbenigol o'r radd flaenaf yn gweithio yno mewn cyfleusterau o safon fyd-eang.
Mae ganddi 12,000 o fyfyrwyr sy’n hanu o bob un o 50 talaith UDA ac 82 o wledydd ledled y byd.
Dyma a ddywedodd Ed Seidel, Llywydd Prifysgol Wyoming: "Mae’r bartneriaeth strategol hon yn dathlu ymrwymiad sylweddol i feithrin cydweithio ystyrlon ar draws y disgyblaethau."
Rydym yn rhagweld prosiectau sy’n ehangu cwmpas ac effaith ein hymchwil, gan greu cyfleoedd newydd i gyfnewid myfyrwyr a staff a meithrin cysylltiadau rhwng Cymru a Wyoming a fydd o fudd i’n prifysgolion a’n cymunedau ehangach.
