Ysgoloriaeth i Raddedigion Bell Burnell i ffisegydd o Gaerdydd
11 Gorffennaf 2023
Mae myfyriwr ymchwil o Brifysgol Caerdydd wedi'i enwi ymhlith y rhai sy'n derbyn cyllid ysgoloriaeth fawreddog sydd â'r nod o wella amrywiaeth ym maes ffiseg.
Mae Clara Cafolla-Ward, sy'n astudio PhD yn yr Ysgol Ffiseg a Seryddiaeth, yn un o ddeg ymchwilydd ôl-raddedig i dderbyn cyllid gan Gronfa Ysgoloriaeth i Raddedigion Bell Burnell.
Dyfarnwyd y cyllid gan y Sefydliad Ffiseg (IOP), ac mae'n cynnig ysgoloriaethau doethurol i grwpiau sy'n cael eu tangynrychioli ar hyn o bryd yn y gymuned ymchwil ffiseg gan gynnwys menywod, pobl â statws ffoadur, lleiafrifoedd ethnig, pobl anabl neu fyfyrwyr dan anfantais ariannol - ac eraill a fyddai fel arall yn cael trafferth cwblhau cwrs astudio ôl-raddedig oherwydd eu hamgylchiadau.
Mae PhD Clara yn canolbwyntio ar ffiseg mater cywasgedig. Meddai: “Bydd y cyllid hwn yn gwneud gwahaniaeth enfawr gan nad oes gen i unrhyw ffordd arall o gefnogi fy hun yn ariannol. Rwy'n ddiolchgar iawn.
“Mae Cronfa Ysgoloriaeth i Raddedigion Bell Burnell wirioneddol yn estyn allan i ystod eang o amrywiaeth. Mae'n ymwneud â rhoi’r un chwarae teg i unrhyw un a gaiff ei ystyried yn wahanol i’r arfer.
“Mae gan bob unigolyn ei brofiad a'i bersbectif ei hun sy'n creu cyfraniad unigryw a gwerthfawr. Mae ffiseg yn herio pob rhagdybiaeth - i wneud hyn, mae angen ystod o safbwyntiau. Felly mae'r ymgyrch tuag at ddeall ein realiti ffisegol yn gofyn am amrywiaeth o bobl i edrych arno.”
Sefydlwyd y gronfa gan y ffisegydd blaenllaw, yr Athro Fonesig Jocelyn Bell Burnell, a'r IOP yn 2019 ar ôl i'r Fonesig Jocelyn dderbyn y Wobr Torri Drwodd Arbennig mewn Ffiseg Sylfaenol am ei gwaith wrth ddarganfod pylsarau.
Rhoddodd y Fonesig Jocelyn ei gwobr gyfan o £2.3 miliwn i'r IOP ar unwaith. Ei nod oedd helpu i daro'n ôl yn erbyn yr hyn a ddisgrifiodd fel “y rhagfarn anymwybodol sy'n dal i fodoli ym maes ymchwil ffiseg”, gan ychwanegu: "Does dim angen yr arian arna i fy hun, ac roedd yn ymddangos i mi mai dyma'r defnydd gorau y gallwn ei wneud ohono efallai."
Hyd yn hyn, mae'r gronfa wedi galluogi 31 o fyfyrwyr na fydden nhw wedi gallu dechrau PhD fel arall i wneud hynny.
“Mae'n hanfodol ein bod yn parhau i sicrhau bod ffiseg yn hygyrch fel bod pobl o ystod o gefndiroedd yn gallu gweld pa mor ddiddorol yw'r ddisgyblaeth mewn gwirionedd. Ar yr un pryd gallen nhw hefyd gyfrannu eu set unigryw o sgiliau a safbwyntiau yn rhan o'u hastudiaethau a, gobeithio, eu gyrfaoedd.”
“Rydyn ni’n cymryd y math hwn o ehangu mynediad o ddifrif yma yng Nghaerdydd ac mae'n llywio ein rhaglenni allgymorth mewn ysgolion a chymunedau ledled de Cymru.
“Felly, ar ran pawb yn yr ysgol, llongyfarchiadau mawr i Clara am sicrhau'r cyllid pwysig hwn gan yr IOP i ddilyn ei hymchwil PhD.
“Edrychaf ymlaen at ddilyn ei chynnydd!”
