Mae cynhadledd safon byd-eang y Labordy Cyfiawnder Data yn ôl
12 Mehefin 2023
Fis Mehefin eleni bydd academyddion, ymarferwyr ac ymgyrchwyr yn cwrdd â’i gilydd ym Mhrifysgol Caerdydd i gyflwyno eu syniadau a’u hymchwil yn y drydedd Gynhadledd Ryngwladol ar Gyfiawnder Data.
O dan y thema Profiadau Cyfunol yn y Gymdeithas yn sgil Twf Data bydd y gynhadledd arloesol hon yn trin a thrafod effeithiau, profiadau bywyd a mathau o wrthsefyll mewn perthynas â thwf data.
Bydd Cynhadledd Cyfiawnder Data 2023 yn cyfuno ystod o brif anerchiadau, trafodaethau panel a gweithdai i drafod ystyr ac arferion cyfiawnder cymdeithasol a phrofiadau cyfunol cymdeithas sy’n bodoli yn sgil twf data.
Bydd y gynhadledd, a gynhelir gan y Labordy Cyfiawnder Data yn Ysgol Newyddiaduraeth, y Cyfryngau a Diwylliant (JOMEC) Prifysgol Caerdydd, yn cynnig ffyrdd newydd o feddwl am dwf data a’r broses ganlynol o flaenoriaethu cyfiawnder data, a sut i drefnu’r gwaith hwnnw.
Ymhlith y siaradwyr bydd:
- Catherine D'Ignazio (Sefydliad Technoleg Masssachusetts, UDA)
- Mirca Madianou (Goldsmiths, Prifysgol Llundain, y DU)
- Carolina Botero Cabrera (Karisma, Colombia)
- Hamid Khan (Stop LAPD Spying Coalition, UDA)
- Donna Cormack (Prifysgol Otago, Seland Newydd)
- Patrick Williams (Prifysgol Fetropolitan Manceinion, y DU)
Dyma a ddywedodd Cyd-gyfarwyddwr y Labordy Cyfiawnder Data Dr Emiliano Treré, “Rydyn ni wrth ein boddau yn croesawu unigolion o brifysgolion mwyaf blaenllaw'r byd i ymuno â ni i drafod pwnc hynod bwysig Cyfiawnder Data”.
“Ein nod yw ieuo pŵer deialog ar y cyd i greu effeithiau ystyrlon, llwybrau ymchwil newydd ac ymchwil gyhoeddedig ym maes y gymdeithas ddata sy’n mynd yn fwyfwy cymhleth.”
Cynhelir y gynhadledd ar 19-20 Mehefin ac mae bellach yn llawn. Bydd allbynnau'r gynhadledd yn cael eu cyflwyno i'w cyhoeddi hwyrach yn y cyfnodolyn rhyngwladol o'r radd flaenaf Big Data & Society.
Rhannu’r stori hon
Pobl
-
Lecturer
-
Lecturer (Teaching and Research)
-
Senior Lecturer (Teaching and Research)
