Cedwir Gwobr Rhagoriaeth Adnoddau Dynol mewn Ymchwil ar ôl adolygiad 12 mlynedd

Rydym wedi cadw ein Gwobr Rhagoriaeth Adnoddau Dynol mewn Ymchwil yn dilyn adolygiad allanol llwyddiannus o sut rydym yn cefnogi ein staff ymchwil a'u datblygiad.

Rydym yn un o ddwy brifysgol yn y DU i gadw'r wobr wedi eu hadolygiad deuddeg mlynedd.

Ni oedd un o'r prifysgolion cyntaf i gael y wobr yn 2010. Mae'n fecanwaith pwysig ar gyfer gweithredu egwyddorion y Concordat i Gefnogi Datblygiad Gyrfaol Ymchwilwyr. Wrth gadw eu gwobrau, mae sefydliadau yn dangos eu hymrwymiad hirdymor i ddatblygiad gyrfaol ymchwilwyr.

Mae’r wobr yn cydnabod bod sefydliadau wedi cwblhau dadansoddiad o’r bylchau yn eu polisïau a’u hymarfer presennol yn ôl y Concordat, wedi datblygu cynllun gweithredu i’w roi ar waith ac wedi ystyried barnau’r ymchwilwyr.

Fe wnaethom gynnydd sylweddol yn erbyn ein cynllun gweithredu a:

• chodi ymwybyddiaeth ar draws y sefydliad am ein hymrwymiadau a'n cyfrifoldebau o dan y Concordat i Gefnogi Datblygiad Gyrfaol Ymchwilwyr.
• cyfleoedd datblygu personol a phroffesiynol estynedig ac amrywiol i ymchwilwyr
• cryfhau llais a chynrychiolaeth ymchwilwyr wrth lunio polisïau a strategaeth y brifysgol
• gwella cydraddoldeb, amrywiaeth a chynhwysiant (EDI) ymhlith ymchwilwyr, gan gynnwys cefnogi lles ac iechyd meddwl, er mwyn galluogi ein holl staff ymchwil i ffynnu.

Dywedodd yr Athro Karin Wahl Jorgensen, Deon yr Amgylchedd Ymchwil a Diwylliant, "Rydym yn falch iawn ein bod wedi cadw ein gwobr ar ôl deuddeg mlynedd. Mae ein hymrwymiad i'r Concordat yn rhan allweddol o'r gwaith rydym yn ei wneud i wella ein diwylliant ymchwil ac mae cynnwys ein hymchwilwyr yn hyn yn hanfodol."

"Mae'n dyst mawr i'r tîm cyfan sy'n gweithio mor galed i ddatblygu a gweithredu ein cynlluniau gweithredu ein bod wedi cadw'r wobr heb unrhyw welliannau”.

Ein 6 maes o flaenoriaeth ar gyfer mentrau penodol i wella profiad staff ymchwil dros y tair blynedd nesaf yw:

• ymwybyddiaeth ac ymgysylltu
• datblygu polisïau
• sicrwydd o ran swyddi
• cydnabyddiaeth, gwobr a dyrchafiad
• hyrwyddo datblygiad proffesiynol
• gyrfaoedd amrywiol

Mae ein hymrwymiad i'r Wobr, y Concordat a'n cynllun gweithredu yn rhan o'n rhaglen Thrive i wella diwylliant ymchwil y brifysgol.