Dr Eshrar Latif yn ennill grant ymgynghoriaeth ymchwil ddiwydiannol i brofi bio-ddeunyddiau adeiladu

Yn ddiweddar enillodd Dr Eshrar Latif grant ymgynghoriaeth ymchwil ddiwydiannol i gydweithio â'r cwmni adeiladu o Gymru, Wellspring Homes, i nodweddu ac optimeiddio bio-ddeunyddiau adeiladu, ac i brofi eu perfformiad.

Bydd Dr Latif yn gweithio ar y cyd â Wellspring Homes, cwmni adeiladu sy'n adeiladu cartrefi newydd, fforddiadwy, a'i nod yw gosod y safon ar gyfer byw'n gynaliadwy drwy ddilyn arloesedd adeiladu sy'n defnyddio technoleg carbon gwell na sero i ddarparu'r genhedlaeth nesaf o ofod byw.

Bydd yr ymchwil yn seiliedig ar fio-ddeunyddiau; deunyddiau sy'n tyfu neu'n rhan naturiol o'r biosffer megis pren, gwellt, cywarch, corc, clai, a phridd. Fel arfer, mae'r deunyddiau hyn wedi rhyddhau llai o garbon, gyda phren tua 3 gwaith yn llai na dur a thros 5 gwaith yn llai na choncrit. Bydd y prosiect yn cynnwys monitro nifer o adeiladau cywarch sydd ar y gweill yng Nghymru ar ôl y gwaith cychwynnol o optimeiddio’r bio-ddeunyddiau adeiladu. Yna bydd Wellspring Homes yn rhyddhau data ffynhonnell agored y gallai adeiladwyr cartrefi ac ymchwilwyr ei ddefnyddio yn y dyfodol. Bydd y prosiect blwyddyn o hyd yn dechrau o ganol Tachwedd 2022.

Meddai Dr Eshrar Latif:  'Mae Cymru bob amser ar flaen y gad o ran hyrwyddo a datblygu adeiladau cynaliadwy arloesol ac rwy'n gyffrous i gyfrannu at gynllun tai cynaliadwy newydd a arweinir gan Wellspring Homes."