Ewch i’r prif gynnwys

Myfyrwyr Ffrangeg yn cynrychioli Caerdydd mewn gwobr lenyddol o fri

13 April 2022

Gemma Buil Ferri and Zoe Titmus with French lecturer, Hamid Sahki
Gemma Buil Ferri and Zoe Titmus with French lecturer, Hamid Sahki

Cymerodd myfyrwyr o gylch darllen Ffrangeg ran mewn seremoni fawreddog ar gyfer gwobr llyfr Ffrangeg yn yr Institut Français a Llysgenhadaeth Ffrainc yn Llundain fis Mawrth eleni.

Bu Gemma Buil Ferri a Zoe Titmus yn cynrychioli eu cylch darllen o Brifysgol Caerdydd yn y trafodaethau a’r seremoni wobrwyo ar gyfer Choix Goncourt UK, cystadleuaeth lenyddol lle caiff nofelau Ffrangeg o’r flwyddyn ddiwethaf eu trafod a’u dadlau gan fyfyrwyr o brifysgolion y DU.

Mae'r wobr yn gangen o'r Prix Goncourt, sy'n cyfateb yn Ffrainc i Wobr Man Booker. Mae'r holl deitlau ar y rhestr fer ar gyfer y Prix Goncourt yn cael eu rhoi'n awtomatig i wobr Choix Goncourt y DU.

Ers mis Hydref 2021, mae mwy na 100 o fyfyrwyr iaith a llenyddiaeth Ffrangeg o 15 o brifysgolion Prydain wedi bod yn trafod y nofelau ar y rhestr fer, Le Voyage dans l’Est gan Christine Angot, Enfant de Salaud gan Sorj Chalandon, Milwaukee Blues gan Louis-Philippe Dalembert, a La Plus Secrète Mémoire des hommes gan Mohamed Mbougar Sarr.

Fel rhan o’r seremoni, bu Gemma a Zoe yn cyflwyno’r nofel Le Voyage dans l’Est i’r gynulleidfa nodedig a oedd yn cynnwys ffigurau blaenllaw o fydoedd cyhoeddi, academia a’r gymuned Ffrangeg yn y DU.

Dyfarnwyd y wobr eleni i Mohamed Mbougar Sarr am ei lyfr, La Plus Secrète Mémoire des hommes a oedd yn ail fuddugoliaeth i’r awdur a gyhoeddwyd hefyd fel enillydd y Prix Goncourt ym mis Tachwedd 2021.

Daeth aelodau o dîm Ffrangeg yr Ysgol Ieithoedd Modern yr Athro Claire Gorrara a Hamid Sahki gyda Gemma a Zoe i'r seremoni. Wrth siarad am y digwyddiad a’r myfyrwyr a gymerodd ran, dywedodd Hamid Sahki, “Roedd Gemma a Zoe yn cynrychioli’r 16 myfyriwr a gofrestrodd ar gyfer Choix Goncourt UK yn 2022. Maent yn cynrychioli'r amlieithrwydd sy'n rhoi ei hunaniaeth i'r Ysgol Ieithoedd Modern. Cefais fy swyno gan y dewrder a’r rhyddid a ddefnyddiodd Gemma a Zoe i gipio arddull Christine Angot, un o leisiau mwyaf radical llenyddiaeth fodern Ffrainc.”

Mae Choix Goncourt UK yn hyrwyddo dysgu iaith a llenyddiaeth Ffrangeg, a chyfieithu a chyhoeddi awduron cyfoes. Trefnir gan Adran Addysg Uwch, Ymchwil ac Arloesi Llysgenhadaeth Ffrainc yn y Deyrnas Unedig a'r Sefydliad Institut Français du Royaume-Uni, mewn partneriaeth â chymdeithas lenyddol hanesyddol Ffrainc, yr Académie Goncourt.

.

Rhannu’r stori hon