Cymdeithas Astudiaethau Iberaidd yn creu hanes gyda’r gynhadledd ar-lein gyntaf

Cynhaliodd yr Ysgol Ieithoedd Modern ei chynhadledd ar-lein gyntaf ym mis Medi ar gyfer y Gymdeithas Astudiaethau Iberaidd Cyfoes.

Mae’r gynhadledd, a gynhaliwyd rhwng 1 a 3 Medi 2021, yn ei 42^ain flwyddyn erbyn hyn, ond dyma’r tro cyntaf iddi gael ei chynnal ar-lein.

Mae’r Gymdeithas yn cynnal cynhadledd ryngwladol ac amlddisgyblaethol ar ddechrau mis Medi bob blwyddyn, sydd fel arfer yn teithio rhwng gwahanol brifysgolion yn Sbaen, Portiwgal a’r Deyrnas Unedig.

Mae’r papurau a phaneli yn canolbwyntio ar faterion cymdeithasol-ddiwylliannol, economaidd a gwleidyddol yn y bedwaredd ganrif ar bymtheg, yr ugeinfed ganrif a'r unfed ganrif ar hugain, gyda ffocws penodol ar Benrhyn Iberia a'i berthynas â'r byd Lwsoffon a Sbaenaidd ehangach. Y maes thematig eleni oedd Iberia: Cof, Trawsnewidiadau a'r Trawswladol, ac roedd yn cynnwys detholiad o 18 o baneli a thri phrif anerchiad.

Roedd y prif siaradwyr yn cynnwys yr Athro António Costa Pinto (Prifysgol Lisboa) a siaradodd am y gydberthynas rhwng hanes trefedigaethol a datblygiad democratiaeth ym Mhortiwgal a Sbaen, Dr Teresa Abelló a Dr M. Lourdes Prades (Prifysgol Barcelona) a drafododd eu prosiect archifau digidol diweddar ar y brigadau rhyngwladol yn Rhyfel Cartref Sbaen (SIDBRINT), a'r Athro Parvati Nair (Queen Mary, Prifysgol Llundain) a drafododd nwyddau materol, mudwyr trawswladol, a’r dynameg ffiniau ymhlith manteros Sbaen gyfoes.

Roedd dros 100 o bobl yn cymryd rhan yn y gynhadledd o bedwar ban y byd, gyda phobl yn cysylltu o mor bell i ffwrdd â Puerto Rico a'r Emiraethau Arabaidd Unedig.

Wrth siarad am y gynhadledd, dywedodd y trefnydd, Dr Siân Edwards, Uwch-ddarlithydd mewn Astudiaethau Sbaenaidd, "Er gwaethaf yr amgylchiadau heriol ar hyn o bryd, roedden ni wrth ein bodd i allu cynnal cynhadledd ar-lein gyntaf y Gymdeithas ar Zoom eleni. Drwy wneud hynny, denwyd llawer o ymwelwyr efallai na fydden nhw wedi gallu bod yn bresennol yn y cyfnod cyn COVID-19, ac roedd hyn yn gam cadarnhaol iawn. Ymhlith uchafbwyntiau'r rhaglen i mi oedd y cyflwyniadau rhyngwladol hynod ddiddorol a'r dadleuon panel bywiog gyda chynrychiolwyr o amrywiaeth eang o gefndiroedd, ac roeddwn i’n falch o gael y cyfle i’w hwyluso ar gyfer y Gymdeithas a'r Ysgol Ieithoedd Modern."

Daeth yr arian ar gyfer y gynhadledd eleni gan Swyddfa Materion Diwylliannol a Gwyddonol Llysgenhadaeth Sbaen yn y DU, gyda chefnogaeth bellach gan Institut Ramon Llull a chanolfan CEFH yn Universidade Católica Portuguesa, Braga.

Nod y Gymdeithas yw hybu a hyrwyddo gwaith i astudio agweddau cymdeithasol, llenyddol, diwylliannol, economaidd a gwleidyddol sy’n berthnasol i Benrhyn Iberia cyfoes, o fewn y byd Lwsoffon a Sbaenaidd ehangach. Mae hefyd yn cyhoeddi'r cyfnodolyn academaidd, International Journal of Iberian Studies, sy'n canolbwyntio ar Iberia cyfoes (yr 20^fed a'r 21^ain ganrif) ac yn croesawu erthyglau sy'n defnyddio methodoleg gymharol neu gydgysylltiedig ar gyfer astudio Sbaen a Phortiwgal, gan ystyried hunaniaethau, diwylliannau, cenedligrwydd a chymunedau eraill.