Ewch i’r prif gynnwys

Yr Athro Kenneth Hamilton yn perfformio Preludes to Chopin

04 Hydref 2018

Programme for Preludes to Chopin with piano

Mae'r Athro Kenneth Hamilton wedi cynnal cyngerdd gyntaf o ddarnau o'i albwm sydd ar y gweill, Preludes to Chopin.

Perfformiodd Pennaeth yr Ysgol Cerddoriaeth ddetholiad o ddarnau o'r albwm yn yr Ysgol ddydd Mawrth 9 Hydref, a siarad am hanes y darnau.

Mae'r albwm yn dilyn ei ddau recordiad blaenorol a gafodd eu canmol, Back to Bach (2017) a Ronald Stevenson (2016).

Mae'r recordiad yn cynnwys sonatâu mawreddog Chopin a'r Barcarolle, yn ogystal â dau ddarn prin: Y Polonaise "Arwrol", wedi'i ail-weithio'n ddramatig gan Busoni, a fersiwn hiraethus o 'My Joys' gan Chopin/Liszt, wedi'i chwarae'n unol ag "atgofion personol o Liszt" gan Bernhard Stavenhagen, un o fyfyrwyr Liszt.

Mae nodiadau manwl yr Athro Hamilton ei hun ynghylch y darnau a'r perfformiad ohonynt yn cyd-fynd â'r CD. Ysgrifenna ynddynt, "gwirioni ar 'oes aur' canu'r piano, o Chopin i Paderewski, wnaeth fy ysbrydoli yma. Rwyf wedi gosod Preliwdiau hyfryd Chopin lle bwriadwyd iddynt fod yn y lle cyntaf – fel rhagymadroddion cain i ddarnau hirach – ac wedi ceisio ysgogi ysbryd y dull perfformio Rhamantaidd."

Ochr yn ochr â'i ddyletswyddau fel Pennaeth yr Ysgol Cerddoriaeth a Deon Rhyngwladol Coleg y Celfyddydau, y Dyniaethau a'r Gwyddorau Cymdeithasol, mae'r Athro Hamilton yn perfformio ledled y byd fel datgeiniad, unawdydd concerto a darlledwr. Cafodd ei ddisgrifio yn y gorffennol fel "pencerddor neilltuol – ymysg goreuon ei genhedlaeth am ganu'r piano" gan Kommersant Moscow, ac fel "perfformiwr bywiog, llawn egni" gan y New York Times.

Wrth siarad am yr albwm, dywedodd yr Athro Hamilton: "Ceisiais greu sain arbennig iawn ar gyfer y CD hwn: soniarusrwydd ariannaidd megis yng ngolau'r lleuad sydd, i'm meddwl innau, yn "Chopinesque". Gobeithio fy mod wedi llwyddo – ond barn y gwrandäwr sy'n cyfrif, yn y pen draw!"

Rhannu’r stori hon

Mae'r Ysgol yn cynnig amgylchedd cynhalgar lle gall myfyrwyr a staff weithio gyda’i gilydd ar amrywiaeth mawr o feysydd ysgolheictod cerddorol, cyfansoddi a pherfformio.