Cofrestru a chadw eich tocynnau

Diweddarwyd: 17/04/2025 15:09

Gwybodaeth am sut i gofrestru ar gyfer y Seremoni Raddio a chadw tocynnau.

Er mwyn bod yn gymwys ar gyfer y seremoni raddio, mae’n rhaid ichi gwblhau eich cwrs yn llwyddiannus a thalu’r holl ffioedd a dyledion sy’n weddill i’r Brifysgol cyn dyddiad eich seremoni.

Rhowch wybod inni a fyddwch chi’n dod i’r Seremoni

Mae’n rhaid ichi gadarnhau a fyddwch chi’n dod neu beidio, gan roi gwybod am eich gofynion a gofyn am unrhyw addasiadau rhesymol er mwyn inni allu cynllunio’n briodol.

Rydych chi’n cofrestru eich presenoldeb gan ddefnyddio SIMS Online. Ceir manylion am sut i wneud hyn yn e-bost eich gwahoddiad.

Byddwch chi’n cael e-bost sy’n cadarnhau eich bwriad i ddod i’r Seremoni pan fyddwch chi wedi cwblhau’r broses gofrestru.

Cadw eich tocynnau

Mae angen tocyn ar raddedigion a gwesteion i fynd i seremoni raddio Ysgol yn Arena Utilita a'i derbyniad yng Ngerddi Graddio, Campws Parc Cathays. Mae'r un tocyn yn cael ei ddefnyddio i fynd i mewn i'r ddau ddigwyddiad.

Marston Events yw ein partner tocynnau. Bydd gofyn ichi ddefnyddio eich rhif adnabod myfyriwr i ddefnyddio'r system docynnau lle cewch drefnu:

• eich tocyn
• dau docyn i westeion yn rhad ac am ddim
• tri thocyn ychwanegol i westeion am £30 yr un.

Mae’n rhaid i blant dros 2 oed gael tocynnau ar gyfer seremonïau a derbyniadau ysgol, a gwaherddir anifeiliaid anwes.

Archebwch docynnau

Tocynnau digidol

Caiff graddedigion eu tocynnau digidol drwy e-bost ym mis Gorffennaf. Os nad ydych chi wedi cael eich tocynnau 5 diwrnod gwaith cyn y seremoni, neu os oes problemau o ran dod o hyd iddyn nhw, cysylltwch â Marston Events. Rydyn ni’n argymell lawrlwytho’r tocynnau ymlaen llaw er mwyn osgoi problemau ar y diwrnod o ran Wi-Fi.

Mae’r holl seddi’n cael eu rhannu ymlaen llaw, a bydd y manylion ar y tocynnau digidol. Oherwydd nifer yr ymwelwyr yn y Seremoni Raddio, ni ellir newid y seddi ac ni ddylid rhannu tocynnau.

Dylai pob deiliad tocyn gadw at y mesurau diogelwch llym sydd ar waith ym mhob un o leoliadau’r Seremonïau Graddio.

Wrth gyrraedd Utilita Arena, sylwer y bydd bagiau yn destun chwiliad. Ni chaniateir cadeiriau gwthio yn yr arena, ond mae parc bygis ar gael. Rhagor o wybodaeth am Arena Utilita.

Darllediadau byw

I unrhyw un sy'n methu â dod i’r seremonïau graddio, byddan nhw’n cael eu darlledu'n fyw ar-lein ac yn Undeb y Myfyrwyr.

Yr wythnos cyn graddio, bydd ein hamserlen seremoni yn rhoi dolenni YouTube a Weibo ar gyfer y darllediadau byw.

Telerau ac amodau

Mae'n rhaid i chi sicrhau eich bod yn gymwys i raddio cyn archebu eich tocynnau.

Darllenwch ein telerau ac amodau i gael arweiniad ar beth i'w wneud os nad ydych yn gallu mynychu, gofyn am ad-daliad neu wneud cwyn.

Bydd ffotograffiaeth a ffilmio yn digwydd trwy gydol pob digwyddiad Graddio. Pan fyddwch chi'n mynd i mewn i'n lleoliadau Graddio, cynhelir gwiriadau a chwiliadau diogelwch.

Cysylltu â ni

Cysylltwch â Marston Events os oes gennych chi gwestiynau am drefnu tocynnau.

Cysylltwch os oes gennych chi gwestiynau am gofrestru ar gyfer y Seremoni Raddio neu eich gwahoddiad.