Astudio

Gwyliwch ein fideo am hyfforddiant y Sefydliad

Mae llawer o gyfleoedd i astudio gyda ni ac ymuno â’n cymuned gyrfa gynnar ryngddisgyblaeth lewyrchus.

Cyfleoedd doethurol

Rydym ni’n ymwneud â dwy Ganolfan ar gyfer Hyfforddiant Doethurol. Rhyngddynt, mae canolfannau WISE a FRESH yn hyfforddi dros 120 o fyfyrwyr ar draws Cynghrair Fawr y Gorllewin (GW4).

Yn y ddwy ganolfan, mae rhanddeiliaid yn ganolog i fframio problemau ymchwil a chefnogi’r tîm ymgynghorol. O ganlyniad, mae rhanddeiliaid yn chwarae rôl bwysig yn hyfforddiant myfyrwyr trwy letya lleoliad ymchwil neu oruchwylio prosiectau.

Mae ein hymchwilwyr cyswllt hefyd yn ymwneud â goruchwylio myfyrwyr o Bartneriaeth Hyfforddiant Doethurol NERC GW4+.

Hefyd mae llawer o gyfleoedd PhD ar gael yn ein hysgolion cyswllt. Mae rhagor o wybodaeth ar gael ar y wefan Find a PhD.

Prif gyswllt

Am fwy o wybodaeth am ein cyfleoedd astudio ôl-raddedig, cysylltwch â Madeline McLeod.

Rhaglenni ôl-raddedig a addysgir

Mae ein hymchwilwyr cyswllt yn ymwneud â dwy raglen sy’n archwilio heriau dŵr cyfredol.

MSc Dŵr mewn Byd Newidiol

Mae’r MSc Dŵr mewn Byd Newidiol yn cyfuno gwybodaeth o sawl maes i annog agwedd eang at broblemau dŵr, ac mae’n darparu sylfaen gref ar gyfer gyrfa ymchwil mewn pwnc cysylltiedig â dŵr.

MSc Cadwraeth ac Ecoleg Fyd-eang

Mae’r MSc Cadwraeth ac Ecoleg Fyd-eang yn cwmpasu’r prif faterion cadwraeth sy’n effeithio ar gynefinoedd dŵr croyw ac ecosystemau ar draws y byd.

MSc mewn Peirianneg Sifil a Dŵr

Mae'r MSc mewn Peirianneg Sifil a Dŵr yn hyfforddi peirianwyr dŵr ymgynghorol y dyfodol ac yn eu cyflwyno i hydrowybodeg, hydroleg gyfrifiadurol a hydroleg amgylcheddol.

Cynigir modiwlau eraill sydd â chydrannau gwyddor dŵr ar draws y Brifysgol:

• Daeareg Amgylcheddol Gymhwysol
• Peirianneg Sifil a Dŵr
• Gwyddor Data a Dadansoddeg
• Ynni Cynaliadwy a’r Amgylchedd

Cyfleoedd am leoliad

Fel rhan o’n rhaglenni ôl-raddedig a addysgir, rydym ni’n rhoi cyfleoedd i fyfyrwyr gael lleoliad o hyd at 9 mis gyda’n hymchwilwyr cyswllt.

Mae cyfleoedd am leoliad hefyd ar gael o dan gynlluniau megis Erasmus ar gyfer myfyrwyr yn genedlaethol ac yn rhyngwladol.

Os oes gennych chi ddiddordeb mewn gweithio gydag un o’n hymchwilwyr, cysylltwch â Madeline McLeod i gael rhagor o wybodaeth.

Grŵp gyrfa gynnar

Dyw hi byth yn rhy gynnar i gychwyn cymuned ryngddisgyblaeth. Mae ein grŵp gyrfa  gynnar yn dod â myfyrwyr ôl-raddedig, myfyrwyr PhD ac ymchwilwyr gyrfa gynnar at ei gilydd o wahanol ddisgyblaethau ar draws y Brifysgol.

Cwrs Ar-lein Agored Anferth (MOOC)

Oherwydd bod heriau dŵr ymhlith bygythiadau mwyaf y byd, fe wnaethon ni ddatblygu’r cwrs hwn gyda thîm rhyngddisgyblaeth o’n hymchwilwyr cyswllt er mwyn archwilio’r agweddau ffisegol, biolegol a chymdeithasol ar ddiogelwch dŵr.

Yn ystod y 30 mlynedd nesaf, amcangyfrifir y bydd 80% o boblogaeth y byd yn byw mewn ardaloedd lle mae lefelau uchel o brinder dŵr. Mae ein MOOC, sy’n rhedeg ddwywaith y flwyddyn, yn cyflwyno’r dysgwyr i heriau diogelwch dŵr ac yn esbonio pam mae gweithgaredd dynol a materion amgylcheddol yn rhoi pwysau cynyddol ar ein hadnoddau dŵr.

Watch our MOOC video